پروكۋراتۋرا ورگاندارىنىڭ باستى باعىتتارىنىڭ ءبىرى – بيزنەستى قورعاۋ ەكەنى بەلگىلى. اسىرەسە قىلمىستىق پروتسەسس كەزىندە كاسىپكەرلەردىڭ قۇقىقتارىن قورعاۋ ۇلكەن مانگە يە. سەبەبى ءسال وسى ساتىدا كاسىپكەرلەر ەڭ كوپ قىسىمعا تاپ بولىپ جاتاتىنى جۇرتقا بەلگىلى. تەرگەۋ بارىسىندا ولاردىڭ م ۇلىكتەرىنە تىيىم سالىنعانى بىلاي تۇرسىن, ءتىنتۋ, جاۋاپ الۋ, قۇجاتتاردى الۋ سىندى ارەكەتتەر دە جۇرگىزىلەدى.
باس پروكۋراتۋرا ۇسىنعان رەسمي دەرەكتەرگە سۇيەنسەك, وتكەن جىلدان بەرى ەلىمىزدە كاسىپكەرلەرگە قاتىستى قوزعالعان 1,5 مىڭعا جۋىق قىلمىستىق ءىس توقتاتىلعان ەكەن. ال قىلمىستىق ءىس كەزىندە ولاردىڭ كەڭسەلەرىندە 2 مىڭ ءتىنتۋ مەن الۋ جۇرگىزىلىپ, 60 كاسىپكەردىڭ مۇلكى تاركىلەنگەن.
پروكۋرورلار جەكەلەگەن تەرگەۋ ورگاندارىنىڭ, ياعني تەرگەۋشىلەردىڭ قورىتىندىلارى نەگىزىندە بيزنەسكە قارسى ءىس قوزعاۋ پراكتيكاسىنىڭ كەڭىنەن قولدانعانىن انىقتاپ وتىر. سونىڭ سالدارىنان قىلمىستىق وربيتاعا جۇزدەگەن كاسىپكەر تارتىلعان.
بۇل رەتتە مامانداردىڭ تۇجىرىمدارى جەتكىلىكتى مالىمەتتەرمەن بەكىتىلمەگەنىن جانە دە سوت ساراپشىلارى تاراپىنان ءجيى تەرىسكە شىعارىلعانىن دا ايتا كەتكەن ءجون. وسىعان بايلانىستى, ادال بيزنەستى قىلمىستىق وربيتاعا تارتۋ فاكتىلەرىن ازايتۋ ماقساتىندا باس پروكۋراتۋرا قىلمىستىق قۋدالاۋ ورگاندارىنىڭ زاڭسىز ءىس-ارەكەتتەرى مەن شەشىمدەرىنىڭ جولىنا جەدەل توسقاۋىل قويۋ ءۇشىن قوسىمشا شارالار ازىرلەدى.
اتاپ ايتقاندا, باس پروكۋرور بەرىك اسىلوۆ بارلىق قىلمىستىق قۋدالاۋ ورگاندارىنا كاسىپكەرلىك سۋبەكتىلەرىنە قاتىستى سوتقا دەيىنگى تەرگەپ-تەكسەرۋلەردى تىركەۋ ءتارتىبىن قاتاڭ رەگلامەنتتەيتىن نۇسقاۋ جولدادى. نۇسقاۋعا سايكەس ەندى ازاماتتىق-قۇقىقتىق سيپاتتاعى ارىزدار مەن حابارلامالاردى سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىندە (سدتبت) تىركەۋگە تىكەلەي تىيىم سالىندى.
جاڭا تالاپ رەتىندە تەكسەرىس, رەۆيزيا نەمەسە اۋديت اكتىلەرىنە شاعىم جاساۋ مەرزىمدەرىنىڭ قولدانىلۋ كەزەڭىندە كاسىپكەرلىك سۋبەكتىسىنە قاتىستى سوتقا دەيىنگى تەرگەپ-تەكسەرۋدى تىركەۋگە تىيىم سالۋ قاعيداتى ەنگىزىلدى. سونداي-اق كاسىپكەردىڭ قاراجاتتى ۇنەمدەۋ ناتيجەسىندە پايدا تابۋ فاكتىلەرى, ەگەر بۇل ورىندالعان جۇمىستىڭ ساپاسىنا تەرىس اسەر ەتپەسە, تەرگەپ-تەكسەرۋگە جاتپايدى. بۇل ءبىرىنشى كەزەكتە مەملەكەتتىك ساتىپ الۋ جانە كۆازيمەملەكەتتىك كومپانيالاردىڭ تەندەرلەرى بويىنشا جۇمىستارعا قاتىستى.
سونداي-اق قىلمىستىق قۋدالاۋ ورگاندارىنا كريميناليست مامانداردىڭ رەسمي قورىتىندىلارىن تەرگەۋدى باستاۋعا نەگىز رەتىندە پايدالانباۋ تاپسىرىلدى. مۇنداي جاعدايلاردا كەلتىرىلگەن زالال تۋرالى مالىمەتتەر قىلمىستىق قۋدالاۋ ورگاندارىنا راستاۋشى قۇجاتتارعا نەگىزدەلگەن جانە بۇزىلعان قۇقىقتىڭ نورمالارىن كورسەتەتىن مەملەكەتتىك ورگاندار ماماندارىنىڭ قورىتىندىلارىمەن بەكىتىلۋگە ءتيىس.
پروكۋرورلارعا ءبىر تاۋلىك ىشىندە ءاربىر قىلمىستىق ءىس بويىنشا سوتقا دەيىنگى تەرگەپ-تەكسەرۋدىڭ باستالۋىنىڭ زاڭدىلىعىن تەكسەرۋ جانە وسى كەزەڭدە بۇزۋشىلىقتار انىقتالعان كەزدە قىلمىستىق قۋدالاۋدى دەرەۋ توقتاتۋ تاپسىرىلدى. بۇدان بولەك, پروكۋرورلار تۇراقتى تۇردە بيزنەس سۋبەكتىسىنە قاتىستى جاسىرىن تەرگەۋ ارەكەتتەرىنە باستاماشىلىق جاساۋدىڭ جانە ولاردى جۇرگىزۋدىڭ, سونداي-اق م ۇلىككە بيلىك ەتۋگە ۋاقىتشا شەكتەۋلەر قويۋدىڭ نەگىزدىلىگىن دەرەۋ تەكسەرۋگە مىندەتتى.
ەگەر زاڭدىلىقتىڭ بۇزىلعانى انىقتالسا, پروكۋرورلار زاڭسىز شەشىمدەردىڭ كۇشىن جويۋدان باسقا, بارلىق كىنالى لاۋازىمدى تۇلعالاردى قىلمىستىق جاۋاپكەرشىلىككە تارتۋ تۋرالى دا ماسەلە قويا الادى.