تۇركىستاندا قۇندى مۇرا, قاسيەتتى ورىندار مەن تۇراقتى تۋريزم بويىنشا «ەسكەرتكىشتەردى قورعايتىن حالىق» تاقىرىبىندا حالىقارالىق كونفەرەنتسيا وتەدى. اۋقىمدى جيىنعا ەۋروپا مەن تۇركىتىلدەس – بارلىعى 15 مەملەكەتتىڭ اتى الەمگە ءماشھۇر عالىمدارى قاتىسادى. باسقوسۋدىڭ ماقساتى – ۇلى ويشىل قوجا احمەت ءياساۋيدىڭ تۇلعاسىن تورتكۇل دۇنيەگە تانىستىرىپ, مۇرالارىن ناسيحاتتاۋ.
ياساۋي حيكمەتتەرىنىڭ ءمان-ماعىناسى نەدە؟ ازىرەت سۇلتان بولمىسىنىڭ جان-جاقتىلىعى, شىعارماشىلىعىنىڭ وزەكتىلىگىن نەمەن تۇسىندىرە الامىز؟ وسى سىندى ساۋالداردىڭ جاۋابىن تاۋىپ, جاريا ەتۋ ءۇشىن وبلىستىق قوعامدىق دامۋ باسقارماسىنىڭ باسشىسى اڭسار وسەرباەۆ ياساۋيتانۋشى عالىمدارمەن كەڭەسىپ, جۋرناليستەر پۋلىن جاساقتادى.
ولار ارنايى باعدارلامالار, بەينەروليكتەر ازىرلەيتىن بولدى.
ەكى اي بويى اقپاراتتىق-يدەولوگيالىق جۇمىستاردى جان-جاقتى جۇرگىزۋ ءۇشىن ارنايى مەديا-جوسپار بەكىتىلىپ, حالىقارالىق كونفەرەنتسياعا دايىندىق باستالىپ تا كەتتى. ياعني تۇركىستاندا قازان ايىنىڭ 26-28 كۇندەرى ارالىعىندا ياساۋي مۇراسىن ناسيحاتتاۋعا ارنالعان حالىقارالىق دەڭگەيدە عىلىمي كونفەرەنتسيا ۇيىمداستىرىلماق.
وعان الەمنىڭ تۇكپىر-تۇكپىرىنەن قوجا احمەت ياساۋي ءىلىمى مەن مۇراسىن زەرتتەۋشى عالىمدار شاقىرىلادى. ۇيىمداستىرۋشىلاردىڭ مالىمدەۋىنشە, بۇل جولعى عىلىمي كونفەرەنتسيانىڭ ءمان-ماڭىزى بولەكتەۋ بولماق. اتالعان كونفەرەنتسيا قارساڭىندا وڭىردە بىرقاتار شارا وتكىزۋ كوزدەلىپ وتىر. ماسەلەن, ياساۋي مۇراسىن ناسيحاتتاۋ تاقىرىبىندا سەمينارلار, ال ارناۋلى جانە جوعارى وقۋ ورىندارىندا «دوڭگەلەك ۇستەل» ماجىلىستەرى وتكىزىلەدى. سونداي-اق مەكتەپتىڭ جوعارى سىنىپ وقۋشىلارى اراسىندا «ياساۋي مۇراسىنىڭ تۇركى ەلىندە ناسيحاتتالۋى» تاقىرىبىندا ەسسە جازۋدان بايقاۋ, اۋدان-قالالارداعى جاستار رەسۋرستىق ورتالىقتارىندا ياساۋي حيكمەتتەرىن وقۋدان چەللەندج ۇيىمداستىرىلماق.
تۇركىستان