قازاقتىڭ قايسار ۇلى چەمپيوندىق اتاعىن ساقتاپ قالدى

وسىعان دەيىن WBO نۇسقاسىنىڭ تەڭدەسسىزى سانالىپ كەلگەن امەريكالىق اندرادە دەمەتريۋستىڭ باسقا سالماققا اۋىسۋىنا وراي ۇستىمىزدەگى جىلدىڭ تامىز ايىندا التىن بەلبەۋ ءالىمحان ۇلىنا رەسمي تۇردە تابىس ەتىلگەنىن جانكۇيەرلەر جاقسى بىلەدى. ياعني, چەمپيوندىق اتاققا ول جەكپە-جەككە شىقپاي-اق قول جەتكىزدى. سول سەبەپتى قانداسىمىز وسىنداي قۇرمەتكە ابدەن لايىق ەكەنىن لاس-ۆەگاستاعى باسەكەدە سان ميلليون كورەرمەن الدىندا تايعا تاڭبا باسقانداي ەتىپ دالەلدەۋگە ءتيىس ەدى.

اتالعان بوكس كەشىندە جانىبەك دەنزەل بەنتليمەن جۇدىرىقتاستى. 27 جاستاعى لوندوننىڭ تۋماسى اناۋ ايتقانداي ازۋلى ەمەس ەدى. ونىڭ كاسىپقوي بوكستى سەرىك ەتكەنىنە بەس جىلدان استى. سول ۋاقىت ارالىعىندا 19 كەزدەسۋ وتكىزىپ, 17 رەت جەڭىسكە جەتتى. 14 قارسىلاسىن نوكاۋتقا جىبەردى. ءبىر رەت ۇتىلىپ, تاعى ءبىر باسەكەدە تەڭ ەسەپ تىركەلدى. بەنتلي بۇعان دەيىنگى جەكپە-جەكتەرىنىڭ بارلىعىن دا ءوز وتانىندا وتكىزىپ, ەكى دۇركىن ۇلىبريتانيا چەمپيونى اتاندى. ال جانىبەكتىڭ ءجۇرىپ وتكەن جولى كوز الدىمىزدا. ول كەرەمەت اۋەسقوي بوكس مەكتەبىنەن ءوتتى. ازيا جانە الەم چەمپيونى اتانىپ, ازيا ويىندارىندا التىن تۇعىرعا كوتەرىلدى. ريو وليمپياداسىنىڭ شيرەك فينالىنا دەيىن جەتتى. 2016 جىلدان بەرى كاسىپقويلار اراسىندا كۇش سىناسۋدا. سول كەزدەن بەرى 12 رەت رينگكە كوتەرىلىپ, بارلىق كەزدەسۋدى ءوز پايداسىنا شەشتى. سەگىز قارسىلاسىن ەسىنەن تاندىردى. ونىڭ ۇستىنە ءالىمحان ۇلىنىڭ كاسىپقوي بوكس الەمىندە بارىنشا بيىك بەلەستەردى باعىندىرىپ, مول ولجاعا كەنەلۋىنە اتاقتى بوب ارۋم جەتەكشىلىك ەتەتىن Top Rank پروموۋتەرلىك كومپانياسىنىڭ ءوزى مۇددەلى. بىردەن ايتا كەتەيىك, ونداي قۇرمەت تەگىن بوكسشىعا كورسەتىلمەيدى جانە ونداي باق ەكىنىڭ بىرىنە بۇيىرمايدى.

