بەينەۋلىك ءمۇسىنشى بولاتبەكتىڭ قيالىندا سۇلباسى قالانىپ, قولىمەن سومدالعان مۇسىندەرگە قاراپ, ەلىمىزدىڭ ەسكەرتكىش, ءمۇسىن ونەرىنە سونى لەپ, جاڭا ءتۇر, قانىق وي مەن يدەيا كەلگەندەي سەزىندىك.
1991 جىلى جازدا بەينەۋدە ومىرگە كەلگەن بولاتبەكتىڭ ونەرگە قىزىعۋشىلىعى ءۇش جاسىنان بەلگىلى بولعان. سول كەزدە-اق بالشىقتان جانۋارلار ءمۇسىنىن جاساپ, مايلى بوياۋمەن كارتينالار سالا باستاعان بولاتبەكتىڭ بويىنداعى شەبەرلىك, ونەرپازدىق سۋرەت سالۋعا قۇشتار اتا-اناسىنان دارىعان بولۋى كەرەك. و.تاڭسىقباەۆ اتىنداعى الماتى كوركەمسۋرەت ۋچيليششەسىن ءبىتىرىپ, 2011 جىلى استانا قالاسىنداعى قازاق ۇلتتىق ونەر ۋنيۆەرسيتەتىنەن ءمۇسىنشى ماماندىعىن مەڭگەرىپ شىققان جاس جىگىت اتالعان وقۋ ورنىنان ونەرتانۋ عىلىمدارىنىڭ ماگيسترى دارەجەسىن الادى. گيپستەن, اعاشتان, شىنى پلاستيكتەن جانە قولادان مۇسىندەر سومدايتىن ونىڭ ونەرىنە قىزىعۋشىلىقپەن قاراپ, تاپسىرىس بەرەتىندەر دە از ەمەس. بۇگىندە 40-تان استام ەڭبەكتىڭ بىرىنە اۆتور, بىرىنە قاتىسۋشى, بىرىنە ورىنداۋشى بولعان بولاتبەك سالاەۆتىڭ تۋىندىلارى ەلىمىزدىڭ ءبىراز قالاسىندا بوي كوتەرىپ كەلەدى.
– ءوز قيالىمنان تۋىنداعان دۇنيەلەر – اۆتورلىق ەڭبەكتەر, ال كەي جاعدايلاردا جوباسىن سىزىپ نەمەسە شاعىن ءمۇسىندى جاساپ كەلىپ ۇسىناتىندار بولادى, وعان ءوز يدەيالارىمدى قوسا وتىرىپ ولاردىڭ ۇسىنىسىن ورىندايمىن, بۇل – ورىنداۋشىلىق ەڭبەك. ال ءزاۋلىم ەسكەرتكىشتەردى تۇرعىزۋعا بىرنەشە ادام قاتارىندا قاتىسۋشى بولىپ اتسالىسامىن, – دەيدى بولاتبەك.
