اۋماعى 2 500 شارشى مەتر بولاتىن بازاردا جۇما كۇنى تاڭعا جۋىق بولعان ءورت جەتىسايلىقتاردى ابىگەرگە سالدى. ناقتىراق ايتساق, ساعات 03:00-دە جەتىساي قالاسىنداعى «كۇلپارشىن» بازارىنىڭ اۋماعىندا اۋدانى 500 شارشى مەتر بولاتىن جەكە تۇرعان ءبىر قاباتتى عيماراتتا جانە اۋدانى 400 شارشى مەتر قالقانىڭ استىندا ورنالاسقان اۋماقتان ءورت شىقتى. ءورت تاڭعى ساعات 05:20-دا اۋىزدىقتالىپ, 07:35-تە ءسوندىرىلدى.
زارداپ شەككەندەر جوق. بۇگىندە ءورتتىڭ شىعۋ سەبەبى انىقتالۋدا. ءورت سوندىرۋشىلەردىڭ ايتۋىنشا, جەل ءتىلسىز جاۋدى تەز اۋىزدىقتاۋدا قيىندىق تۋعىزعان. جالىندى سوندىرۋگە 47 ءورت ءسوندىرۋشى مەن 16 تەحنيكا جۇمىلدىرىلدى. جەتىساي اۋدانىنىڭ اكىمى م.قادىربەكتىڭ بايانداۋىنشا, بولجامدى ەسەپ بويىنشا 613 ازامات, ياعني 1 119 ساۋدا نۇكتەسى ورتتەن جاپا شەككەن. ءيا, العاشقى ساتتە ەرتەڭىنە الاڭداپ اشۋعا ەرىك بەرگەن جەتىسايلىق كاسىپكەرلەر ورتالىق كوشەنى جاۋىپ, بازار اكىمشىلىگىنە نىساندى تەزدەتىپ اشۋدى تالاپ ەتتى. جەتىسايعا شۇعىل جەتكەن وبلىس اكىمى ومىرزاق شوكەەۆ بازارداعى ءورتتىڭ سالدارىن جويۋ بويىنشا شتاب وتىرىسىن وتكىزدى. وقيعا سەبەپتەرىن انىقتاۋ جانە ورتتەن زارداپ شەككەندەرگە كومەك كورسەتۋ جونىندەگى كوميسسيا قۇرىلدى. وبلىس اكىمىنىڭ ورىنباسارى ساكەن قالقامانوۆ جەتەكشىلىك ەتەتىن كوميسسيا الدىندا ەڭ الدىمەن زارداپ شەككەندەردى انىقتاۋ, ماتەريالدىق زالالدى باعالاۋ مىندەتى تۇر. وقيعا ورنىنا كەلىپ, جاعدايمەن تانىسقان وبلىس اكىمى بازار يەسىمەن كەزدەسىپ, اكىمدىك تاراپىنان قولداۋ بولاتىنىن ايتتى.
«ەشكىم كومەكسىز قالمايدى. بازار باسشىلىعى كاسىپكەرلەرمەن كەلىسسوز جۇرگىزىپ, جانعان تاۋار شىعىنىن زاڭ اياسىندا وتەۋى كەرەك. ءبىرىنشى ماسەلە, بازاردى قالپىنا كەلتىرىپ, تەزدەتىپ ىسكە قوسۋ قاجەت. ول ءۇشىن جاقىن ماڭداعى اۋدانداردان بريگادالار الدىرامىز. ءار سەكتورعا جوندەلەتىن بازار قاتارى بەكىتىلەدى. ءار پاۆيلوندى 6-7 توپقا ءبولىپ, كاسىپكەرلەر ماسەلەسىن وڭتايلى شەشۋدى قاداعالايمىز», دەدى ءوڭىر باسشىسى.
ال وبلىستىق پوليتسيا دەپارتامەنتى تەرگەۋ باسقارماسىنىڭ باستىعى ن.جالعاسوۆ اتالعان جايتقا بايلانىستى تەرگەۋ باستالعانىن جەتكىزدى. ءورت-تەحنيكالىق ساراپتاما, سوت قۇرىلىس ساراپتاماسى جۇرگىزىلىپ, شۇعىل تەرگەۋ توبى قۇرىلعان.
بازاردى قالپىنا كەلتىرۋ بويىنشا شۇعىل شارالار قابىلدانعان. ماقتاارال, جەتىساي, كەلەس, سارىاعاش, شاردارا, قازىعۇرت اۋداندارىنان بريگادالار كەلىپ كومەك بەرەتىن بولادى. سونداي-اق وبلىس اكىمى بازار سىزباسى دايىن بولعان سوڭ تەز ارادا بازاردى قالپىنا كەلتىرۋ كەرەگىن جانە بازار يەسى كاسىپكەرلەرمەن كەلىسىمگە كەلۋگە ءتيىس ەكەنىن ايتتى. بازار يەسى اكىمنىڭ ۇسىنىسىمەن كەلىستى.
