باعالى سىيلىقتى Holland Bulb Market كومپانياسىنىڭ مەنەدجەرى مارسەلي پەحنا وڭىردە ەكىنشى جىل قاتارىنان ءوتىپ جاتقان «قىزعالداق مۇرا» حالىقارالىق فەستيۆالىندە سالتاناتتى تۇردە تابىس ەتتى. بيىل اۋقىمدى شارا تالاس اۋدانىنا قاراستى ەسەيحان اۋىلىندا ءوتىپ, شامامەن 6 مىڭعا جۋىق ادام جينالدى, دەپ حابارلايدى Egemen.kz.
جامبىل وبلىسىنىڭ اكىمى ەربول قاراشوكەەۆ ءوز سوزىندە بۇل باستامانىڭ تابيعاتقا جاناشىرلىقتى, ۇلتتىق قۇندىلىقتارعا دەگەن قۇرمەتتى جانە حالىقارالىق ىنتىماقتاستىقتى ايقىن كورسەتكەنىن اتاپ ءوتتى.
– كۇن شۋاعىنا بولەنگەن قىزعالداق القابى – تەك تابيعاتتىڭ كوركى عانا ەمەس, ول – دالا وركەنيەتىنىڭ ءۇنسىز شەجىرەسى, ۇلتتىق رۋحتىڭ ءتىرى ايعاعى. وسىنداي يگى ىستەر ارقىلى ءبىز تابيعات پەن ءداستۇردى ۇشتاستىرىپ, كەلەر ۇرپاققا امانات بولار قۇندىلىقتاردى دارىپتەپ كەلەمىز. بۇل فەستيۆال جامبىل ءوڭىرىنىڭ تۋريستىك الەۋەتىن الەمگە تانىتۋعا زور مۇمكىندىك بەرەدى, – دەدى ەربول قاراشوكەەۆ.
جامبىل ءوڭىرى – قىزعالداقتىڭ وتانى. مۇندا قىزعالداقتىڭ 18 ءتۇرى وسەدى, ونىڭ 10-ى قازاقستاننىڭ قىزىل كىتابىنا ەنگىزىلگەن. ايماق قىزعالداق تۇرلەرىنىڭ سان الۋاندىعى بويىنشا رەسپۋبليكادا الدىڭعى ورىندا.
جابايى قىزعالداقتار قورعاۋدى قاجەت ەتەدى
بيىلعى فەستيۆالدىڭ باستى جاڭالىعى – نيدەرلاند كورولدىگى تاراپىنان جامبىل وبلىسىنا 40 مىڭ ءتۇپ قىزعالداق تۇقىمىن تارتۋ ەتتى. قۇندى سىيلىقتى Holland Bulb Market كومپانياسىنىڭ مەنەدجەرى, نيدەرلاند ەلىنىڭ وكىلى مارسەلي پەحنا سالتاناتتى تۇردە تابىستادى.
فەستيۆال اياسىندا تاۋ بوكتەرىندە تىگىلگەن كيىز ۇيلەر مەن التىباقاندار ۇلتتىق ناقىشتى ايشىقتاپ, قولونەرشىلەر كورمەسى شارانىڭ كوركىن اشا ءتۇستى. ۇلتتىق سپورتتىڭ سەگىز تۇرىنەن وتكەن جارىستار كورەرمەنگە ەرەكشە اسەر سىيلاپ, جەڭىمپازدارعا قارجىلاي سەرتيفيكاتتار تابىستالدى.
اتىراۋدا قىزعالداق وسىرىلەدى
قىمىزمۇرىندىق ءداستۇرى دە جاڭعىرتىلىپ, مەرەكەنىڭ مازمۇنىن بايىتا ءتۇستى.
شارا بارىسىندا قوناقتار قاراتاۋ بوكتەرىندەگى قىزعالداق القابىن تاماشالاپ, ەرەكشە اسەرگە بولەندى.
«قىزعالداق مۇرا» فەستيۆالى «تازا قازاقستان» رەسپۋبليكالىق ەكولوگيالىق اكتسياسىمەن ۇندەسە ءتۇستى. شەرحان مۇرتازا اتىنداعى حالىقارالىق تاراز ۋنيۆەرسيتەتى مەن «اۋىل» پارتياسىنىڭ 200-دەن استام ەرىكتى فەستيۆال اۋماعىن قوقىستان تازارتتى.