اقش-تىڭ نيۋ-يورك قالاسىندا بەلگىلى جازۋشى, «قازاق» گازەتى مەن «ايقاپ» جۋرنالىنىڭ باس رەداكتورى قوعاباي سارسەكەەۆ كىتابىنىڭ تۇساۋكەسەرى ءوتتى. بۇل شارا امەريكالىق اۋديتوريانى قازاق ادەبيەتىمەن تانىستىرۋعا باعىتتالعان ۇمتىلىستى جالعاستىرادى. بۇعان دەيىن وسى جەردە ءابدىجامىل نۇرپەيىسوۆ پەن ولجاس سۇلەيمەنوۆ كىتاپتارىنىڭ تۇساۋكەسەرى وتكەن بولاتىن.
قوعاباي سارسەكەەۆ ءسوز بولىپ وتىرعان شىعارماشىلىق باسقوسۋدى قازاق تىلىندە وتكىزدى. اقش-تا ءبىزدىڭ انا تىلىمىزدەگى كىتاپتار سيرەك كەزدەسەتىندىكتەن قازاق دياسپوراسىنىڭ وكىلدەرى قالامگەر تۋىندىلارىنا قىزىعۋشىلىق تانىتتى.
«ۋاقىت وتە كەلە ءبىزدىڭ قازاق جازۋشىلارىنىڭ امەريكالىق وقىرماندارى ارتاتىنىنا سەنىمىمىز مول. ازىرگە ءبىز ولارعا اقش-پەن تانىسۋعا سەپتىگىمىزدى تيگىزۋدەمىز», – دەدى تۇساۋكەسەر ءراسىمى كەزىندە نيۋ-يورك قالاسىنداعى قازاقستان رەسپۋبليكاسىنىڭ باس كونسۋلى راۋشان ەسبولاتوۆ.
وسى كونسۋلدىقتىڭ كومەگىمەن «قازاقستان-امەريكالىق اليانس» بەيكوممەرتسيالىق ۇيىمى ارقىلى جۇزەگە اسقان كىتاپ تۇساۋكەسەرىنە نيۋ-يورك قالاسىنداعى بۇۇ جانىنداعى قازاقستان رەسپۋبليكاسىنىڭ تۇراقتى وكىلى قايرات ءابدىراحمانوۆ تا قاتىستى.
«ەگەمەن-اقپارات».