سوڭعى كۇندەرى فۋتبولدان قاتاردا ءوتىپ جاتقان الەم چەمپيوناتىنداعى ءتورت ويىندى تاماشالادىق. العاشقى ماتچ «س» توبىنداعى ارگەنتينا مەن ساۋد ارابياسى قۇرامالارى اراسىندا ءوتتى. ءيا, وڭتۇستىك امەريكادان كەلگەن كوماندا اتالعان جارىستاردىڭ باستى فاۆوريتتەرىنىڭ ءبىرى ەكەنى ءسوزسىز. ال Cاۋديا – تازا اۋتسايدەر. وسى باسەكە وتكەنگە دەيىن مايتالمان مامانداردان باستاپ, ميلليونداعان جانكۇيەرگە دەيىن ءدال وسىنداي پىكىردە ەدى.
جوعارىدا اتالعان قوس كوماندانىڭ ويىنىن تاماشالاۋ ءۇشىن 88 012 كورەرمەن لۋسايلدەگى «ۇلتتىق ستاديونعا» جينالدى. رەسمي دەرەكتەرگە سۇيەنسەك, بۇل سپورتتىق نىسان 80 000 كورەرمەنگە عانا ەسەپتەلگەن. ونىڭ سىرتىنداعى سەگىز مىڭنان استام ادامدى اتالعان ستاديوننىڭ قىزمەتكەرلەرى قاي جەرگە سىيدىرعانى بىزگە بەيمالىم. ول جايىندا ەشبىر جەردە ايتىلعان دا, جازىلعان دا جوق. دەسەك تە سول ويىننىڭ كۋاسى بولعاندار وسى «ىمىراسىز ايقاستان» كەرەمەت اسەر الىپ, ءۇيدى-ۇيلەرى مەن مەيمانحانالارىنا كوتەرىڭكى كوڭىل كۇيدە تاراسقانى انىق. بۇل كەشتە تەك ارگەنتينالىق جانكۇيەرلەر مەن ليونەل مەسسيدىڭ تىلەۋلەستەرى عانا مۇڭايدى.
باسەكە بىردەن ارگەنتينا فۋتبولشىلارىنىڭ ەكپىندى شابۋىلىمەن باستالدى. شابۋىل شەبىندە مەسسي, انحەل دي ماريا, لاۋتارو مارتينەس سىندى شەبەرلەرى بار اسا ازۋلى كوماندا باسەكە باستالعان بەتتە-اق ساۋد ارابياسى قۇراماسىنىڭ تاس-تالقانىن شىعارۋعا بەكىندى. العاشقى گول دا كوپ كۇتتىرگەن جوق. 10 مينۋتتا قارسىلاستار قاقپاسىنا پەنالتي بەلگىلەندى. 11 مەترلىك نۇكتەگە مەسسيدىڭ ءوزى كەلدى. ارگەنتينانىڭ باعىنا تۋعان ۇل ءمۇلت كەتكەن جوق – 1:0.
ارينە, اۋتسايدەرگە قارسى ويىندا ارگەنتينالىقتاردىڭ ءبىر عانا گولدى قاناعات تۇتا قويمايتىنى انىق. تولاسسىز شابۋىل ودان كەيىن دە ءبىر باسەڭدەگەن جوق. ءبىرىنشى تايمنىڭ وزىندە ولار تاعى ءۇش مارتە نىسانانى ءدال كوزدەدى. بىراق سلوۆەنيالىق تورەشى سلاۆكو ۆينچيچ بۇل گولداردىڭ ەشقايسىن ەسەپكە المادى. ويتكەنى ولاردىڭ بارلىعى دا وففسايتتان سوعىلدى. جالپى, سول 45 مينۋت ارالىعىندا ليونەل سكالونيدىڭ شاكىرتتەرى ويىننان جەتى رەت تىس قالدى. سونىمەن قاتار موحاممەد ءال-ۋۆايستىڭ دا ءمىنسىز ويىنىن اتاپ وتۋگە ءتيىسپىز. ء«ال-ءحيليالدىڭ» 31 جاستاعى قاقپاشىسى كەرەمەت سەيۆتەر جاساپ, كەمىندە بەس رەت ءوز كومانداسىن اسا قاۋىپتى جاعدايدان قۇتقارىپ قالدى.
ساۋديالىقتار دا ارا-تۇرا شابۋىلدادى. بىراق نەگىزىنەن ولار كوپ كۇشتەرىن قورعانىسقا جۇمساپ, ءوز قاقپالارىنا تاعى گول جىبەرىپ الماۋدىڭ قامىن كوبىرەك ويلادى.
