تەڭىزشى بولۋ – ابىروي

اتىراۋ وبلىسىنىڭ قۇرمانعازى اۋدانىنا قاراستى سۇيىندىك اۋى­لىندا مۇعالىمدەر وتباسىندا دۇ­نيەگە كەلگەن ەرنۇردىڭ اكەسى تاريح ءپəنىنىڭ مۇعالىمى, ال اناسى باستا­ۋىش سىنىپتارعا ساباق بەرەدى ەكەن. «دوستارىم مەنى اتا-انام سەكىلدى مۇعالىم بولادى دەپ ويلايتىن. ال مەنىڭ ارمانىم – تەڭىزشى بولۋ ەدى. 2021 جىلدىڭ قاراشا ايىندا اقتاۋ قالاسىنا اسكەري-تەڭىز كۇشتەرىنە اسكەرگە شاقىرتۋ الدىم. سول كەزدە بالالىق ارمانىمنىڭ العاشقى باسپالداعىنا قادام باسقانداي بولدىم. قازىر سول ارمانىم ورىندالدى. جانىما جاقىنى – اسكەري تەڭىزشى. اسكەري قىزمەتىمدى دە وسى سالادان باس­تاپ كەلەمىن. الداعى ۋاقىتتا وسى ماماندىعىمنىڭ شىڭىنا شىعىپ, جەرىمدى قورعايتىن مىقتى تەڭىزشى بولسام دەيمىن. بىزدە بوس ۋاقىت بولمايدى. ۇنەمى وقۋ-جاتتىعۋ جۇمىستارى جۇرگىزىلەدى, الايدا ءار سالانىڭ ءوز قىزىقتارى كوپ», دەيدى جاس تەڭىزشى.

ەرنۇر اڭگىمە بارىسىندا اكەسى دانياردىڭ ءجيى ايتاتىن اقىل-كەڭەسىمەن دە ءبولىستى. «Əكەم ىلعي «بالام سەنىڭ ومىردەگى باس­تى ماقساتتارىڭنىڭ ءبىرى وتانعا قىزمەت بولۋى كەرەك» دەپ ايتاتىن. اسقار تاۋىم – اكەمنىڭ وسى سوزدەرىنەن كەيىن وتان الدىنداعى بورىشىمدى وتەۋگە ەش ويلانباس­تان كەلدىم. 2018 جىلى مەكتەپتى ءبىتىرىپ, اقتوبە قالاسىنداعى مانشۇك مامەتوۆا اتىنداعى جوعارعى مەديتسينالىق كوللەدجىنە ەمدەۋ ءىسى – فەلدشەر ماماندىعىنا وقۋعا ءتۇسىپ, بۇل وقۋ ورداسىن 2021 جىلى اياقتادىم. بۇل سالا بو­يىنشا قىزمەت اتقارۋ – ۋاقىتتىڭ ەنشىسىندە», دەيدى الداعى جوسپارى تۋرالى تەڭىزشى.

