جۋىردا گەرمانيانىڭ Transfermarkt پورتالى بىرقاتار قىزىقتى مالىمەت جاريالادى. فۋتبولشىلاردىڭ نارىقتاعى قۇنىنا تالداۋ جۇرگىزىپ وتىراتىن ينتەرنەت باسىلىمنىڭ دەرەگى بويىنشا, انگليانىڭ «مانچەستەر سيتي» جانە نورۆەگيا ۇلتتىق قۇراماسىنىڭ شابۋىلشىسى ەرلينگ حولاند الەم فۋتبولىنىڭ ەڭ قىمبات ويىنشىسى اتانسا, انگليا 2022 جىلعى 10 ايدىڭ قورىتىندىسىندا ەڭ قىمبات قۇرامالاردىڭ كوشىن باستادى. ال قازاقستان قۇراماسى بۇل رەيتينگتە 85-ورىنعا جايعاسقان. ۋەفا بويىنشا 38-ساتىدا تۇر.
بيىل جاز ايىندا دورتمۋندتىڭ «بورۋسسياسىنان» انگليانىڭ «مانچەستەر سيتيىنە» اۋىسىپ كەلگەن 22 جاستاعى ەرلينگ حولاند فرانتسيالىق كيليان مباپپەنى ءبىرىنشى ورىننان ىعىستىرىپ, ەڭ قىمبات فۋتبولشىلاردىڭ رەيتينگىندە توپ باستادى. ءدال قازىرگى تاڭدا Transfermarkt پورتالى نورۆەگيالىق فۋتبولشىنى 170 ملن ەۋروعا باعالاپ وتىر. ال جەلتوقسان ايىندا 24 جاسقا تولاتىن پسج جانە فرانتسيا ۇلتتىق قۇراماسىنىڭ ويىنشىسى كيليان مباپپە 160 ميلليون ەۋروعا باعالانعان. ۇزدىك ۇشتىكتى يسپانيانىڭ «رەال» جانە برازيليا ۇلتتىق قۇراماسىنىڭ 22 جاستاعى جارتىلاي قورعاۋشىسى ۆينيسيۋس (120 ملن ەۋرو) تۇيىندەپ تۇر.
وكىنىشكە قاراي, الەمنىڭ ەڭ قىمبات 500 فۋتبولشىسىنىڭ تىزىمىندە بىردە-ءبىر قازاقستاندىق ويىنشى جوق. دەگەنمەن گەرمانيالىق باسىلىمىڭ مالىمەتى بويىنشا, قازاقستان قۇراماسىنىڭ ەڭ قىمبات فۋتبولشىسى دەپ رەسەيدىڭ تسسكا كلۋبىندا دوپ تەبەتىن جارتىلاي قورعاۋشى باقتيەر زاينۋتدينوۆ (3,5 ملن ەۋرو) تانىلدى. ودان كەيىنگى ورىندارعا «زەنيتتىڭ» قورعاۋشىسى ءنۇرالى ءالىپ (1,5 ملن), «توبىل» مەن «احماتتىڭ» (رەسەي) قورعاۋشىلارى سەرگەي مالىي مەن مارات بىستروۆ (900 مىڭ), اسحات تاعىبەرگەن (750 مىڭ, «توبىل»), مۇحامەدجان سەيسەن («تاراز»), باعدات قايىروۆ («توبىل») جانە ارتۋر شۋشەناچەۆ («قايرات», 700 مىڭ) جايعاسقان.
ۇلتتىق قۇرامالارعا توقتالار بولساق, 1 ملرد 40 ملن ەۋروعا باعالانعان انگليا الەمدىك رەيتينگتە ءبىرىنشى ورىندا تۇر. ەكىنشى ورىنعا الەم چەمپيوناتىنىڭ بەس دۇركىن جەڭىمپازى برازيليا (1,14 ملرد) ورنالاسسا, 2018 جىلى رەسەيدە وتكەن دۇنيەجۇزىلىك دوپ دوداسىندا باس جۇلدەنى ولجالاعان فرانتسيا (898 ملن) ءۇشىنشى ورىندا كەلەدى. قۇرلىق بويىنشا ءبولىپ قاراساق, ەۋروپادا – انگليا, كونمەبول-دا – برازيليا, ازيا قۇرلىعىندا – كورەيا (152,02 ملن), افريكادا – كوت-د’يۆۋار (366,75 ملن), كونكاكاف-تا –اقش (209 ملن) قۇرامالارى كوش باستاپ تۇر.
قازاقستان قۇراماسى ۋەفا-دا 17,6 ملن ەۋرومەن جالپى ەسەپتە 38-ورىننان كورىندى. ال تمد قۇرامالارىنىڭ اراسىندا التىنشى ورىنعا جايعاسقان. كەلمەسكە كەتكەن كسرو مەملەكەتتەرىنىڭ رەيتينگىندە ۋكراينا قۇراماسى ەڭ قىمبات ۇجىم اتاندى. Transfermarkt ساراپشىلارى اندرەي شەۆچەنكونىڭ ءىزباسارلارىن 176,5 ملن ەۋروعا باعالاعان. ەڭ قىمبات فۋتبولشىسى – رۋسلان مالينوۆسكي («اتالانتا», يتاليا). ونىڭ نارىقتاعى باعاسى – 28 ملن ەۋرو. ەكىنشى ورىنعا رەسەي قۇراماسى جايعاستى (138,8 ملن ەۋرو). ەڭ قىمبات فۋتبولشىسى – «كراسنودار» قاقپاشىسى ماتۆەي سافونوۆ (16 ملن ەۋرو). ءۇشىنشى ورىندى گرۋزيا قۇراماسى (83,95 ملن) تۇيىندەپ تۇر. قاپ تاۋى ەلىنىڭ ەڭ قىمبات فۋتبولشىسى – حۆيچا كۆاراتسحەليا («ناپولي» يتاليا) – 35 ملن.
كەيىنگى ورىنداردى ارمەنيا (27,65 ملن), وزبەكستان (24,65 ملن), ازەربايجان (17,15 ملن), مولدوۆا (14,75 ملن), بەلارۋس (12,60 ملن), ەستونيا (10,6 ملن), لاتۆيا (9,6 ملن), ليتۆا (6,78 ملن), قىرعىزستان (5,98 ملن), تاجىكستان (5,28 ملن) جانە تۇرىكمەنستان (2,06 ملن) قۇرامالارى ەنشىلەدى.