ءۇزىلىس كەزىندە 54 جاستاعى فرانتسۋز مامانى ەرۆە رەناردىڭ ءوز شاكىرتتەرىنە نە ايتقانى بەيمالىم. ءبىر انىعى, 15 مينۋتتان كەيىن ءبىز مۇلدە باسقا ساۋد ارابياسىن كوردىك. ەكىنشى تايم باستالعان بەتتە سالەح ءال-شەحري تارازى باسىن تەڭەستىرسە, كوپ كەشىكپەي سالەم ءال-داۆساري ءوز كومانداسىن العا شىعاردى – 1:2. باس-اياعى ءتورت-بەس مينۋت ارالىعىندا ەكى گول سوققان ازيا قۇرلىعىنىڭ وكىلدەرى ودان كەيىن ارگەنتينا فۋتبولشىلارىنىڭ ەركىن كوسىلۋىنە ەش مۇمكىندىك بەرمەدى. وتە ساۋاتتى قورعانعان ولار بارلىق قاۋىپتىڭ بەتىن قايتارىپ, وزدەرىنە قاجەتتى ەسەپتى ماتچتىڭ سوڭىنا دەيىن ساقتاپ قالدى. وسىلايشا, جەر-جاھانداعى سان ميلليون جانكۇيەر ءححىى الەم چەمپيوناتىنداعى العاشقى سەنساتسيانىڭ كۋاسى بولدى.
جوعارىدا اتالعان ماتچتىڭ شيەلەنىستى وتكەنى سونشالىق, ارگەنتينا قۇراماسى شابۋىلداعان ساتتەردىڭ بىرىندە دوپتى كەرى قايتارۋ ءۇشىن جانۇشىرا العا ۇمتىلا سەكىرگەن ساۋديالىقتاردىڭ قاقپاشىسى موحاممەد ءال-ۋۆايس ءوزىنىڭ كوماندالاسىن تىزەسىمەن قاتتى سوعىپ ءوتتى. باسىنان العان سوققىدان كەيىن ياسير ءال-شاحراني كوپكە دەيىن ەسىن جيا الماي, جاسىل الاڭدا جاتتى. ونى دارىگەرلەر زەمبىلگە سالىپ اكەتتى. كەيىن بەلگىلى بولعانداي, ونىڭ جاعى سىنىپ, بەت سۇيەكتەرى قاتتى شىتىناپ كەتكەن ەكەن. وسى وقيعادان كەيىن ساۋديا بيلىگى قورعاۋشىنى جەكە ۇشاقپەن گەرمانياعا جەتكىزۋدى ۇيعاردى. قازىرگى كەزدە ياسيرگە وپەراتسيا جاسالماق. مىنە, كەيدە جەڭىسكە جەتۋ جولىندا وسىنداي تاۋەكەلگە دە بارۋعا تۋرا كەلەدى.
«س» توبىنداعى مەكسيكا مەن پولشا جانە «D» توبىنداعى دانيا مەن تۋنيس قۇرامالارى اراسىنداعى كەزدەسۋدە ەسەپ اشىلعان جوق – 0:0. سارسەنبىدەن سەيسەنبىگە قاراعان ءتۇنى فرانتسيا مەن اۋستراليا جاسىل الاڭعا شىقتى. ديدە دەشامنىڭ شاكىرتتەرى قارسىلاستارىن مەنسىنبەدى مە, الدە جاسىل قۇرلىقتىڭ وكىلدەرى ادۋىندى بولدى ما, ايتەۋىر سولار ءبىرىنشى بولىپ گول سوقتى. مەتيۋ لەكودان جاقسى پاس العان كرەيگ گۋدۆين دوپتى قاقپاعا توعىتتى. تەك سودان كەيىن عانا ەس جيعان فرانتسۋزدار بىرتە-بىرتە ويىن تىزگىنىن قولعا الدى. 27 مينۋتتا ادريانا رابو تارازى باسىن تەڭەستىرسە, ارادا بەس مينۋت وتكەن سوڭ وليۆە جيرۋ ءوز كومانداسىن العا شىعاردى.
ۇزىلىستەن كەيىن دە الەم چەمپيوندارىنىڭ باسىمدىعى انىق بايقالدى. ءوز ويىنىن تاپقان ولار اۋستراليالىقتاردىڭ قاقپاسىن تاعى ەكى مارتە ءدال كوزدەدى. 68-مينۋتتا كيليان مباپپە مەرگەندىك تانىتسا, 71-مينۋتتا جيرۋ ءدۋبلدىڭ اۆتورى اتاندى. ءسويتىپ, بۇل ماتچ 4:1 ەسەبىمەن اياقتالدى.