جوعارىداعى جايتتاردىڭ بارلىعىن ەسكەرە كەلە, ساراپشىلار مەن بۋكمەكەرلىك كەڭسەلەردەن باستاپ, قاتارداعى قاراپايىم جانكۇيەرلەرگە دەيىن جانىبەك ءالىمحان ۇلىن «بۇل جەكپە-جەك­تىڭ ءسوزسىز ءفاۆوريتى» دەپ اتادى. تىپتەن قايسار قازاق قارا ءنا­سىلدى جىگىتتى باسەكە بەل ورتاعا جەتپەي-اق ۇرىپ جىعاتىنىنا كوپشىلىك ەش كۇماندانعان جوق. بىراق ءبارى كوپشىلىك ويلاعانداي بولمادى. ءيا, جەكپە-جەكتىڭ باسىنان اعىنا دەيىن جانىبەكتىڭ باسىمدىعىنمەن وتكەنى راس. ول ۇنەمى شابۋىل وتىندە ءجۇرىپ, قار­سىلاسىن قىسپاققا الدى. سوققىلارىن دا ءجيى دارىتتى. بىراق سونىڭ بىرەۋىنەن دە قارسىلاسى ايتارلىقتاي زارداپ شەككەن جوق. شىنى كەرەك, سول كەشتە ءبىز شىنايى «قازاق ءستيلىن» كورە المادىق. ال قارىمتا شا­بۋىلعا جۇگىنگەن دەنزەل ارا-تۇرا عانا العا ۇمتىلدى. قازاق­تىڭ ۇلىنان قايمىقتى ما, الدە چەمپيوندىق بەلبەۋ ءۇشىن تا­لاس­قانىنىڭ ءوزىن قاناعات تۇتتى ما, ايتەۋىر ۇلىبريتانيا بوكسشىسى نارتاۋەكەلگە بارمادى. سىرت كوزگە ول شارشى الاڭدا تەك ۋاقىت وتكىزۋمەن جۇرگەندەي كورىندى.

اقىرى ءدۇيىم جۇرت جەكسەنبى كۇنى تاڭ اتا تۇرىپ, تەلەديدار ارقىلى تاماشالاعان جەكپە-جەك 12 راۋندقا دەيىن سوزىلدى. تورەشىلەردىڭ بارلىعى دا جانى­بەكتىڭ جەڭگەنىن ءبىراۋىزدان مويىندادى. ەسەپ – 116-112, 116-112 جانە 118-110. وسىلايشا, قازاق بوكسشىسى وزىنە تيەسىلى الەم چەمپيونى اتاعىن ساقتاپ قالدى.

بىزگە ءبىر ۇناعانى, قاندا­سى­مىزدىڭ سوڭعى راۋندتارداعى قيمىل-قوزعالىسى. 11 جانە 12 راۋندتاردا ول جاقسى سوققىلارىن دارىتىپ, بەنتليدى ءبىراز ابىگەرگە سالدى. تىپتەن ۇرىپ جىعۋعا دا شاق قالدى. بىراق ءوزىن GGG سەكىلدى الەمدىك دەڭگەيدە تۇبەگەيلى مويىنداتۋ ءۇشىن بۇل تىم از. ورتا سالماقتا كىل مىقتىلاردىڭ شوعىرلانعانى بەلگىلى. بۇل جەردە گەننادي گولوۆكيننەن بولەك, ەريسلاندي لارا, كارلوس ادامەس, حايمە مۋنگيا, كريس يۋبەنك, ەسكيۆو فالكاو جانە تاعى باسقا دۇلەي كۇش يەلەرى بار. جانە دە ءالىمحان ۇلىنىڭ ءوزى «كانەلو» دەگەن جاناما ەسىم­مەن تانىلعان مەكسيكانىڭ مار­قاسقاسى ساۋل الۆارەستى دە ءجيى-ءجيى جەكپە-جەككە شاقىرۋدا. ال ونداي مىقتىلاردى جەڭۋ ءۇشىن جانىبەككە ءالى دە جاقسىلاپ تۇرىپ ەڭبەكتەنۋ كەرەك. ورتاڭ قول ۇلى­بريتانيالىق بوكسشى دەنزەل بەنت­ليمەن بولعان باسەكەدەن كە­يىن ءبىز وسىنداي ويعا كەلدىك.