بۇل كۇندەرى يسپانيانىڭ پونتەۆەدرا قالاسىندا ءوتىپ جاتقان جاستار اراسىنداعى (U-23) الەم بىرىنشىلىگىن قازاقستاننىڭ گرەك-ريم كۇرەسى شەبەرلەرى ءبىر عانا جۇلدەمەن قورىتىندىلادى.
60 كيلو سالماق دارەجەسىندە كۇش سىناسقان ولجاس سۇلتان تۇساۋكەسەر كەزدەسۋىندە ازەربايجاندىق نيحات ماممادليگە (0:5) ەسە جىبەردى. قارسىلاسىنىڭ فينالعا شىعۋىنىڭ ارقاسىندا قانداسىمىز جۇبانىش بەلدەسۋلەرىنە قاتىسۋ قۇقىعىنا يە بولدى. ءوز مۇمكىندىگىن ولجاس ۇتىمدى پايدالانىپ, ۇندىستاندىق سۋميت سۋتميت (8:0) پەن نۋرمۋحاممەت ابدۋللاەۆتىڭ (8:0) اياعىن كوكتەن كەلتىردى. ناتيجەسىندە قازاق بالۋانى قولا مەدالدى موينىندا جارقىراتتى. ءدال سونداي مۇمكىندىك ماقسات سايلاۋدا دا بولدى. 87 كيلو سالماقتا سىنعا تۇسكەن ول باستاپقى بەلدەسۋلەرىندە ۇندىلىك كۋمار سۋنيل (4:0) مەن يراندىق ابولفازي ءالي ءشوۋبانيدى (9:4) شاڭ قاپتىرعانىمەن, جارتىلاي فينالدا ارمەنيالىق گەۆورگ تادەۆوسيانعا (4:6) جول بەردى. ال قولا مەدال ءۇشىن تارتىستا ماقسات نيدەرلاندتىق مارسەل ستەركەنبۋرگتەن (1:9) ويسىراي ۇتىلىپ, بەسىنشى ورىندى قاناعات تۇتتى.