ەلوردادا الەمدىك جانە ءداستۇرلى دىندەر كوشباسشىلارىنىڭ VII سەزىن وتكىزۋ كەزىندە قوعامدىق ءتارتىپ پەن قاۋىپسىزدىكتىڭ ساقتالۋىن قامتاماسىز ەتۋگە ۇلتتىق ۇلاننان 1 800-گە جۋىق اسكەري قىزمەتشى جۇمىلدىرىلدى.
ۇلتتىق ۇلان ءباسپاسوز قىزمەتىنىڭ مالىمەتىنشە, ەلوردانىڭ قوعامدىق ءتارتىبىن ءتيىستى دەڭگەيدە قامتاماسىز ەتۋ, سونداي-اق ماڭىزدى ءىس-شارادا قۇقىق بۇزۋشىلىقتىڭ الدىن الۋ جانە جولىن كەسۋ ماقساتىندا 5573 اسكەري ءبولىمىنىڭ جەكە قۇرامى 13 قىركۇيەكتەن باستاپ كۇشەيتىلگەن قىزمەت رەجىمىنە اۋىستىرىلعان. ەلوردالىق جەدەل قۇرامادان 1 200-گە جۋىق اسكەري قىزمەتشى دەلەگاتسيا مۇشەلەرىن قارسى الۋ, ولاردىڭ قالا ىشىندە قوزعالۋى كەزىندەگى قاۋىپسىزدىكتى قامتاماسىز ەتۋ قىزمەتىن اتقارىپ جاتىر.
سونداي-اق جەدەل كۇشتەردى كۇشەيتۋ ءۇشىن قاراعاندى جانە كوكشەتاۋ قالالارىنان ۇلتتىق ۇلاننىڭ 600-دەن استام اسكەري قىزمەتشىسى كەلگەن.
– ەلورداعا الەمنىڭ تۇكپىر-تۇكپىرىنەن قوناقتاردىڭ كەلۋىنە بايلانىستى قوعامدىق ورىنداردا, كوشەلەردە, سونداي-اق مادەني-بۇقارالىق ءىس-شارالار وتكىزىلەتىن جەرلەردەگى قاۋىپسىزدىك شارالارى كۇشەيتىلدى. ماسەلەن, بۇقارالىق اقپارات قۇرالدارى ريم پاپاسى فرانتسيسكتىڭ قاتىسۋىمەن وتەتىن ءىس-شاراعا 7 مىڭنان استام ادام قاتىسقانىن حابارلادى. قوعامدىق ءتارتىپتى قامتاماسىز ەتۋ ءۇشىن ۇلتتىق ۇلاننىڭ 5510, 5451 اسكەري بولىمدەرىنىڭ جەكە قۇرامى كەلدى. ولاردىڭ حالىقارالىق كورمەلەردى, سونداي-اق باسقا دا ءىرى مادەني جانە سپورتتىق ءىس-شارالاردى وتكىزۋ كەزىندە ەلوردادا قۇقىقتىق ءتارتىپتى قاداعالاۋدا تاجىريبەلەرى بار. سەبەبى بۇعان دەيىن ەكسپو-2017 حالىقارالىق كورمەسى جانە ەلوردانىڭ 20 جىلدىق مەرەيتويى كەزىندە دە ارنايى كەلگەن بولاتىن, – دەيدى «ورتالىق» وڭىرلىك قولباسشىلىعى قولباسشىسىنىڭ ءبىرىنشى ورىنباسارى – شتاب باسشىسى, پولكوۆنيك نۇربول مىرتاەۆ.
«وسىنداي تاريحي وقيعا كەزىندە ەلوردادا قىزمەت اتقارىپ جاتقانىما قۋانىشتىمىن. ۇلتتىق ۇلانعا كەلگەنىمە 9 اي بولدى, وسى ۋاقىت ىشىندە جەزقازعان قالاسىنا, جاڭادان قۇرىلعان ۇلىتاۋ وبلىسىنا ەل پرەزيدەنتى بارعان كەزدە قاۋىپسىزدىكتى كۇشەيتۋگە جۇمىلدىرىلعان بولىمشە قۇرامىندا بولدىم. ۇلتتىق ۇلانداعى قىزمەت وتە قىزىقتى, كۇندەلىكتى قىزمەتتەن باسقا, مەملەكەتتىك جانە حالىقارالىق ءىس-شارالار بارىسىندا قوعامدىق ءتارتىپتى ساقتاۋعا ۇلەس قوساتىنىمدى ماقتان تۇتامىن», دەيدى 5451 اسكەري ءبولىمىنىڭ قاتارداعى ساربازى دياس قايىرباەۆ.
ريم پاپاسى فرانتسيسكتىڭ, سونداي-اق الىس جانە جاقىن شەتەل دەلەگاتسياسىنىڭ قاتىسۋىمەن وتكەن الەمدىك جانە ءداستۇرلى دىندەر كوشباسشىلارىنىڭ VII سەزى كەزىندە قۇقىقتىق ءتارتىپ اسكەرىنە ماڭىزدى مىندەتتەر جۇكتەلدى. سونداي-اق ۇلاندىقتارعا قازاقستانداعى ۆاتيكان قاسيەتتى تاعىنىڭ ەلشىلىگىن قورعاۋ مىندەتى جۇكتەلگەن.