قازاقستاندىق قوعامدىق دامۋ ينستيتۋتىنىڭ الاڭىندا Sarap كلۋبىنىڭ «جولداۋ-2022: ەكسپەرتتىك پىكىر» اتتى وتىرىسى ءوتتى. «قازاقستاندىق قوعامدىق دامۋ ينستيتۋتى» كەاق-تىڭ ۇيىتقى بولۋىمەن وتكەن وتىرىسقا قوعامدىق بىرلەستىكتەردىڭ باسشىلارى, ساياساتتانۋشىلار, ققدي ساراپشىلارى قاتىسىپ, ەلىمىزدە قوردالانعان ماسەلەلەردى شەشۋ جولدارىن تالقىلادى.
وتىرىستا تالقىلانعان نەگىزگى تاقىرىپ – پرەزيدەنت ق.توقاەۆتىڭ قازاقستان حالقىنا جولداۋىندا ۇسىنعان, ەلىمىزدە قوردالانعان ماسەلەلەردى شەشۋ جولدارى, حالىقتىڭ ءال-اۋقاتىن ودان ءارى ارتتىرۋعا باعىتتالعان, مەملەكەتتى ودان ءارى جاڭعىرتۋ جونىندەگى الەۋمەتتىك قولداۋ شارالارىنا قاتىستى جاڭا مىندەتتەر.
ءىس-شارا ينستيتۋتتىڭ باعدارلاما جوبالارى باسقارماسىنىڭ اناليتيك-مەنەدجەرى ولجاس بەيسەنباەۆ پەن ستراتەگيالىق تالداۋ توبىنىڭ جەتەكشىسى ءلازات نۇرقاتوۆانىڭ مودەراتورلىعىمەن ءوتتى.
«قازىرگىدەي كۇردەلى گەوساياسي جاعدايدا مەملەكەتتىڭ ىشكى ساياسي رەفورمالارىنىڭ ورنىقتىلىعى وتە ماڭىزدى ماسەلە. پرەزيدەنت جولداۋىنداعى جاڭا ساياسي پراكتيكا, جاڭا ساياسي ءداستۇر – «جاريالىلىق» پرينتسيپىنە ۇلكەن كوڭىل ءبولىپ وتىر. زەرتتەۋشىلەردىڭ جاز ايلارىندا جۇرگىزگەن زەرتتەۋلەرىنە سۇيەنسەك, قازىر قوعامدا الەۋمەتتىك-ەكونوميكالىق ماسەلەلەر باسىم. جولداۋدا دا مەملەكەت باسشىسىنىڭ وسى باعىتتارعا ەرەكشە نازار اۋدارعانىن كورىپ وتىرمىز», دەگەن ولجاس بەيسەنباەۆ وتىرىستان ۇتىمدى پىكىرلەر مەن ماڭىزدى ۇسىنىستار كۇتەتىندىگىن ايتتى.
جيىندا ءسوز العان ەۋروپالىق قۇقىق جانە ادام قۇقىقتارى ينستيتۋتىنىڭ ديرەكتورى مارات باشيموۆ مەملەكەتتىك اپپاراتتىڭ جۇمىسىنا توقتالىپ, جولداۋدىڭ ادىلەتتى قازاقستان قۇرۋعا نەگىزدەلگەنىن العا تارتتى. «ەڭ ءبىرىنشى, جەر ماسەلەسىن قاراستىرۋ كەرەك. مەملەكەت بايلىعىنىڭ يەسى حالىق بولعاندىقتان, سول جەردەن شىعاتىن مۇناي مەن گازدىڭ پايداسىن حالىق كورمەي وتىرعانى ادىلەتسىزدىك. ەكىنشى ۇلكەن ماسەلە – قۇقىق سالاسى. وسى سالاداعى ءتۇرلى ادىلەتسىزدىكتەردىڭ سالدارىنان جەمقورلىق كوپ, ال قۇقىق سالاسىندا ادىلەتتىلىك ورناماي ەلدىڭ دامۋى دا جاقسارمايدى», دەدى ساراپشى.
ال ساياساتتانۋشى ءادىل سايلاۋبەك «جايلى مەكتەپ» ۇلتتىق جوباسىنىڭ ءبىلىم سالاسىندا قىزمەت ىستەيتىندەر ءۇشىن قۋانىشتى جاڭالىق بولعانىن ايتتى. ء«ار وقۋشىنىڭ جايلى جاعدايدا ءبىلىم الۋى ءبىز ءۇشىن ماڭىزدى. ەندىگى كەزەكتە وسى جوبانى, جالپى ءبىلىم سالاسىنا قاتىستى وزگەرىستەردىڭ بارلىعىن ىسكە اسىرۋ ءسىز بەن ءبىزدىڭ قولىمىزدا», دەپ مەملەكەتتىڭ ۇزاقمەرزىمدى دامۋىنداعى ەڭ پەرسپەكتيۆالى باعىتى – ءبىلىم سالاسى تۋرالى ءسوز قوزعادى ءا.سايلاۋبەك.
پرەزيدەنت جانىنداعى قازاقستان ستراتەگيالىق زەرتتەۋلەر ينستيتۋتىنىڭ جەتەكشى عىلىمي قىزمەتكەرى مۇحيت اسانباەۆ جولداۋدا ايتىلعان باعىتتاردىڭ دۇرىستىعىنا توقتالىپ, قوعامداعى پىكىرتالاستىڭ بولۋى ساياسي مادەنيەتتىڭ قالىپتاسقانىن كورسەتەتىندىگىن ايتسا, ءلازات نۇرقاتوۆا ءاربىر ازامات مەملەكەت دامۋىنداعى ءوز جاۋاپكەرشىلىگىن سەزىنىپ, سول جاۋاپكەرشىلىككە ساي ارەكەت ەتسە ەل دامۋىندا وڭ وزگەرىستەر بولاتىندىعىنا سەنىم ءبىلدىردى.
Amanat پارتياسى قوعامدىق ساياسات ينستيتۋتىنىڭ باس ساراپشىسى ەرلان احمەدي «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» فورمۋلاسىن تولىققاندى ىسكە اسىرۋدىڭ ماڭىزدىلىعىنا توقتالدى.
«مەملەكەتتىك قىزمەت جۇيەسى – قانشا رەفورمالاساق تا ءبىر جۇيەگە كەلمەي جاتقان كۇردەلى بيۋروكراتيالىق اپپارات. ەكونوميكانى رەفورمالاۋ ءۇشىن بىزگە كاسىبي مەملەكەتتىك قىزمەت جۇيەسى كەرەك. مەملەكەتتىك باسقارۋ سالاسىنا دا باسەكەلەستىك قاجەت», دەدى «قازاقستاندىق قوعامدىق دامۋ ينستيتۋتى» كەاق ساراپشىسى ەلدوس جۇماعۇلوۆ.