كۇننىڭ اپتاپ ىستىعى ءالى دە باسىلماي تۇرعان تۇركىستان وبلىسىندا جاز بويى دالا ءورتىنىڭ ورىن الۋ جوعارى قاۋپى ساقتالدى. كۇزدىڭ العاشقى كۇندەرى دە بۇل قاۋىپ سەيىلمەي تۇر. جۋىردا وبلىستا 10 گەكتار جەردە قۇرعاق ءشوپ پەن بۇتا ورتەندى. دالا ءورتى 8 ساعات ىشىندە ءسوندىرىلدى. ءتىلسىز جاۋمەن كۇرەسكە 70 ادام جانە 8 بىرلىك تەحنيكا جۇمىلدىرىلدى.
ماماندار ءورتتى ءسوندىرۋ بارىسىندا جايسىز مەتەوجاعداي كەدەرگى كەلتىرگەنىن ايتۋدا. جىلدامدىعى 25 م/س-تان اساتىن قاتتى جەل تۇرعاندىقتان, ءورت ۇلكەن اۋماققا تەز جايىلعان. قازا بولعاندار مەن زارداپ شەككەندەر جوق. وبلىس اۋماعىندا ءورت قاۋىپتى ايماقتاردا كەزەكشىلىك ۇيىمداستىرىلعان. جالپى, تۇركىستان وبلىسىندا جىل باسىنان بەرى 289 ءورت وقيعاسى بولعان. سالدارىنان 6 ادام قازا بولىپ, 5 ادام ءتۇرلى دەنە جاراقاتىمەن اۋرۋحاناعا جەتكىزىلگەن. جالپى, سوماسى
1 ملرد 63 ملن 838 مىڭ تەڭگە بولاتىن ماتەريالدىق شىعىن كەلگەن. ء«ورت شىققان ورىندار بويىنشا ەڭ جوعارى كورسەتكىش تۇرعىن ءۇي سەكتورىندا تىركەلىپ وتىر. وبلىس اۋماعىندا 184 ۇيدە ءورت بولعان, 53 كولىك ورتەنگەن. قالعان ورتتەر وندىرىستىك عيماراتتار مەن قۇرىلىستاردا, ءبىلىم بەرۋ مەكەمەلەرىنىڭ عيماراتتارى مەن اكىمشىلىك-قوعامدىق نىسانداردا بولعان. سونداي-اق اۋىل شارۋاشىلىعى, دەنساۋلىق ساقتاۋ وبەكتىلەرى مەن ساۋدا ورىندارىندا, تاۋار ساقتاۋ قويمالارىندا تىركەلدى», دەدى وڭىرلىك كوممۋنيكاتسيالار قىزمەتىندە وتكەن بريفينگتە توتەنشە جاعدايلار دەپارتامەنتى باستىعىنىڭ ورىنباسارى ەرىك سارىباەۆ.
ايتا كەتەلىك, جازدىڭ سوڭىندا جەتىسايداعى «كۇلپارشىن» بازارىنان ءورت شىعىپ, سالدارىنان 450-گە جۋىق كاسىپكەردىڭ زاتتارى تولىعىمەن جانىپ كەتكەن ەدى. ءورتتىڭ شىعۋ سەبەبىن انىقتاۋ ماقساتىندا جۇرگىزىلگەن تەكسەرۋ بارىسىندا زاڭ بۇزۋدىڭ 9 فاكتىسى انىقتالعان. وسىعان وراي جەتىساي اۋدانى پروكۋراتۋراسىنىڭ ۇسىنىسى بويىنشا بازار يەسىنە ەسكەرتۋ تۇرىندە اكىمشىلىك شارا قولدانىلدى. بۇگىندە «كۇلپارشىن» بازارى ءورت قالدىقتارىنان تازارتىلىپ, جاڭا نىساننىڭ قۇرىلىس جۇمىستارى جۇرگىزىلۋدە.
تۇركىستان وبلىسى