جاۋاپتى كەزەڭدە ەلدىك بىرلىك-بەرەكەگە قاتىستى سىندارلى پىكىر ايتىپ, ءجون-جوبا ايقىنداۋدىڭ قوعامدىق سالماعى ەرەكشە. مەملەكەت باسشىسى 1 قىركۇيەكتەگى جولداۋىندا: «جۇرت بوس سوزدەن, جارقىن بولاشاق تۋرالى جالىندى ۇرانداردان جالىقتى. حالىق مەملەكەتتىك ورگانداردىڭ ءوز ۋادەسىن قاعاز بەتىندە ەمەس, ءىس جۇزىندە ورىنداعانىن قالايدى», دەدى.
بۇل سىن – دەلسال كۇيدەگى قوعامنىڭ ۇستىنە مۇزداي سۋ قۇيىپ جىبەرۋمەن ءبىر ەسەپ. بوس ءسوز بەن جالىندى ۇران – كەشەگى, ءتىپتى ەرىنبەگەننىڭ ءبارى مىنەۋگە بەيىم قىرمىزى-قىزىل ءداۋىرىمىزدىڭ شىندىعى ەدى. مۇنىڭ سەبەبىن, احمەت بايتۇرسىن ۇلى پايىمداعانداي, «جاقسى نارسەنىڭ جولعا شىعۋى – جامان نارسەدەن قيىنىراق» دەپ تۇسىندىرەمىز. بۇگىنگى جاقسى نارسە – ادىلەتتى مەملەكەت, ءبىرتۇتاس ۇلت, بەرەكەلى قوعام. بۇل – ۋتوپيا ەمەس, تىرىسسا, باس بىرىكتىرسە, تىزە قوسسا, وقۋ-توقۋى بار, قيىندىقتان ساباق العان كەز كەلگەن قوعام قول جەتكىزە الاتىن يگىلىك.
ءيا, پرەزيدەنت شەگەلەپ ايتتى: «ەكونوميكالىق ساياساتىمىزدىڭ نەگىزگى ماقساتى ەش وزگەرمەيدى. ونىڭ ءمانى – ساپالىق جانە ينكليۋزيۆتىك تۇرعىدان حالىقتىڭ ءال-اۋقاتىن ارتتىرۋ». جۇيەلى ءىس-شارا مەن قوعامنىڭ بار جىگىن يكەمدى سەرپىلتۋگە باعىتتالعان جوبالاردىڭ ءمانى قابىلدانۋىمەن ەمەس, ناتيجەسىمەن ولشەنەدى. جولداۋداعى بەس باعداردان وسى نيەتتىڭ, ۇستانىمنىڭ وزەگىن اڭعارامىز.
بىزدىڭشە, حالىق قاي كەزدە دە ءىستىڭ كوزىن بىلەتىن, ماسەلەنىڭ ءمانىسىن جاتىق ءتۇسىندىرىپ بەرە الاتىن ازاماتتاردى اڭسايدى. مۇنداي جاۋاپتى تۇلعالار قالادا دا, دالادا دا, ەلوردادا دا, وڭىرلەردە دە جەتىپ ارتىلادى.
بۇقارالىق اقپارات قۇرالدارىنىڭ اسىل مىندەتى دە – بيلىك پەن قوعام اراسىنداعى ارىپتەستىكتى, ۇيلەسىمدى قالىپتاستىرۋ مەن جەتىلدىرۋ. بۇل قازاقستان تاجىريبەسىندە كەزەڭ-كەزەڭىمەن جۇزەگە اسىپ كەلەدى.
ادىلەتتى مەملەكەت, ءبىرتۇتاس ۇلت, بەرەكەلى قوعام تۋرالى پىكىر, وي ايتۋدا دا جالىندى ۇران قاجەت ەمەس ەكەنى بەسەنەدەن بەلگىلى. بۇل – ءباسپاسوز بەن قوعامدىق ۇيىم الاڭدارىنا جۇكتەلەتىن جاۋاپتى مىندەت.
الەۋمەتتىك-ەكونوميكالىق قيىندىقتار تۇسىندا كوڭىلى الاڭ حالىق سەنىم مەن تياناق تابا الماي قينالادى. بۇگىنگە جانە بولاشاققا دەگەن سەنىم مەن تياناق قايدان كەلەدى؟ سىلدىر سوزبەن, جاتتاندى دەرەكپەن كەلمەسى اقيقات. سوندىقتان جۇرتشىلىق قاي ورتادا بولسىن, از نارسەدەن بولسىن ناتيجە شىعارعان ادامداردىڭ اۋزىنا قارايدى. ءۇمىت, سەنىم جاقسىلىققا باستايدى.
