قورعانىس ءمينيسترى رۋسلان جاقسىلىقوۆ كازينودا 500 ميلليون تەڭگەدەن استام شىعىنعا ۇشىراعان شەنەۋنىكتەردىڭ قاتارىندا بولعان اسكەري قىزمەتكەرلەرمەن بولعان جاعدايعا تۇسىنىكتەمە بەردى, دەپ حابارلايدى Egemen.kz.
ءمينيستردىڭ ايتۋىنشا, قۇمار ويىندارىن ويناعان ءار اسكەري قىزمەتكەرگە قىزمەتتىك تەرگەۋ تاعايىندالعان.
«وندا اسكەري قىزمەتشىلەر ەمەس, اسكەري كۇشتەردىڭ قىزمەتكەرلەرى دە بار. ولاردىڭ ارقايسىسى بويىنشا قازىر قىزمەتتىك تەرگەۋ تاعايىندالعان. تەرگەۋ قورىتىندىسىنا سۇيەنە وتىرىپ, مەن ودان ءارى قىزمەتتى جالعاستىرۋ تۋرالى شەشىم قابىلدايمىن. بىراق الدىمەن تەرگەۋ جۇرگىزەيىك», دەپ ءتۇسىندىردى مينيستر سەنات وتىرىسىندا.
بۇل رەتتە ۆەدومستۆو باسشىسى كازينودا ۇتىلعانداردىڭ جوعارى قۇرامعا قاتىسى جوقتىعىن, قۇمار ويناعانداردىڭ «تاجىريبەسىز جاستار» ەكەنىن دە اتاپ ءوتتى.
«بىزدە ءبارى بار, قىزمەتتىك تەرگەۋ جۇرگىزىلۋدە. بۇل اسكەري قىزمەتشىلەردىڭ ورتاشا قۇرامى. جوعارى قۇرامنان ەمەس. بىلەسىز بە, جوعارى قۇرامنىڭ وعان ۋاقىتى جوق, ويتكەنى ءبىز ۇنەمى دالادا بولامىز, جۇمىس ىستەيمىز. ءبىزدىڭ اسكەري قىزمەتشىلەر كورسەتشكىشى بويىنشا قاراجات سوماسى از. كەيبىر جەردە جاستار تاجىريبەسىز», دەدى رۋسلان جاقسىلىقوۆ.
ەستەرىڭىزگە سالا كەتەيىك, بۇعان دەيىن مەملەكەتتىك قىزمەت ىستەرى اگەنتتىگى كازينودا 507 ميلليون تەڭگە جوعالتقان شەنەۋنىكتەر تۋرالى مالىمدەمە جاساپ ەدى.