نيدەرلاند پەن پولشانىڭ بىرنەشە قالاسىندا ءوتىپ جاتقان ۆولەيبولدان ايەلدەر اراسىنداعى الەم چەمپيوناتى ءوز مارەسىنە تاياپ كەلەدى. ەرتەڭ FIVB (حالىقارالىق ۆولەيبول فەدەراتسياسى) مەن Volley World 4 جىلدا ءبىر رەت ۇيىمداستىراتىن جاھاندىق دودانىڭ شيرەك فينال ويىندارى باستالادى.
23 قىركۇيەكتە جالاۋى جەلبىرەگەن الەم چەمپيوناتىنىڭ العاشقى اينالىمىنا 24 قۇراما قاتىسىپ, التى-التىدان ءتورت توپقا ءبولىنىپ وينادى. ءسويتىپ, ءار توپتا ۇزدىك ناتيجە كورسەتكەن ءتورت قۇراما ەكىنشى اينالىمعا جولداما الدى. ماسەلەن, ەكىنشى كەزەڭدە ا جانە D توبىنداعى كوماندالار (يتاليا, برازيليا, جاپونيا, قىتاي, بەلگيا, نيدەرلاند, پۋەرتو-ريكو جانە ارگەنتينا) ە توبىنا جايعاسىپ, نيدەرلاندتا سىنعا ءتۇستى. ال ۆ مەن س-داعى ۇزدىكتەر (سەربيا, اقش, تۇركيا, پولشا, كانادا, دومينيكان رەسپۋبليكاسى, تايلاند جانە گەرمانيا) F سەبەتىنە ءتۇسىپ, پولشادا شەبەرلىك بايقاستى.
ەكىنشى اينالىمنىڭ قورىتىندىسى بويىنشا, تاعى دا ءار توپتان ۇزدىك شىققان 4 ۇجىم شيرەك فينالعا جولداما الدى. ەندى ولار وليمپيادالىق جۇيە بويىنشا كىم مىقتىنى انىقتايدى. جەڭىلگەن قۇراما جارىس جولىنان شىعىپ وتىرادى.
اتاپ ايتار بولساق, ە توبىنان شيرەك فينالعا يتاليا (25 ۇپاي) جانە برازيليا (23) قۇرامالارى تىكەلەي جولداما الدى. سونداي-اق توپتىق كەزەڭنىڭ سوڭعى تۋر ويىندارىنا دەيىن ۇپايلارى شامالاس بولعان جاپونيا, قىتاي, بەلگيا جانە نيدەرلاند قۇرامالارى كەشە سوڭعى ەكى جولدامانى ساراپقا سالدى.
ال F سەبەتىندەگى كوماندالاردان قازىرگى الەم چەمپيوندارى – سەربيا, وليمپيادا چەمپيونى – اقش, 2015 جىلعى ەۋروپا ويىندارىنىڭ جەڭىمپازى – تۇركيا جانە وليمپيا ويىندارىنىڭ ەكى دۇركىن قولا جۇلدەگەرى – پولشا قۇرامالارى شيرەك فينالعا شىقتى.
وكىنىشكە قاراي, الەم چەمپيوناتىنىڭ العاشقى اينالىمىندا اقش, سەربيا, گەرمانيا, بولگاريا جانە كانادا ۆولەيبولشىلارىمەن ءبىر توپتا باق سىناعان داركو دوبرەسكوۆ جاتتىقتىراتىن قازاقستاننىڭ ايەلدەر قۇراماسى بارلىق ويىندا قارسىلاسىنا جول بەرىپ, سوڭعى ورىندا قالىپ قويدى. ءسويتىپ, بيىلعى الەم چەمپيوناتى جەرلەستەرىمىز ءۇشىن العاشقى اينالىمنان-اق اياقتالدى. ۆولەيبولدان ايەلدەر اراسىنداعى الەم چەمپيوناتى 15 قازاندا مارەسىنە جەتەدى.