استانا ىرگەسىندە ءداستۇرلى جاپپاي ۆەلوشەرۋ ءوتىپ, جازعى ۆەلوماۋسىم رەسمي تۇردە اشىلدى. بيىلعى شارا تەك سپورتتىق جارىس قانا ەمەس, «تازا قازاقستان» رەسپۋبليكالىق ەكولوگيالىق اكتسياسى مەن «زاڭ مەن ءتارتىپ» قاعيداتىن دارىپتەيتىن ماڭىزدى باستاماعا اينالدى, دەپ حابارلايدى Egemen.kz.
تاڭسارىدەن جينالعان 700-گە جۋىق اۋەسقوي ۆەلوسيپەدشى قوسشى باعىتىنداعى اينالما جولدان باستاپ, ۇركەر تۇرعىن الابىنداعى «جاسىل بەلدەۋ» ساياباعىنا دەيىنگى 21 شاقىرىمدى باعىندىردى.
قالالىق سپورتتىق-بۇقارالىق ءىس-شارالاردى وتكىزۋ ديرەكتسياسى باسشىسىنىڭ ورىنباسارى ەرجىگىت وسەربايدىڭ ايتۋىنشا, بيىلعى ماۋسىمنىڭ ەرەكشەلىگى – قاتىسۋشىلاردى ورتاق جاۋاپكەرشىلىككە ۇندەۋىندە.
«بيىلعى جاپپاي ۆەلوشەرۋ «تازا قازاقستان» رەسپۋبليكالىق اكتسياسى جانە «زاڭ مەن ءتارتىپ» قاعيداتى اياسىندا ءوتتى. ءار جاستاعى قاتىسۋشىلاردىڭ باسىن قوسقان بۇل شارا سالاۋاتتى ءومىر سالتىن ناسيحاتتاۋمەن قاتار, قوعامداعى تازالىق پەن ءتارتىپ سياقتى ورتاق قۇندىلىقتاردى دارىپتەۋگە باعىتتالعان. شارا الدىندا قاتىسۋشىلارعا جولدا ءجۇرۋ جانە قاۋىپسىزدىك ەرەجەلەرى جان-جاقتى ءتۇسىندىرىلدى. ۆەلوشەرۋگە كەز كەلگەن ادام قاتىسا الادى. بالالار 12 جاستان باستاپ اتا-اناسىنىڭ رۇقساتىمەن جانە ولاردىڭ باقىلاۋىمەن قاتىسۋعا مۇمكىندىك الادى. ۆەلوماۋسىم جىل بويى جالعاسىپ, ونىڭ رەسمي جابىلۋى قازان ايىندا وتەدى», دەدى قالالىق سپورتتىق-بۇقارالىق ءىس-شارالاردى وتكىزۋ ديرەكتسياسى باسشىسىنىڭ ورىنباسارى ەرجىگىت وسەرباي.
ۆەلوشەرۋگە 70 جاستان اسقان قاريالاردان باستاپ, 12 جاستاعى جەتكىنشەكتەرگە دەيىن قاتىستى. ءتىپتى, ەلوردالىق ۆەلوماۋسىمنىڭ اشىلۋىنا الماتىدان ارنايى كەلگەن قوناقتار دا بولدى. استانالىق زەينەتكەر ەلەۋسىز پارداباي اقساقال جاستاردى بەلسەندى بولۋعا شاقىرىپ, مۇنداي شارالاردىڭ سەرگەكتىك سىيلايتىنىن اتاپ ءوتتى.
شارا سوڭىندا سپورتتىق ۆەلوسيپەدتەر مەن شلەمدەر ويناتىلىپ, قاتىسۋشىلارعا ىستىق پالاۋ مەن شاي بەرىلدى. ەڭ باستىسى, قاتىسۋشىلار سوزدەن ىسكە كوشىپ, «تازا قازاقستان» اكتسياسى اياسىندا ءىس-شارا وتكەن اۋماقتى قوقىستان تازارتىپ, ناعىز مادەنيەتتىلىكتىڭ ۇلگىسىن كورسەتتى.