ول وسكەمەن قالاسىنداعى بيىكتىگى 7 مەترلىك قولادان سوعىلعان «قاراتاي باتىر» ەسكەرتكىشىن سالۋعا قاتىسسا, باتىس قازاقستان وبلىسىندا «قادىر مىرزا ءالي», قىرعىزستاندا «اباي قۇنانباەۆ», استاناداعى قازاق اكادەميالىق دراما تەاترىنىڭ «الپامىس باتىر» ەسكەرتكىشتەرىن سالۋدا ورىنداۋشىلىق قىزمەتىن اتقارعان. بۇلاردان باسقا قوستاناي قالاسىناداعى «فەميدا» قولا ءمۇسىنى مەن «كامشات دونەنباەۆا» قولا ءبيۋستىنىڭ, تاتارستانداعى قولادان «تايقازان», الماتى وبلىسىنا وتەگەن باتىر, اتىراۋ قالاسىنا ء«ۇش بي», قىزىلوردا وبلىسىندا «روزا باعلانوۆا» ەسكەرتكىشتەرىنىڭ ورىنداۋشىسى بولسا, ماڭعىستاۋ وبلىسىنىڭ بەينەۋ اۋدانىندا جانە تاراز قالاسىندا «اناعا تاعزىم», شىعىس قازاقستان وبلىسىندا «اباي قۇنانباەۆ» ەسكەرتكىشتەرىنىڭ, ماڭعىستاۋ وبلىسىنداعى باۋتين سەلوسىندا «بالىقشىلار» ءمۇسىنىنىڭ, ەلورداداعى «دۋلىعا», «كيىز ءۇي» كونسترۋكتسيالارىنىڭ, «يۋنۋس ەمرە» ەسكەرتكىشىنىڭ, پەتروپاۆل قالاسىنداعى «جامبىل جاباەۆ» ەسكەرتكىشىنىڭ اۆتورى. سونداي-اق اقتاۋ قالاسىندا تەڭىز جاعاسىنا پلاستيك, بەتوننان پاركتىك مۇسىندەر توپتاماسىن جاساپ, ل.ن.گۋميلەۆ اتىنداعى ەۋرازيا ۋنيۆەرسيتەتىنىڭ مۇراجايىندا گيپستەن اۆتورلىق «بولاشاق دانىشپان» اتتى ءمۇسىندى سومدادى جانە قوستاناي قالاسىنداعى ەكىنشى دۇنيەجۇزىلىك سوعىس ارداگەرلەرىنە ارنالعان 40 ءبيۋستىڭ اۆتورلارىنىڭ ءبىرى.
الدىنا ۇلكەن ماقساتتار قويعان بولاتبەكتىڭ ەڭبەگىنە حالىق جوعارى باعا بەرۋدە. ويى تەرەڭ, قيالى جۇيرىك, شىنايى شەبەردىڭ تۋىندىلارىنا قاراپ ءمۇسىن ونەرىندە باتىردى جالاڭ قاۋقيتىپ, جىراۋدى دومبىرامەن قونجيتىپ, اقىن-جازۋشىنى ۇستەلگە تاڭىپ جاساي سالاتىن قارادۇرسىن يدەيا اۋىلىنان الىستادىق دەپ قۋانۋعا بولاتىنداي. بولاتبەك قولتاڭبالارىنداعى قازاقىلىققا ءتان قۇنارلى بوياۋ, شىنايى كورىنىس, تاريحي دەرەك, ماحاببات, سەزىم مەن دارىندىلىق, سونداي-اق ويلانۋ, تولعانۋ, شابىتتانۋ, شامىرقانۋ, ارقالانۋ ءتارىزدى كوڭىل كۇي ساتتەرى ءبىر-بىرىمەن توعىسقان تۇتاستىق كوزگە ۇرىپ, كوڭىلگە قونا كەتەدى.
بولاتبەكتىڭ ونەرگە قۇشتارلىعىن وياتقان اكەسى ەركەباي سالاەۆ جەكە كاسىپكەر بولسا, اناسى باقتىگۇل اقمىرزاەۆا «قازاقستان تەمىر جولى» كومپانياسىندا قىزمەت اتقارادى. جۇبايى «ناز» بي تەاترىنىڭ بالەت ءارتىسى قۇرالاي ەكەۋىنىڭ وتباسىندا ابدۋراحمان مەن بەيبارىس اتتى ورەندەر ءوسىپ كەلەدى.
ءوز ىسىنە قىزىعۋشىلىقپەن, جاۋاپكەرشىلىكپەن قارايتىن بولاتبەك سىندى جاس مۇسىنشىلەر ەلىمىزدىڭ ەسكەرتكىش سالاسىنداعى جاڭا بەينەسىن قالىپتاستىرادى دەپ سەنەمىز.
ماڭعىستاۋ وبلىسى