اۋستراليانىڭ ۆۋللونگونگ قالاسىندا وتكەن ۆەلوسپورتتان الەم چەمپيوناتى مارەسىنە جەتىپ, قازاقستاندىق ۆەلوشاباندوزدار ءبىر التىن مەدال جەڭىپ الدى.
23 جاسقا دەيىنگى ۆەلوسپورتشىلار اراسىنداعى جارىستا قازاقستان ۇلتتىق قۇراماسىنىڭ مۇشەسى, Astana Qazaqstan Team ۆەلوكلۋبىنىڭ وكىلى ەۆگەني فەدوروۆ الدىنا جان سالمادى. 170 شاقىرىمعا سوزىلعان قاشىقتىقتى وتانداسىمىز 3 ساعات 57 مينۋت 08 سەكۋندتا ءجۇرىپ ءوتىپ, الەم چەمپيونى اتاندى. فەدوروۆتان ءبىر سەكۋندقا قالىپ قويعان چەحيالىق ۆەلوشاباندوز ماتياس ۆاچەك كۇمىس جۇلدەگە قول جەتكىزسە, نورۆەگيالىق سورەن ۆەرەنشەلد قولانى قاناعات تۇتتى.
بۇل – قازاقستان ۇلتتىق قۇراماسىنىڭ 23 جاسقا دەيىنگى ۆەلوسپورتشىلار اراسىنداعى الەم چەمپيوناتىندا جەڭىپ العان ەكىنشى التىنى. بۇعان دەيىن ازيا ويىندارىنىڭ جەڭىمپازى, ازيا چەمپيونى الەكسەي لۋتسەنكو 2012 جىلى ءدال وسى ساناتتا جاھاندىق دودانىڭ باس جۇلدەسىن ولجالاعان بولاتىن.