مەملەكەت مۇددەسى بارىنەن جوعارى. قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقاەۆتىڭ پارلامەنت پالاتالارىنىڭ بىرىككەن وتىرىسىندا جاريا ەتىلگەن قازاقستان حالقىنا جولداۋىنىڭ وزەگى وسى ءسوز بولدى.
ادىلەتتى مەملەكەت. ءبىرتۇتاس ۇلت. بەرەكەلى قوعام – بۇل ءبىز ءۇشىن قاستەرلى ۇشتاعان. ەلدىكتىڭ ۇشتاعانى. وسەر ەلدىڭ, وركەنىن كەڭگە جايار جۇرتتىڭ, قاپىسىز قوعامدىق دامۋدىڭ, ومىرشەڭ ۇلتتىق ۇستىن مەن ۇستانىمداردىڭ بەلگىسى. بۇگىنگى جولداۋدىڭ ساياسي سالماعىنىڭ باسىمدىعى, اۋقىمىنىڭ كەڭدىگى, ءمانى مەن ماعىناسىنىڭ تەرەڭدىگى دە وسى قاستەرلى ۇشتاعان – ءۇش ۇعىمنان انىق كورىندى. ادىلدىك قاعيداتى, بىرتۇتاستىق يدەياسى, بەرەكە بايلامى – ءبىزدىڭ بارىمىز دا, نارىمىز دا وسى. بۇلار بار جەردە – ءبىز بارمىز, ەڭسەسى بيىك, ەرتەڭى جارقىن, مۇراتى ناق, ماقساتى انىق حالىق بار. ءۇمىتسىز ۇلت, ارمانسىز ادام بولمايدى. مەملەكەتتىڭ ۇلى ءۇمىتى دە وسىندا.
بەرەكەلى قوعام – بەسىگىندە پەرزەنتى ۋىلدەگەن, قازانىندا اسى, داستارحانىندا نانى, قويماسىندا قورى, قوراسىندا مالى بار, تاتۋلىعىن تۋ ەتكەن, ىنتىماعى ىرىسقا ۇلاسقان, ءبىر اتانىڭ بالاسىنداي مامىلەلى دە ىمىرالى جۇرتتىڭ قوعامى ەمەس پە. مۇنداي قوعام ەڭ جاۋاپتى كەزەڭدە ەكىۇداي بولىپ جارىلىپ, بولىنۋگە ەمەس, بىرىگۋگە بەيىم, ءبىر تۋدىڭ استىندا تۇرۋعا ىنتالى. ءبىر ماقسات, ءبىر تىلەككە جۇمىلۋعا ق ۇلىقتى. وسىنداي قوعام عانا ءبىرتۇتاس ۇلتتىڭ, ءبىرتۇتاس ۇلتتىق مۇددەنىڭ جولىنا قىزمەت ەتەدى. ال وسى ەكىنىڭ ءبىرى بولماسا, ەكىنشىسى دە – تۇل. ءبىرتۇتاس ۇلت بەرەكەلى قوعام جاسايدى, بەرەكەلى قوعام ءبىرتۇتاس ۇلتقا اينالادى. ءبىرتۇتاس ۇلت قانا ادىلەتتى مەملەكەت قۇرا الادى. بىرىنە-ءبىرى بايلانعان, بىرىنە-ءبىرى اينالعان, ءبىرىنسىز ءبىرى جوق وسى ۇشتاعان – ءبىزدىڭ ۇلتتىق يدەيامىز.
پرەزيدەنت جولداۋىنداعى ۇشتاعان ۇعىم جانە ونىڭ جاقىن جىلدار بەدەرىندە جۇزەگە اسۋعا ءتيىس بەس باعدارى: جاڭا ەكونوميكالىق ساياسات, ناقتى سەكتوردى دامىتۋ, ەل بولاشاعىنا ارنالعان ستراتەگيالىق ينۆەستيتسيا, بارشاعا تەڭ مۇمكىندىك, ۇلتىڭ تابىسىن تەڭ ءبولۋ, مەملەكەتتىك باسقارۋ ءىسىن قايتا جاڭعىرتۋ, زاڭ ۇستەمدىگى – جاڭا قازاقستاندى قۇرۋ ءۇشىن جاسالعان جالپىۇلتتىق رەفەرەندۋمنان كەيىن ىسكە اسقان باتىل رەفورمالاردىڭ ساباقتى جالعاسى دەپ بىلەمىز. وسى رەفورمالار الەۋمەتتىڭ الەۋەتىن ارتتىرۋعا, ازاماتتىق قوعام مەن زاڭ ۇستەمدىگى سالتانات قۇراتىن ادىلەتتى قازاقستان قۇرۋعا ناقتى قادامدار بولدى.
