كوكشەتاۋدا تۇتانعان ءتىلسىز جاۋ اۋىزدىقتالدى. الدىن الا دەرەكتەر بويىنشا, «بۋراباي» مەملەكەتتىك ۇلتتىق تابيعي پاركىندە 300 شارشى مەتر جەردى جالىن شارپىعان, دەپ حابارلايدى Egemen.kz.
تاۋداعى تاستاردىڭ استى ءالى دە بىقسىپ جاتقاندىقتان, توتەنشە جاعدايلار مينيسترلىگىنىڭ ءورت سوندىرۋشىلەرى مەن «بۋراباي» مۇتپ قىزمەتكەرلەرى وقيعا ورنىندا جۇمىس ىستەپ جاتىر. تولىق سوندىرۋگە تاعى ءبىراز ۋاقىت كەتۋى مۇمكىن, ودان كەيىن قايتا تۇتانباۋى ءۇشىن سول ماڭاي باقىلاۋعا الىنادى.
بۇگىن تاڭعى 6:50-دە ورمان ءورتىن ەرتە انىقتايتىن Smart National Park Burabay جۇيەسى 897 مەتر بيىكتە ءتۇتىن شىعىپ جاتقانىن «بايقاپ», ديسپەتەرلەرگە حابار بەرگەن.
ۇلتتىق پاركتىڭ بارلىق جەرى جوعارى دالدىكتى وپتيكالىق سەنسورى بار كامەرامەن باقىلانادى. بۇل كامەرالاردىڭ شولۋ بۇرىشى 360°. كۇندىز اشىق كەڭىستىكتەگى ءتۇتىندى بىردەن كورەتىن جۇيەنىڭ داتچيكتەرى اۆتوماتتى تۇردە ىسكە قوسىلسا, قاراڭعى تۇسكەندە تەپلوۆيزور ارقىلى جۇمىس ىستەيدى.
«اقىلدى» جۇيە ءورت شىققان جەردىڭ كوورديناتتارىن, قاۋىپ-قاتەر دەڭگەيىن ءدال انىقتاپ, توتەنشە قىزمەتتەرگە تەز ارادا حابار بەرۋگە جانە ءورت ءسوندىرۋ كولىكتەرىنىڭ وقيعا ورنىنا ەڭ ىڭعايلى جولمەن جەتۋىنە جاعداي جاسايدى.
«سمارت-جۇيەدەن بەلگى تۇسىسىمەن بىردەن دابىل قاعىلىپ, توتەنشە قىزمەتتەر ىسكە كىرىستى. الدىمەن ۇلتتىق پاركتىڭ ينسپەكتورلارى ءورت سوندىرەتىن قول قۇرالدارىن الىپ جاياۋ جەتتى. ارتىنشا ولارعا اقمولا وبلىسى بۋراباي اۋدانىنىڭ توتەنشە جاعداي ءبولىمى, اۆيا ءورت ءسوندىرۋ قىزمەتى كومەككە كەلدى. «بۋراباي» ۇلتتىق پاركىنىڭ, توتەنشە جاعداي قىزمەتىنىڭ, اكىمدىكتىڭ ءتيىستى ماماندارىنىڭ بىرلەسىپ ارەكەت ەتۋىنىڭ ارقاسىندا 2 جارىم ساعات ىشىندە, ياعني 11-دەن 13 مينۋت كەتكەندە جالىن تولىق اۋىزدىقتالدى», دەپ حابارلادى ۇلتتىق پاركتىڭ جەدەل باسقارۋ ورتالىعىنىڭ جەتەكشىسى اسىلحان احمەتجانوۆ.
ءتىلسىز جاۋدىڭ بەتىن قايتارۋعا ۇلتتىق پاركتىڭ 70 قىزمەتكەرى, بۋراباي اۋدانىنىڭ توتەنشە جاعداي ءبولىمىنىڭ 96 ادامى, اۆيا ءورت ءسوندىرۋ قىزمەتىنىڭ 4 مامانىن قوسا العاندا بارلىعى 200-دەن ادام قاتىسىپ, 14 ءورت ءسوندىرۋ كولىگى جۇمىلدىرىلدى. تەحنيكانىڭ جەتەۋى – ۇلتتىق پارككە, بەسەۋى – اۋداندىق توتەنشە جاعداي بولىمىنە تيەسىلى.
ءتىلسىز جاۋدىڭ تارالۋىنا جول بەرمەۋ ءۇشىن «قازاۆياقۇتقارۋ» اق تىكۇشاقتارى 14 رەت سۋ شاشتى. اۋماقتى زەرتتەۋ ءۇشىن «قازاق ورمانداردى اۆياتسيالىق قورعاۋ» رمقك تىكۇشاعى دا تارتىلدى. ءورتتىڭ شىعۋ سەبەبى مەن كەلگەن زالالدار تۋرالى رەسمي قورىتىندى وقيعا تولىق زەرتتەلگەننەن كەيىن بەرىلەدى.
ءورتتى تەز انىقتايتىن اۆتوماتتى جۇيە جاساندى ينتەللەكت نەگىزىندە قۇراستىرىلعان. ول جازىق دالادا نەمەسە ورماندى جەرلەردە ءتىلسىز جاۋدى تەز ارادا انىقتاۋعا كومەكتەسەدى.
ۇلتتىق پارك اۋماعىندا Smart National Park Burabay جۇيەسىنىڭ جوعارى دالدىكتى كامەرالارمەن جابدىقتالعان 13 انتەننالى دىڭگەگى بار. ول «بۋراباي» مۇتپ تەرريتورياسىن تۇگەل (129 299 گا) تۇگەل قامتىپ, ىرگەلەس ورنالاسقان قورعالاتىن اۋماقتاردى دا باقىلاپ وتىرۋعا جول اشتى.
بۇعان دەيىن ايتىلعانداي, جىلىنان بەرى بۋرابايدا ورتكە قارسى جۇيەنىڭ ارقاسىندا دالا مەن ورماندا شىققان 18 ءورت تەز انىقتالدى. ۇلتتىق پاركتىڭ, جەرگىلىكتى اكىمدىكتىڭ جانە ءورت سوندىرۋشىلەردىڭ تىزە قوسىپ ارەكەت ەتكەنىنىڭ ارقاسىندا ءتىلسىز جاۋ بىردەن ءسوندىرىلىپ, بار بولعانى جارتى گەكتار جەردى جالىن شارپىعان.