نۇرسۇلتان اۋەجايى اۆياكومپانيالارعا وتىندى ءتۇرلى باعامەن ساتقان. بۇل بيلەت باعاسىنا اسەر ەتتى, دەپ حابارلايدى Egemen.kz باسەكەلەستىكتى قورعاۋ جانە دامىتۋ اگەنتتىگىنە سىلتەمە جاساپ.
اۆياوتىندى بولشەك ساۋدادا وتكىزۋ نارىعىنداعى تالداۋ قورىتىندىسى بويىنشا «نۇرسۇلتان نازارباەۆ حالىقارالىق اۋەجايى» اق ءىس-ارەكەتىندە نارىق سۋبەكتىلەرىمەن ءمانى بىردەي كەلىسىمدەرگە ءارتۇرلى باعا قولدانۋ بولىگىندە قازاقستاننىڭ باسەكەلەستىكتى قورعاۋ سالاسىنداعى زاڭناماسىن بۇزۋ بەلگىلەرىن انىقتادى.
وسىلايشا, «نۇرسۇلتان نازارباەۆ حالىقارالىق اۋەجايى» اق اۆياتسيالىق وتىندى ساتۋ نارىعىندا دومينانت بولا وتىرىپ, مونوپولياعا قارسى زاڭنامانى بۇزۋعا جول بەرگەن.
باسەكەلەستىك زاڭناماسىن بۇزۋدىڭ انىقتالعان بەلگىلەرىنىڭ نەگىزىندە نۇر-سۇلتان قالاسى بويىنشا مونوپولياعا قارسى دەپارتامەنت 2022 جىلدىڭ 16 ماۋسىمىندا «نۇرسۇلتان نازارباەۆ حالىقارالىق اۋەجايى» اق-عا قاتىستى اۆياوتىندى بولشەك ساۋدادا وتكىزۋ كەزىندە نارىق سۋبەكتىلەرىمەن ءمانى بىردەي كەلىسىمدەرگە ءارتۇرلى باعالاردى قولدانۋ جونىندەگى ءىس-قيمىلدى توقتاتۋ تالابىمەن حابارلاما شىعاردى.
«نۇرسۇلتان نازارباەۆ حالىقارالىق اۋەجايى» اق حابارلامانى نازارعا الىپ, دەپارتامەنتتىڭ زاڭدى تالاپتارىن ورىندادى.
نارىق سۋبەكتىسىنىڭ باعا جاعدايىنىڭ اۋىتقۋىنا قاتىستى ءىس-ارەكەتتەرى تۇپكىلىكتى تۇتىنۋشى ءۇشىن باعانىڭ وسۋىنە, ونىڭ ىشىندە اۋە تاسىمالدارىنىڭ باعاسىنا اسەر ەتەدى.