قۇرلىقتىق حوككەي ليگاسىندا (قحل) باق سىناپ جاتقان ەلوردانىڭ «بارىسى» كەزەكتى تۋر ويىنىن «بارىس ارەنادا» وتكىزىپ, حاباروۆسكىنىڭ «امۋرىن» تىزە بۇكتىردى.
التى مىڭعا جۋىق جانكۇيەر تاماشالاعان استاناداعى كەزدەسۋدىڭ العاشقى كەزەڭى تەڭ ەسەپپەن اياقتالدى. 7-مينۋتتا نيكيتا ميحايليس قحل-ءدىڭ وسى ماۋسىمىنداعى ءبىرىنشى شايباسىن سوعىپ, «بارىسقا» باسىمدىق سىيلادى. دەگەنمەن, 19-مينۋتتا سان باسىمدىعىنا يە بولعان قوناقتار ۇزىلىسكە دەيىن تارازى باسىن تەڭەستىرىپ كەتتى – 1:1. گولدىڭ اۆتورى – پاۆەل ماحانوۆسكي.
ەكىنشى كەزەڭدە «بارىس» ويىنشىلارى قارقىنىن ارتتىرىپ, قوناقتار قاقپاسىنا جاۋاپسىز ءۇش شايبا ەنگىزدى. الدىمەن 26-مينۋتتا اڭسار شايحمەددەنوۆ «بارىستى» قايتادان ەسەپتە العا شىعارسا, ارادا ءبىر مينۋت وتكەندە يۋري سەرگيەنكو مەن ليندەن ۆەي مەرگەندىگىمەن كوزگە ءتۇسىپ, تابلوداعى كورسەتكىشتى 4:1-گە جەتكىزدى. ال ءۇشىنشى كەزەڭ باستالعان بەتتە ەگور پەتۋحوۆ دالدىك تانىتىپ, ويىننىڭ نۇكتەسىن قويدى –5:1.
وسىلايشا, قاتارىنان ەكى ويىندا جەڭىسكە جەتكەن «بارىس» «شىعىس» كونفەرەنتسياسىنىڭ تۋرنير كەستەسىندەگى جاعدايىن جاقسارتىپ الدى. جەرلەستەرىمىز كەلەسى كەزدەسۋىن بۇگىن «باتىس» كونفەرەنتسياسىندا ءتورتىنشى ورىندا تۇرعان نيجني نوۆگورودتىڭ «تورپەدوسىمەن» وتكىزەدى.