شىنايى اقپارات, بايىپتى تالداۋ, زەردەلى تۇجىرىمداما, ساليقالى قورىتىندى – بۇگىنگى باق-تىڭ الىپپەسى. ارينە, الىپپەنى اتتاپ كەتكەندەر ساۋاتتىلارعا ىلەسە الماي قالادى.
ادىلەتتى مەملەكەت, ءبىرتۇتاس ۇلت, بەرەكەلى قوعام قايناۋىن دا, تولعامىن دا, كۇيىنىشى مەن ءسۇيىنىشىن دە جەتكىزەتىن – اقپارات قۇرالدارى. سوڭعى جىلدارى «وتانشىلدىق» دەي تۇرىپ – مەملەكەتشىلدىكتىڭ, «ۇلت» دەي تۇرىپ –ەلشىلدىكتىڭ ءمانىن تۇسىنبەگەن, مازمۇنىن سىڭىرمەگەن وتانداستار پايدا بولعانىن جاسىرا المايمىز. ارينە, بۇل ءۇشىن وزىمىزدەن باسقا ەشكىمدى جازعىرمايمىز. مىندەت – وسىنى اقىلمەن تۇزەتۋ. بۇل تۋرالى پرەزيدەنت ۇلىتاۋدا وتكەن ۇلتتىق قۇرىلتايدا جەتەگە جەتكىزەتىندەي ەتىپ ايتتى.
بىزدە كەم نەمەسە جەتىلدىرۋدى تالاپ ەتەتىن باسقا زارۋلىكتەر از ەمەس. الاش زيالىلارى مۇنى «ۇلتتىڭ جوعى» دەپتى. ءاليحان بوكەيحاننىڭ سوزىمەن تۇيىندەسەك, «ۇلتتىڭ جوعىن ۇيىقتاپ ءجۇرىپ ەمەس, وياۋ ءجۇرىپ ىزدەۋ كەرەك!».
ءبىز قوعام پىكىرىنىڭ, الەۋمەت پايىمىنىڭ, ازاماتتار تانىمىنىڭ ەلشىل, وتانشىل بولۋى ءۇشىن قىزمەت ەتۋىمىز كەرەك. قالام قۋاتىنان قاراپايىم ەڭبەگىمىزگە دەيىن, ازاماتتىق بەلسەندىلىكتەن كۇندەلىكتى تۇرمىس-تىرشىلىككە دەيىن وسىعان باعىتتالۋى قاجەت. باق-تىڭ مادەني-ينتەللەكتۋالدىق, رۋحاني-اعارتۋشىلىق ميسسياسى – وسىندا. ءبىز مەرەيتويلىق اسىرە ماقتاۋلاردان, «جىلت ەتكەندى جارق ەتكىزەتىن» وتشاشۋلاردان گورى ادامنىڭ جانىن, سەزىمىن باۋرايتىن, جۇرەك كوزىن اشاتىن ءىس-شارالارعا ىنتىق بولعانىمىز ءجون. بيلىك پەن قوعامنىڭ شىنايى ارىپتەستىگى – بىلمەگەنىن بىرەۋ جازىپ بەرگەن ماتەريال نەگىزىندە ايتۋ ەمەس, بىلەتىنگە, ياكي مامانعا مىنبەر بەرۋدە. ۇلت جاۋاپكەرشىلىگى, ەل مۇددەسى وسىنداي كاسىبيلىكتەن باستالادى.
اقپارات سالاسىنا كەلسەك, قازىر بار جەردى جاۋلاپ العان «ويىن-ساۋىق باعدارلامالارىنىڭ» وزىندە ويسىز ىرقىل-جىرقىل ەمەس, ويلى ءازىل, اششى ساتيرا, ءماندى پاروديا, استارلى شارج بولۋى كەرەك. ايتپەسە شەت جۇرتتان جالاڭ كوشىرۋ ۇلت ساپاسىن, تالعامىن وشىرۋگە اپارىپ سوعادى. ا.بايتۇرسىن ۇلى ءدال اڭعارعانداي, «دۇرىستىق-بۇرىستىقتى بىلمەگەن جۇرت ازادى». ءبىز قالىپتاسپاعان جاس بۋىن تۋرالى ايتىپ وتىرمىز.
قازىر مەملەكەتتىك, قوعامدىق, جەكەمەنشىك مارتەبەدەگى باق-تىڭ ورتاق ىمىراعا كەلەتىن كەزەڭى. ول ىمىرانىڭ اتى – ەل تاعدىرى, ءاربىرىمىزدىڭ بولاشاعىمىز. زاتى – ادىلەتتى مەملەكەت, ءبىرتۇتاس ۇلت, بەرەكەلى قوعام.