كەلەسى اپتادا الاتاۋ باۋرايىنداعى اسەم شاھاردا مانەرلەپ سىرعاناۋ سپورتىنىڭ «مۇزبالاعى», 2014 جىلعى سوچي وليمپياداسىنىڭ قولا جۇلدەگەرى دەنيس تەندى ەسكە تۇسىرۋگە ارنالعان ءىىى حالىقارالىق ءتۋرنيردىڭ جالاۋى جەلبىرەيدى. حالىقارالىق كونكي تەبۋشىلەر وداعى (ISU) ۇيىمداستىراتىن Challenger ساناتىنداعى جارىس 26-28 قازان كۇندەرى الماتىداعى «حالىق ارەنا» سپورت كەشەنىندە وتەدى.
قازاقتىڭ داڭقتى مانەرلەپ سىرعاناۋشىسى دەنيس تەندى ەسكە الۋعا ارنالعان تۋرنير از ۋاقىتتىڭ ىشىندە ءداستۇرلى جارىستىڭ بىرىنە اينالىپ ۇلگەردى. دۇنيە ءجۇزىنىڭ سپورتشىلارى باس قوساتىن حالىقارالىق ءتۋرنيردىڭ تۇساۋى ەڭ العاش 2019 جىلى الماتىدا كەسىلگەن بولاتىن. دەگەنمەن, 2021 جىلعى جارىس وڭتۇستىك استانادان ەلورداعا كوشىرىلدى. ءسويتىپ باس قالادا وتكەن بايراقتى باسەكەدە الەمنىڭ 18 ەلىنەن كەلگەن سپورتشىلار شەبەرلىك بايقاستى. ولاردىڭ قاتارىندا رەسەي بىرىنشىلىگىنىڭ قولا جۇلدەگەرى مارك كوندراتيۋك, 2020 جىلعى جاسوسپىرىمدەر وليمپياداسىنىڭ كۇمىس جۇلدەگەرى, جاستار اراسىنداعى الەم چەمپيونى اندرەي موزالەۆ, جاستار اراسىنداعى الەم چەمپيوناتىنىڭ قولا جۇلدەگەرى پەتر گۋممەنيك, جاستار اراسىنداعى گران-پري جارىستارىنىڭ جەڭىمپازى مەن جۇلدەگەرلەرى اناستاسيا مۋحورتوۆا, دميتري ەۆگەنەۆ جانە تاعى باسقا مانەرلەپ سىرعاناۋشىلار بار.
بيىل ISU Challenger-ءدىڭ 7-كەزەڭى سانالاتىن «دەنيس تەن مەموريالى» مادەنيەت جانە سپورت مينيسترلىگىنە قاراستى سپورتتى دامىتۋ ديرەكتسياسى مەن الماتى قالاسى اكىمدىگىنىڭ قولداۋىمەن «حالىق ارەنا» سپورت كەشەنىندە وتەدى. قازىردىڭ وزىندە اتالعان جارىسقا جاپونيا, كورەيا, يتاليا, فرانتسيا, گەرمانيا, يزرايل, بولگاريا, ماجارستان, ازەربايجان, مولدوۆا, ارمەنيا, گرۋزيا, ۋكراينا جانە قىرعىزستان ۇلتتىق فەدەراتسيالارى سپورتشى جىبەرەتىندەرىن راستادى. ال قازاقستاندىق مانەرلەپ سىرعاناۋشىلار بارلىق باعدارلامادا ونەر كورسەتەدى.
بيىلعى مەموريالدىڭ باستى قويىلىمى – جاپونيالىق كانا مۋراموتو مەن دايسۋكە تاكاحاسي جۇبىنىڭ ءبيى بولماق. دەنيستىڭ دوسى بولعان دايسۋكە تاكاحاسي – جەكەلەي سىندا ءساتتى ونەر كورسەتكەن سپورتشى, 2010 جىلى ۆانكۋۆەردەگى وليمپيادانىڭ جۇلدەگەرى اتانعان.
سونداي-اق بيىلعى جارىسقا ارنايى شاقىرىلعان قوناقتار قاتارىندا حالىقارالىق دارەجەدەگى سپورت شەبەرى مارينا زۋەۆا, وليمپيادا چەمپيوندارى گوردەەۆا-گرينكوۆ پەن ۆەرتيۋ-سكوتت, وليمپيادا جەڭىمپازى كانادالىق پاتريك چان جانە ت.ب. بار. تۋرنير جەڭىمپازدارىن ماراپاتتاۋ راسىمىنەن كەيىن سپورتشىلاردىڭ قاتىسۋىمەن گالا-شوۋ وتەدى.
ايتا كەتەيىك, ISU Challenger Series تۋرنيرلەرى 2014 جىلدان باستاپ قىركۇيەكتەن جەلتوقسانعا دەيىن وتەدى. ISU چەللەندجەر سەرياسىنا ەنگىزىلگەن جارىستاردىڭ ءتىزىمىن جىل سايىن قايتا بەكىتىپ وتىرادى.
دەنيس تەن دە كەزىندە ISU Challenger سەرياسىندا ەكى رەت جەڭىسكە جەتكەن. وتانداسىمىز 2014 جىلى جاتتىعۋلاردىڭ تىعىز كەستەسى مەن جوسپارلانعان وزگە جارىستارعا قاراماستان, وسى سەرياعا دا قاتىسۋعا شەشىم قابىلداعان بولاتىن. حورۆاتياداعى Zlatna pirueta Zagreba تۋرنيرىندە كەرەمەت ونەر كورسەتىپ, 1-ورىندى جەڭىپ الدى. 2015 جىلى دا دەنيس زاگرەبتەگى دودادا تاعى دا ۇزدىك شىققان ەدى.