پرەزيدەنت جولداۋىندا كوپشىلىكتىڭ كوكەيىندە كوپ ۋاقىتتان بەرى جۇرگەن كوپ ماسەلەنى قوزعادى. جاسىرىپ, جابا توقىماي تارقاتىپ ايتتى. حالىق يگىلىگى ءۇشىن يگەرىلمەگەن يەسى كوپ يەن جەردىڭ, سۇراۋى كوپ سۋدىڭ, ەكونوميكامىزدىڭ كۇرەتامىرى – جولدىڭ جايى ءسوز بولدى. رەفورمالار ەل ءومىرىنىڭ بىردە ءبىر قاجەتىنەن اينالىپ وتكەن جوق. تۇيتكىلدى ماسەلەلەر تاسادا قالمادى. ۇلتتىق بايلىقتى تەڭ ءبولۋ مەن بارشاعا بىردەي مۇمكىندىك بەرۋدەن باستاپ وتباسى ءومىرى, دەنساۋلىق ساقتاۋ, ءبىلىم بەرۋ, زەينەتاقى جۇيەسى مەن زەينەت جاسى, جەر قويناۋىن يگەرۋ, اگروونەركاسىپ, ءبارى-ءبارى قامتىلدى. جولداۋدان كەيىن ءار تاقىرىپ تالاپشىل ورتادا تالقىعا ءتۇستى. سوندا بايقاعانىمىز, ەلدى قۋانتقان ەڭ ماڭىزدى جاڭالىق – ەڭبەكاقىنى نارىقتىق جاعدايعا ساي ءوسىرۋ, ۇلتتىق قوردان ۇرپاققا بەرىلەر ەنشى, ءبىلىم الۋعا بەرىلەتىن جەڭىلدەتىلگەن نەسيە جانە ءبىر جىل ىشىندە ءجۇز مىڭ جاستى جۇمىسقا ورنالىستىرۋ بولدى. مۇنىڭ ءبارى دە ەل ىشىندە كوپتەن ايتىلىپ جۇرگەن كۇردەلى ماسەلەلەر ەدى. ەل پرەزيدەنتىنىڭ حالىق ۇنىنە قۇلاق اساتىن مەملەكەت تۇجىرىمداماسىنىڭ ناقتى جۇمىس ىستەپ تۇرعانىن حالىق سەزىنە باستادى. جولداۋدا مەملەكەت باسشىسى ەل بىرلىگى مەن ۇلت تۇتاستىعىن باسا ايتتى. وسى قۇندىلىق – ۇلتتىڭ بايلىعى, قوعامنىڭ قازىناسى.
قاسىرەتتى قاڭتار وقيعاسى ىشتەگى بىتەۋ جاراداي بولماۋعا ءتيىس. حالىقتى قۋانتقان تاعى ءبىر جايت – مەملەكەت باسشىسىنىڭ قاڭتار وقيعاسىنا قاتىسۋشىلارعا قاتىستى ءبىر رەتتىك راقىمشىلىق جاريالايتىندىعى. كەزدەيسوق قۇرباندار مەن ءوز كىناسىن تۇسىنگەن كوپ جاستىڭ بولاشاعىن قورعاۋ – مەيىرلى مەملەكەتتىڭ قامقورلىعى. دانا حالقىمىز «اداسقاننىڭ ايىبى جوق, اينالىپ ءۇيىرىن تاپقان سوڭ» دەيدى. ارانداپ قالعان ازاماتتارعا راقىمشىلىق جاساۋ – پاراساتتىلىق بەلگىسى دەپ تۇسىنەمىز.
ارينە, جولداۋدا ايتىلعان ەڭ باستى ماسەلە – پرەزيدەنت سايلاۋى. الدىڭعى جولداۋىندا مەملەكەت باسشىسى كوپ ارتىقشىلىقتان باس تارتقان ەدى. ەندى مەملەكەت باسشىسى پرەزيدەنت مانداتىن ۇزاقتىعى 7 جىلدىق ءبىر مەرزىممەن شەكتەۋدى ۇسىندى. بۇل, ءبىزدىڭ پايىمداۋىمىزشا, دەموكراتيانىڭ داڭعىل جولىنا جاسالعان ۇلكەن قادام.
ءبىز ءبارىمىز – وسى مەملەكەتتىڭ بولشەگىمىز. ادىلەتتى كەزەڭنىڭ جاڭا پاراعى اشىلعاندا سەرگەكتىك پەن جاۋاپكەرشىلىك تانىتۋىمىز كەرەك. وسكەن ەل, ورەلى جۇرت ەكەنىمىزدى كورسەتۋگە ءتيىسپىز. ويتكەنى ەل مەن جەردىڭ تاعدىرى, ۇلتتىڭ بولاشاعى – ءوز قولىمىزدا.