قونىسبەك بوتباي ومىردەن وزىپتى, ءبىرازدان بەرى جانىن قيناپ جۇرگەن اۋىر دەرت اقىرى الىپ تىنىپتى, دەگەن سۋىق حابار جۇرەكتى كادىمگىدەي جۇدەتتى.
قونىسبەكتى ستۋدەنت شاعىنان بىلەتىن ەدىم. وتكەن عاسىردىڭ سەكسەنىنشى جىلدارىنىڭ باسىندا جاستار گازەتىندە ىستەپ جۇرگەن كەزىمدە, مەن باسقاراتىن بولىمگە كەلىپ جۋرناليستىك تاجىريبەدەن وتكەن-ءدى. ءالى بالاڭ ستۋدەنت بولسا دا, جازۋعا جاۋاپكەرشىلىكپەن قارايتىنىن بىردەن بايقاتقان. بەرىلگەن تاقىرىپتاردى تاپ-تۇيناقتاي ەتىپ ورىنداۋىمەن كوزگە تۇسكەن. ماقالالارى دا توقتاۋسىز جارىق كورىپ جاتتى. ۋنيۆەرسيتەتتى بىتىرەر كەزدە, رەداكتسياعا ارنايى سوعىپ, ءسال قىسىلا وتىرىپ: «اعا, جاقىندا بىزگە جولداما بەرىپ, جان-جاققا بولە باستايدى. سىزبەن اقىلداسايىن دەپ ەدىم, وسى گازەتتە قالۋدىڭ مۇمكىندىگى بولار ما ەكەن, جانىمدى سالىپ جۇمىس ىستەر ەدىم», – دەگەن ءوتىنىشى دە ەسىمدە. قولتاڭباسى قالىپتاسىپ قالعان جۋرناليست قاي جەردە دە كەرەك. گازەت رەداكتورى سەيداحمەت بەردىقۇل اعامىزعا بارىپ, قونىسبەكتەي دايىن ءجۋرناليستىڭ جاستار گازەتىنە لايىق ەكەندىگىن ايتتىم. ول كىسى دە ستۋدەنتتىڭ جازعاندارىن بايقاپ جۇرەدى ەكەن, قارسىلىعىن بىلدىرگەن جوق. سول 1982 جىلى قونىسبەك 300 مىڭنان استام تارالىمى بار «لەنينشىل جاس» (بۇگىنگى «جاس الاش») گازەتىنە قىزمەتكە كەلىپ, كوپ ۋاقىت وتپەي-اق قالامى جۇيرىك, قوزعاعان تاقىرىپتارىن تاستاي قىلىپ ورىندايتىن ىزدەنىمپاز جۇرنالشىلاردىڭ بىرىنە اينالدى...
1990 جىلى «انا ءتىلى» گازەتى اشىلىپ, ونىڭ باس رەداكتورلىعىنا «جاس الاشتا» جاۋاپتى حاتشى بوپ جۇمىس ىستەپ جۇرگەن وسى جولداردىڭ اۆتورى تاعايىندالدى. جاڭا قۇرىلعان «قازاق ءتىلى» قوعامىنىڭ جاۋىنگەر ءۇنى بولۋعا ءتيىس ءتىل جانە ەلتانۋ اپتالىعىنىڭ جۇمىسىن جوسپارلاۋ, قانداي بولىمدەردى اشقان دۇرىس بولادى, دەگەن ماسەلەلەردى ويلاستىرۋ بارىسىندا, ءتىل قوعامىنىڭ جۇمىسىن جان-جاقتى كورسەتۋ ءۇشىن ءبىر ءبولىمدى ء«تىل جانە الەۋمەتتىك ءومىر» دەپ اتاۋ قاجەت شىعار دەگەن وي كەلگەن. ال ونى كىم جۇرگىزە الادى؟ ارينە, قونىسبەك. دەرەۋ وسى ۇسىنىسىمدى قونىسبەككە جەتكىزدىم. ءوزى دە «جاس الاشتىڭ» بىلدەي ءبىر ءبولىمىن باسقارىپ وتىرعان ول, جاڭا اپتالىقتىڭ ماقساتىن باعامداعاننان كەيىن بىردەن اۋىسىپ كەلۋگە كەلىستى. سودان «انا ءتىلىنىڭ» العاشقى كەزەڭدەگى ءدۇبىرلى شەرۋىنە بەل شەشە ارالاسىپ كەتتى. باقىت ساربالا ۇلى, ەرتاي ايعالي ۇلى, عاريفوللا انەس سياقتى جۇيرىكتەرمەن بىرگە قونىسبەك تە جاڭا گازەتتىڭ العاشقى تۇرەنىن سالۋعا بەلسەنە قاتىستى. بىردەن حالىق كوڭىلىنەن شىققان باسىلىمعا اينالىپ, ءبىرىنشى جىلدىڭ وزىندە 111 مىڭ تارالىم جيناعان اپتالىقتىڭ سول ءدۇمپۋلى ورلەۋىندە ءدال وسى قۇرامنىڭ قوسقان ۇلەسى وراسان زور.
ءۇش جىلدان كەيىن ءاردايىم ىزدەنىستە جۇرەتىن قونىسبەك باسپاگەرلىك باعىتقا قاراي ات باسىن بۇردى. ءبىرتىن-ءبىرتىن ول ىسكە دە توسەلىپ, ءوزى كەيىننەن قۇرعان «قازاقپارات» باسپاسى ەلىمىزدەگى جەتەكشى كورپوراتسيالاردىڭ بىرىنە اينالدى. بەزەندىرىلۋى مەن تۇرقى بولەك نەشە ءتۇرلى قۇندى-قۇندى كىتاپ ونىمدەرى شىعارىلدى. سونىڭ ءبارىنىڭ باسىندا اۋەلدەن جۇردەك ويلى جۇرنالشى, قالامى شيراق پروزاشى, باسپا ءىسىنىڭ ۇزدىگى قونىسبەك جۇرگەن ەدى.
قايران قونىسبەك, ەندى سەن دە ماڭگىلىك مەكەنىڭە وزىپسىڭ. مۇندايدا «قازانىڭ الدى يماندى, ارتى قايىرلى بولسىن» دەپ كوڭىل ايتقاننان باسقا نە شارا بار. شىققاننىڭ ەسەسىن بەرسىن, قالعاننىڭ بەرەكەسىن بەرسىن...
جارىلقاپ بەيسەنباي ۇلى