«جەتى لاق» فەرما شارۋاشىلىعى – وڭىردەگى ەڭ ءىرى ەشكى شارۋاشىلىعى جانە ەشكى سۇتىنەن وندىرىلەتىن تازا تابيعي فەرما ونىمدەرىنىڭ بىردەن-ءبىر وندىرىستىك الاڭى. ءوز جۇمىسىن جوعارى دەڭگەيدە ۇيلەستىرىپ, ساپالى تاۋارىمەن حالىق قاجەتتىلىگىن وتەپ كەلە جاتقان «جەتى لاق» فەرماسى – «ماڭعىستاۋ وبلىسى بويىنشا قازاقستاننىڭ ۇزدىك تاۋارى» سىيلىعىنىڭ يەگەرى.
– قازاقستاندا جەكە فەرما شارۋاشىلىقتارىن دامىتۋ, بۇل – بۇكىل ەلدىڭ ەكونوميكاسى ءۇشىن زور مۇمكىندىك. ماسەلەن, قازىرگى ۋاقىتتا رەسپۋبليكادا جىلىنا 15 مىڭ تونناعا جۋىق ىرىمشىك وندىرىلەدى. ال ءبىزدىڭ ىرىمشىگىمىز وتە ءدامدى. شارۋاشىلىعىمىزدىڭ نەگىزىن قالاعان كەزدە ءبىز وسى ەرەكشەلىكتى كوبىرەك دارىپتەۋدى ماقسات ەتىپ, ەكسكۋرسيالار وتكىزە باستادىق, بالالاردى ىرىمشىك وندىرىسىنە قىزىقتىرىپ, كاسىپتىك باعدار جۇرگىزدىك. Business Bilim جوباسى ارقىلى كوپتەگەن كاسىپكەردىڭ قاتەلىكتەرىن اينالىپ ءوتىپ, بيزنەستى دۇرىس قۇرا الدىق. الداعى جوسپارىمىز – بيزنەستى كەڭەيتىپ, ەكسپورتقا شىعۋ, – دەيدى فەرما باسشىسى الەكساندرا گريگولوۆا.
الەكساندرا جوباعا 60 باس ەشكىسى بار فەرماسى جانە فەرما نەگىزىندە ەشكى سۇتىنەن ىرىمشىكتەر مەن اشىعان ءسۇت ونىمدەرىن وندىرەتىن شاعىن زاۋىت بيزنەس-يدەياسىمەن كەلگەن بولاتىن. جوبا بارىسىندا ءسۇت ونىمدەرى مەن ىرىمشىك زاۋىتىنىڭ جۇمىسى ءبىر قالىپقا كەلىپ, ءوندىرىس كولەمى ۇلعايدى. قازىرگى ۋاقىتتا ەشكىلەر سانى ەكى ەسە كوبەيدى.
ال Bal Balyk كومپانياسى جاڭا اۋلانعان بالىقتى وڭدەۋمەن, البىرت, باقتاق جانە مايشاباقتى قاقتاۋمەن اينالىسادى. بۇل وتباسىلىق ءوندىرىس ايىنا ءۇش تونناعا دەيىن بالىق ونىمدەرىن وندىرەدى جانە ايىنا 30-40 توننا كورسەتكىشكە قول جەتكىزۋدى كوزدەپ وتىر. ساراپشىلاردىڭ كومەگىمەن بيزنەستىڭ ايرىقشا ماقساتى انىقتالىپ, جۇمىستىڭ قۇرىلىمى جاسالدى. كومپانيا قازاقستاندىق تىزىلىمگە ەنگىزىلىپ, سايكەستىك سەرتيفيكاتىن جانە ۆەتەرينارلىق-سانيتارلىق قورىتىندى مەن سىناقتار حاتتاماسىن الدى.
– قازىرگى ۋاقىتتا ونىمدەردى وڭتۇستىك كورەيا مەن قىتايعا ەكسپورتتاپ كورۋدەمىز. باسقا ەلدەرگە شىعۋ ءۇشىن ءوندىرىس كولەمىن ۇلعايتۋ كەرەك. دەگەنمەن ءبىزدىڭ نارىق ءبىرشاما كۇردەلى. بالىق وڭدەيتىن شارۋاشىلىقتارعا قولداۋ كورسەتۋ ءۇشىن قازاقستاندىق بالىقتىڭ وزىندىك قۇنىن رەتكە كەلتىرۋ قاجەت. بۇل جانارماي, لوگيستيكا, جەر-سۋ تەلىمىن كۇتىپ ۇستاۋ, براكونەرلەرمەن كۇرەس, جەر تەلىمدەرىن مونوپوليالاندىرۋ قۇنى سياقتى بىرقاتار قارجىلىق شىعىنعا تاۋەلدى. ءبىز Business Bilim جوباسىنان 4,7 ملن تەڭگە گرانت الىپ, وندىرىستىك كولەمدى ۇلعايتىپ كەلەمىز, – دەدى Bal Balyk قاقتالعان, سۇرلەنگەن, مارينادتالعان, تۇزدالعان بالىق ءوندىرىسىنىڭ نەگىزىن قالاۋشى ايجان نۇعمانوۆا.
ماڭعىستاۋداعى ماقتاۋلى شارۋاشىلىقتار ءوز ونىمدەرىن تاراتۋ كوكجيەگىن كەڭەيتىپ, شەتەل نارىعىنا قادام باسا باستادى. قازاقستاندىق ءونىمنىڭ كەرەگەسى كەڭەيسە ەل ەكونوميكاسىنا دا ولجا.
ماڭعىستاۋ وبلىسى