«قازحروم» ترانسۇلتتىق كومپانياسى» اكتسيونەرلىك قوعامىنىڭ يگى باستاماسىمەن 1999 جىلدان بەرى ءداستۇرلى ءوتىپ كەلە جاتقان «اينالايىن!» فەستيۆال-بايقاۋى جاس تالانتتاردى ونەر كوگىنە قانات قاقتىرىپ كەلەدى. بۇل ونەر سايىسى وبلىس ورتالىعىنداعى مەتاللۋرگتەر مادەنيەت ۇيىندە وسىمەن ون بەسىنشى رەت جوعارعى دەڭگەيدە ۇيىمداستىرىلدى.
فەستيۆال-بايقاۋ اقتوبە, پاۆلودار, قاراعاندى وبلىستارىنىڭ تالاي بالعىن ونەرپازدار بۋىنىن بەكىتىپ, توپشىسىن قاتايتىپ, ۇلكەن ساحناعا اياق باسۋىنا دانەكەر بولعان بىرەگەي جوبا. ءتورت كۇن بويى 400-گە جۋىق جاس ورىنداۋشىلار 7 نوميناتسيا بويىنشا سايىسقا ءتۇستى.
بيىلعى ءداستۇرلى بايقاۋدا اقتوبە وبلىسى, اۋداندارى مەن قالا مەكتەپتەرىنەن 6, ءتىپتى شالعايداعى ويىل, ىرگەدەگى قارعالى, العا بالالار ءۇيىنىڭ تاربيەلەنۋشىلەرى ونەرلەرىن ورتاعا سالدى. ونەر بايقاۋىنا ۇكىلى ءۇمىتتەرىن ارقالاپ كەلگەن 400-گە جۋىق جاس تالاپ ونەرپازداردىڭ 154-ءى «قازحرومنىڭ» فيليالدارى ءدوڭ, جايرەم كەن-بايىتۋ كومبيناتتارىنىڭ, «قازمارگانەتس» كەن باسقارماسىنىڭ, اقتوبە, اقسۋ فەرروقورىتپا زاۋىتتارىنىڭ بالعىندارى. بايقاۋدىڭ سالتاناتتى اشىلۋىندا ونەر دوداسىنىڭ ۇيىمداستىرۋشىسى ءارى ۇيىتقىسى بولىپ وتىرعان «قازحروم» تۇك» اق-تىڭ پرەزيدەنتى ۆيكتور تيل جاس ونەرپازدارعا قۇتتىقتاۋ ءسوز ارنادى.
ساحنادا وزدەرىن قۇددى ءبىر كاسىبي انشىلەر, بيشىلەر, كۇيشىلەر سياقتى ۇستاعان جاس ورىنداۋشىلاردىڭ جەزتاڭداي ۇندەرى, كۇمبىرلەتە تارتقان كۇيلەرى جينالعانداردى ءتانتى ەتپەي قويمادى. مەتاللۋرگتەر مادەنيەت ءۇيى ءتورت كۇن بويى اسەم سازدى ءان مەن كۇمبىرلەگەن كۇيگە بولەندى, مىڭ بۇرالعان بيمەن كومكەرىلدى دەسە دە بولعانداي.
قازىلاردىڭ شەشىمى بويىنشا «اينالايىن-2014» فەستيۆال-كونكۋرسىنىڭ باس جۇلدەسىن «ۆوكال» جانرى بويىنشا اقتوبە فەرروقورىتپا زاۋىتىنان انارا كۇيشەنوۆا, اقسۋ فەرروقورىتپا زاۋىتىنان الىبەك ءالىمجانوۆ جانە №45 ورتا مەكتەپتەن اقمەرەي ءابدىراحمانوۆا جەڭىپ الدى. ال «حورەوگرافيا» اتالىمىندا تەك قانا ويىل اۋدانىنىڭ «مارجان» بي ۇجىمى باس جۇلدەگە قول جەتكىزدى. ال «تەاتر» جانرى بويىنشا باس جۇلدە ءدوڭ تاۋ-كەن بايىتۋ كومبيناتىنىڭ «شابىت» ۇجىمىنا بۇيىردى. «اسپاپتىق» جانرىندا گران-ءپريدى اقتوبە فەرروقورىتپا زاۋىتىنىڭ «جاستار» ۇلت-اسپاپتار وركەسترى, مارتوك اۋىلىنىڭ دومبىراشىلار ءانسامبلى ءوزارا ءبولىستى. «اينالايىننىڭ» 15 جىلدىق مەرەيتويىنا بايلانىستى «بەينەروليك» اتالىمى بويىنشا اقتوبە فەرروقورىتپا زاۋىتىنىڭ دايىنداعان بەينە روليگى ءۇزدىك دەپ تانىلىپ باس جۇلدەگە يە بولدى. «بەينەلەۋ ونەرى» بويىنشا گران-پري اقتوبە فەرروقورىتپا زاۋىتىنان ميلانا پروحينا, ەليزاۆەتا ۆولكوۆا جانە حرومتاۋدىڭ گيمنازيا-مەكتەبىنىڭ وقۋشىسى اناستاسيا سوبولەۆاعا, قالالىق بالالار مەكتەبىنەن الەكساندر پەتروۆاعا بۇيىردى. باس جۇلدەگە يە بولعان ۇجىمدار 27 مىڭ, جەكە ورىنداۋشىلار 18 مىڭ, ءبىرىنشى ورىندى مىسە تۇتقان ۇجىمدار 24 مىڭ, جەكە ونەر يەلەرى 15 مىڭ تەڭگە الدى. وزگەلەر دە اتاۋلى سىياقىمەن, ديپلوممەن ماراپاتتالدى.
مادەني شارا فەستيۆال-كونكۋرستىڭ 2002 جىلعى جۇلدەگەرى ديماش قۇدايبەرگەنوۆتىڭ ورىنداۋىنداعى اسەم انمەن قورىتىندىلانىپ, وتشاشۋمەن اياقتالدى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.