ال اشۋعا ەرىك بەرگەن كاسىپكەرلەرمەن كەزدەسۋدە وبلىس اكىمىنىڭ ورىنباسارى ساكەن قالقامانوۆ, اۋدان اكىمى مۇرات قادىربەك بازارداعى جوندەۋ جۇمىستارى ساراپتاما جۇمىستارى بىتكەن سوڭ باستالاتىنىن ءتۇسىندىردى.
«ەكى ساراپتاما جاسالادى. ءبىرىنشىسى – قۇرىلىس ساراپتاماسى, ەكىنشىسى – تاۋارلىق ساراپتاما. قازىر بازار يەسى جاڭا نىساننىڭ جوباسىن جاساپ, بىزگە ۇسىنادى. ءورت قاۋىپسىزدىگىن ساقتاۋ ءارى حالىققا قولجەتىمدى بولاتىن بازار سالۋىمىز كەرەك. ورتەنگەن بازار ءىسى بويىنشا تەرگەۋ جۇمىستارى باستالدى. نىسان يەسى ۋادە بەرگەندەي, 15-20 كۇن ۋاقىتتا بازار ىسكە قوسىلادى», دەدى س.قالقامانوۆ.
سونداي-اق اۋدان اكىمدىگىندە بازار كاسىپكەرلەرىنىڭ نەسيە ۋاقىتىن شەگەرۋ, قايتا قارجىلاندىرۋ بويىنشا ەكىنشى دەڭگەيلى بانك وكىلدەرىمەن كەزدەسۋ ءوتتى. «حالىق بانك», «جۋسان بانك», KMF وكىلدەرى كەلىپ, كاسىپكەرلەردىڭ ارقايسىسىمەن جەكەلەي جۇمىس جۇرگىزەتىندەرىن ايتتى. شىعىندى ەسەپتەۋ بويىنشا كوميسسيا قۇرامىنا كاسىپكەرلەر اراسىنان بەلسەندى ازاماتتار كىردى. تاۋارى ورتەنىپ كەتكەن كاسىپكەرلەر ءتىزىمى جاساقتالىپ, بازاردىڭ ءار ءبولىمى بويىنشا ءتيىستى اقپاراتتى جيناقتايتىن جاۋاپتىلار بەكىتىلدى.
– بازار يەلەرىمەن كەلىسكەندەي, ورتەنگەن بازار 20 كۇندە قالپىنا كەلتىرىلەدى. جوندەۋدەن وتكەن سوڭ كاسىپكەرلەر بازاردا 1 جىل تەگىن وتىرادى. سونداي-اق سالىق ورگاندارىمەن بىرلەسىپ سالىق تولەۋ ماسەلەسى دە قاراستىرىلادى. وبلىس اكىمىنىڭ تاپسىرماسىنا سايكەس, كەلتىرىلگەن شىعىندى وتەۋ ءۇشىن قور قۇرىلادى. كوميسسيا توراعاسى رەتىندە بازارداعى كاسىپكەرلەرمەن بىرلەسە وتىرىپ, قورعا تۇسكەن قاراجاتتان شىعىنداردى وتەيمىز,– دەدى وبلىس اكىمىنىڭ ورىنباسارى.
سونداي-اق توتەنشە جاعداي سالدارىن جويۋ كوميسسياسىنىڭ باستاماسىمەن بانكتەر جانە كرەديتتىك ۇيىمدارمەن كاسىپكەرلەردىڭ نەسيەسىن تولەۋدە كەم دەگەندە ءبىر جىلعا كانيكۋل الۋعا كەلىسسوز جۇرگىزىلەدى. جەڭىلدەتىلگەن نەسيە بەرۋ بويىنشا دا جۇمىستار قولعا الىنباق. قازىرگى تاڭدا زارداپ شەككەن كاسىپكەرلەردى باسقا ساۋدا ورىندارىنا ۋاقىتشا ورنالاستىرۋ بويىنشا «قاراقاي» ساۋدا بازارىنا جانە «كۇلپارشىن» بازارىنىڭ ءورت شالماعان ورىندارىنا جايعاستىرۋ جۇمىستارى جۇرگىزىلۋدە. ال «كۇلپارشىن» بازارىن قايتا قالپىنا كەلتىرۋ, ءورت قالدىقتارىن تازالاۋ جۇمىستارىنا جەتىساي اۋدانىنىڭ تۇرعىن ءۇي-كوممۋنالدىق شارۋاشىلىعى جولاۋشىلار كولىگى, اۆتوموبيل جولدارى جانە تۇرعىن ءۇي ينسپەكتسياسى بولىمىنە قاراستى «جەتىساي قىزمەت» مكك قىزمەتكەرلەرى مەن جالدامالى جۇمىسشىلار, ەرىكتى ازاماتتاردان 100-گە جۋىق ادام, 10 شاقتى تەحنيكا جۇمىلدىرىلعان.
تۇركىستان وبلىسى