ەرنۇر عالىمجانوۆ اسكەري-تەڭىز كۇشتەرىنە شاقىرىلعاننان كەيىن 2022 جىلدىڭ قاڭتار ايىندا 21814 اسكەري ءبولىمىنىڭ «ورال» زىمىراندى ارتيللەريالىق كەمەسىنىڭ زىمىراندى ارتيللەريالىق جاۋىنگەرلىك ءبولىمىنىڭ اعا مامانى لاۋازىمىنا تاعايىندالادى. قارۋلى كۇشتەردە وتەتىن وقۋ-جاتتىعۋلارعا بەلسەندى قاتىسىپ, جاقسى ناتيجەلەرگە قول جەتكىزىپ تە ۇلگەرگەن. جاس تەڭىزشى الەمنىڭ اسكەري قىزمەتشىلەرى باق سىنايتىن حالىقارالىق ارميا ويىندارىنا دا قاتىسقان. ەستەرىڭىزدە بولسا, بۇل ويىنداردا كەلىسىمشارت بويىنشا بىلىكتى, تاجىريبەلى اسكەري قىزمەتشىلەر مەن وفيتسەرلەر باقتارىن سىنايدى. سونداي اسكەري سايىستاردىڭ ءبىرى – 2022 جىلى تامىز ايىندا ازەربايجان استاناسى باكۋ قالاسىندا وتكەن «تەڭىز كۋبوگى». وسى جارىسقا ەرنۇر مەرزىمدى اسكەري قىزمەتشى رەتىندە قاتىسىپ, جۇلدەلى 2-ورىندى جەڭىپ العان. بۇل جايىندا اسكەري قىزمەتكەردىڭ ءوزى: «وسى جۇلدەنى وتان الدىنداعى بورىشىمدى وتەي ءجۇرىپ جەتكەن جەتىستىگىمىز دەپ ەسەپتەيمىن. اسكەردەن كوپ نارسە ۇيرەندىم. باستىسى – اسكەري ءتارتىپ. باۋىرجان مومىش ۇلى «تارتىپكە باعىنعان قۇل بولمايدى», دەيدى. اسكەر ءۇشىن تەمىر ءتارتىپتىڭ ماڭىزدى ەكەنىن ءتۇسىندىم. جوسپارلى دەنە شىنىقتىرۋ دا سۇيىكتى ىسىمە اينالدى. بۇل ايتىلعاندار اسكەردەن ۇيرەنگەندەرىمنىڭ ءبىر بولىگى عانا. جاۋعا بەرمەس جاۋىنگەرلىك دوستارىمنىڭ ورنى ءبىر بولەك. «اسكەري ومىردەگى دوستار – ماڭگىلىك» دەپ وتىرۋشى ەدى اسكەردە قىزمەت ەتكەن اعالارىمىز. سەبەبى 1 جىل بويى ورتاق قازاننان اس ءىشىپ, كازارمادا ءبىر ءۇيدىڭ بالالارىنداي بولىپ تۇرىپ, قىزمەتتىڭ قيىندىعى مەن اۋىرتپاشىلىعىنا بىرگە ءتو­زىپ, قۋانىشتى بىرگە ءبولىسىپ كەلە­مىز. جاۋىنگەرلىك دوستارىممەن سىيلاستىعىمىز ءارى قاراي جال­عاساتىنىنا كامىل سەنەمىن», دەيدى.

«اسكەردە ءجۇرىپ اتا-انا مەن جاقىن تۋىستاردىڭ ارقايسىسىنىڭ ورنى مەن قادىرىن ءتۇسىندىم» دەگەن سارباز اسكەري ءتارتىپتىڭ بارلىق نارسەنى ورنىمەن, ۋاقىتىمەن قولدانۋدى ۇيرەتكەنىن ايتادى. «بالا كەزىمىزدە اعالارىمىزدىڭ اسكەردەن الىپ كەلگەن البومىنا قاتتى قىزىعاتىنبىز. ال مەنىڭ قازىرگى باستى ماقساتىم – وتانىم ءۇشىن قىزمەت ەتۋ. اسكەرگە دايىندىق وتباسىنان, مەكتەپتەن باستالاتىنىنا كوزىم جەتتى. ءبىز اسكەري انتىمىزعا بەرىك بولۋىمىز كەرەك. ەلىمىزدىڭ ءار ازاماتى وسى ەلدىڭ اۋاسىن جۇتىپ, سۋىن ىشكەننەن كەيىن وتان الدىنداعى بورىشىن وتەۋگە مىندەتتى. «وتان ءۇشىن كۇرەس – ەرگە تيگەن ۇلەس» دەگەن رۋحتى ءسوز ارقىلى ءىنى-باۋىرلارىمدى اسكەري بورىشىن وتەۋگە شاقىرامىن», دەيدى تەڭىزشى ەرنۇر.

مۇحيت قوناروۆ

ماڭعىستاۋ وبلىسى