الەمدىك جانە ءداستۇرلى دىندەر كوشباسشىلارى VII سەزىنىڭ جابىلۋ ءراسىمىنىڭ الدىندا قورىتىندى دەكلاراتسيا جاريالاندى, دەپ حابارلايدى Egemen.kz پرەزيدەنتتىڭ ءباسپاسوز قىزمەتىنە سىلتەمە جاساپ.
قاسىم-جومارت توقاەۆ فورۋمنىڭ ەكى كۇندىك جۇمىسىن قورىتىندىلاي كەلە, قازاق جەرى وسى كۇندەرى ءتۇرلى مادەنيەتتەردىڭ سىندارلى سۇحبات ورتالىعىنا اينالعانىن اتاپ ءوتتى. دۇنيەجۇزىنىڭ بەدەلدى ءدىنباسىلارى وسى جەردە ءبىر شاڭىراقتىڭ استىنا جينالدى.
– شىن مانىندە, ءبارىمىزدىڭ ماقساتىمىز – ءبىر. بۇل – وركەنيەتتەر ۇندەستىگىن ورناتۋ جانە بەيبىتشىلىك پەن تۇراقتىلىقتى نىعايتۋ. سەزدە كوپتەگەن سالماقتى وي, ساليقالى پىكىر ايتىلدى. ونىڭ ءبارى ءبىزدىڭ ۇيلەسىمدى الەم قۇرۋ جولىنداعى ءىس-ارەكەتىمىزگە وڭ ىقپالىن تيگىزەدى دەپ سانايمىن. ءبىزدىڭ باستامامىزعا قولداۋ كورسەتىپ, سەزگە ارنايى كەلگەن ءدىني كوشباسشىلارعا, ساياساتكەرلەر مەن حالىقارالىق ۇيىم وكىلدەرىنە العىس ايتامىن. سونداي-اق فورۋمدى وتكىزۋگە بەلسەنە اتسالىسقان ديپلوماتتارعا, ۆولونتەرلەرگە, جۋرناليستەر مەن باسقا دا ازاماتتارعا ريزاشىلىعىمدى بىلدىرەمىن, – دەدى مەملەكەت باسشىسى.
پرەزيدەنت قازاقستان حالقىنىڭ جانە جەكە ءوزىنىڭ اتىنان ريم پاپاسى فرانتسيسككە ەلىمىزگە تاريحي ساپار جاساپ, سەزد جۇمىسىنا قاتىسقانى ءۇشىن تاعى دا ريزاشىلىعىن ءبىلدىردى.
– ءسىزدىڭ الەمدىك قوعامداستىققا ۇندەۋىڭىز بۇكىل الەمدەگى ميلليونداعان ادامدارعا ءۇمىت پەن سەنىم سىيلادى, – دەدى مەملەكەت باسشىسى.
قازاقستان پرەزيدەنتى ەكونوميكالىق ءوسىم مەن رۋحاني-ادامگەرشىلىك دامۋدىڭ اراسىنداعى تەڭدىككە قول جەتكىزۋ جولدارىن قاراستىرۋ ءالى دە وزەكتى ەكەنىن اتاپ ءوتتى.
– دىندەر كوشباسشىلارى رۋحاني جانە تەحنولوگيالىق دامۋدى ۇيلەسىمدى ۇشتاستىرۋ قاجەت ەكەنىن دالەلدەي الاتىنىنا سەنىمدىمىن, – دەدى پرەزيدەنت.
قاسىم-جومارت توقاەۆ رۋحاني كوشباسشىلاردىڭ بەدەلى بۇكىل ادامزاتتىڭ يگىلىگى ءۇشىن قازىرگى الەمدەگى قايشىلىقتاردى ەڭسەرۋگە سەپتىگىن تيگىزەتىنىنە سەنىمدى. مەملەكەت باسشىسى سەزدىڭ قورىتىندى قۇجاتىنا ەرەكشە نازار اۋداردى. پرەزيدەنت فورۋم قورىتىندىسى بويىنشا بۇگىن مازمۇندى ءارى جان-جاقتى پىسىقتالعان دەكلاراتسيا قابىلداناتىنىن جەتكىزدى. ونىڭ ايتۋىنشا, بۇل ماڭىزدى كونتسەپتۋالدى قۇجات ىرگەلى ماسەلەلەردى قامتيدى جانە ۇكىمەتتەرگە, ساياسي كوشباسشىلارعا, حالىقارالىق ۇيىمدارعا باعدار بەرە الادى.
– ءبىزدىڭ ورتاق مىندەتىمىز – دەكلاراتسيانىڭ كونتسەپتۋالدى ەرەجەلەرى مەن يدەيالارىن دايەكتى تۇردە ىلگەرىلەتۋ. سونىمەن قاتار الەمدىك جانە ءداستۇرلى دىندەر كوشباسشىلارى سەزىن دامىتۋدىڭ 2023-2033 جىلدارعا ارنالعان تۇجىرىمداماسىن ازىرلەۋ قاجەت. قۇجاتتا ءبىزدىڭ فورۋمنىڭ ىقپالىن ودان ءارى كۇشەيتۋدىڭ ناقتى قادامدارى مەن كەزەڭدەرى قامتىلۋى كەرەك, – دەدى مەملەكەت باسشىسى.
قاسىم-جومارت توقاەۆ ءسوزىن قورىتىندىلاي كەلە, قازاقستان ءوزىنىڭ ىشكى جانە سىرتقى ساياساتىنىڭ باسىمدىقتارىنا سايكەس, سەزدىڭ دايەكتى قىزمەتىن تولىقتاي قولدايتىنىن اتاپ ءوتتى.