Astana Qazaqstan Team ۆەلوكومانداسىندا ءتورت جىل تەر توگىپ, قازاقستاندا كەنجەلەپ قالعان وسى ءبىر سپورت ءتۇرىنىڭ دامۋىنا وليمپيادا چەمپيونى الەكساندر ۆينوكۋروۆتان كەيىن قالتقىسىز ۇلەس قوسقان ايگىلى ۆينچەنتسو نيبالي رەسمي تۇردە سپورتتىق كارەراسىن اياقتادى. جيىرما جىلعا جۋىق «شايتاناربانى» جانىنا سەرىك ەتىپ, تالاي ءدۇبىرلى دودالاردا وزا شاپقان يتاليالىق ساڭلاقتىڭ كارەراسىنداعى سوڭعى جارىسى – ءوز ەلىندە ۇيىمداستىرىلعان Giro di Lombardia بىركۇندىك ۆەلوبايگەسى بولدى.
ۆەلوسپورت الەمىندە «اكۋلا» لاقاپ اتىمەن ايگىلى بولعان ۆينچەنتسو نيبالي سپورتتىق مانسابىن اياقتايتىنىن جىلدىڭ بەلورتاسىندا-اق مالىمدەگەن ەدى. قاراشا ايىندا 38 جاسقا تولاتىن ارداگەر ۆەلوشاباندوز ۆينچەنتسو نيبالي سپورتتىق كارەراسىن 2003 جىلى جەرگىلىكتى Mastromarco-Chianti Sensi اۋەسقوي ۆەلوكلۋبىندا باستاپ, 2005 جىلى كاسىپقويلار اراسىندا باق سىناي باستادى. ءبىر جىلدان كەيىن ول اتاعى دۇركىرەپ تۇرعان اقش-تىڭ Liquigas كلۋبىنا اۋىستى. التى جىلدىڭ ىشىندە نيبالي قاجىرلى ەڭبەگىنىڭ ارقاسىندا ۆەلوسپورتتاعى ءىرى جەتىستىكتەرىنە قول جەتكىزە باستادى. دەگەنمەن, ونىڭ الەمدىك ارەناداعى اتاعى قازاقستاندىق «استانا» كلۋبىنىڭ قاتارىنا قوسىلعاننان كەيىن شىعا باستادى. وتىز جاسىنا دەيىن ەڭ ءىرى ءۇش گراند-تۋردىڭ تەك بىرەۋىندە عانا («يسپانيا ۆۋەلتاسى») توپ جارىپ, ورداسىن بۇزا الماي جۇرگەن ءنيباليدىڭ قازاق توپىراعىنا تابانى تيگەن ساتتەن باستاپ ەكىنشى تىنىسى اشىلدى. قازاقتىڭ قازىسىن جەپ, قىمىزىن ىشكەن يتاليالىق ۆەلوشاباندوز امەريكالىق كلۋبتا التى جىل ءجۇرىپ شىعا الماعان بيىگىن قازاقستانداعى نەبارى ءۇش جىلىندا-اق باعىندىردى.
يتاليالىق ۆەلوشاباندوزدىڭ «استانادا» ءجۇرىپ قول جەتكىزگەن تابىستارىنا توقتالار بولساق, نيبالي قازاقستانعا كەلە سالا ءاربىر يتاليالىق ۆەلوشاباندوزدىڭ ارمانى بولعان «دجيرو د’يتاليا» جارىسىندا باس جۇلدەنى جەڭىپ الدى. اراعا ءۇش جىل سالىپ ەكىنشى مارتە جەڭىس تۇعىرىنان كورىندى. سونداي-اق كەلەسى جىلى ۆەلوسپورتشىلاردىڭ بەيرەسمي الەم چەمپيوناتى سانالاتىن اتاقتى «تۋر دە فرانس» دوداسىندا دارالاندى. سونىمەن قاتار حالىقارالىق ۆەلوسيپەدشىلەر وداعىنىڭ (UCI) كۇنتىزبەسىنە ەنگەن كوپكۇندىك «تيررەنو – ادرياتيكو» (2013), «دجيرو دەل ترەنتينو» (2013), «ومان تۋرى» (2016), بىركۇندىك «دجيرو دي لومبارديا» (2019), «ميلان-سان-رەمو» جانە تاعى باسقا ءدۇبىرلى دودانىڭ جەڭىمپازى اتاندى.
ۆينچەنتسو 2016 جىلى «استانادان» كەتىپ, باعىن اقش پەن باحرەين كلۋبتارىندا سىناپ كورۋگە شەشىم قابىلدادى. بىراق ونىڭ بۇل قادامى ءساتتى بولا قويمادى. ءسويتىپ ول التى جىلدان كەيىن بيىل قازاقستانعا قايتا ورالدى. وكىنىشكە قاراي, نيبالي بيىل «استانا» ساپىندا بىرقاتار جارىسقا قاتىسقانىمەن, ەشبىرىندە ۇزدىكتەر قاتارىنان كورىنە المادى.
وتكەن اپتادا جىلدىڭ جانە ءوزىنىڭ ەڭ سوڭعى جارىسى – «دجيرو دي لومبارديا» تۋرىنا قاتىسىپ, مارە سىزىعىن نەبارى 18-بولىپ كەستى. ايتپاقشى, ۆينچەنتسو نيباليمەن بىرگە بيىل 40 جاستاعى يسپانيالىق اتاقتى ۆەلوشاباندوز الەحاندرو ۆالۆەردە دە تاس جولمەن قوشتاستى. كەيىنگى 10 جىلدا ول تەك Movistar Team (يسپانيا) ۆەلوكومانداسىندا ونەر كورسەتتى.