مادەنيەت جانە سپورت ءمينيسترى داۋرەن اباەۆ UMAI ۇلتتىق سىيلىعىنا قاتىسۋعا ءوتىنىم قابىلداۋدىڭ باستالعانى جونىندە حابارلادى. جۇلدە قورىنىڭ مولشەرى 54 ملن تەڭگەنى قۇرايدى, بارلىعى 4 باعىت بويىنشا 19 نوميناتسيا قاراستىرىلعان, دەپ حابارلايدى Egemen.kz قر مسم ءباسپاسوز قىزمەتىنە سىلتەمە جاساپ.
مينيستر جاعىمدى جاڭالىقپەن ۇلىتاۋ وبلىسىنىڭ تۇرعىندارىمەن كەزدەسۋىندە ءبولىستى.
« ۇلىتاۋدىڭ قازاق حالقى ءۇشىن ەرەكشە قاستەرلى ءمانى بار. بۇل - ۇلت بەسىگى, ءبىزدىڭ كوپعاسىرلىق تاريحىمىزدىڭ كوپتەگەن تاريحي ماڭىزدى وقيعالارىنىڭ كۋاسى. ۇلىتاۋدىڭ ماڭىزدى وقيعالار مەن جەتىستىكتەردىڭ ورتالىعىنا اينالعانى قۋانتادى. سوندىقتان ءدال وسى جەردە ونەر ورداسى, ۇلت ۇياسى ۇلىتاۋ تورىندە, UMAI ۇلتتىق سىيلىعىنىڭ باستالعانى تۋرالى حابارلاعىم كەلەدى», دەدى داۋرەن اباەۆ ءوز سوزىندە.
سىيلىق قازاقستاننىڭ شىعارماشىلىق ۇجىمدارى مەن جەكەلەگەن ورىنداۋشىلارىنا كەلەسى نوميناتسيالار بويىنشا بەرىلەدى: تەاتر ونەرى; مۋزىكالىق-ورىنداۋشىلىق ونەر; حورەوگرافيا ونەرى; بەينەلەۋ جانە ساندىك-قولدانبالى ونەر.
«تەاتر ونەرى» باعىتى بويىنشا «وپەرا ونەرى» - «وپەراداعى ەرلەر پارتياسىن ۇزدىك ورىنداۋ» جانە «وپەراداعى ايەلدەر پارتياسىن ۇزدىك ورىنداۋ» سىيلىعىنىڭ جەڭىمپازدارى 2 ملن تەڭگەدەن الادى. «اكتەرلىك شەبەرلىك» - 2 ملن تەڭگەدەن 2 سىيلىق – «ۇزدىك ەر ادام ءرولى» جانە «ۇزدىك ايەل ادام ءرولى». سونداي-اق «ۇزدىك رەجيسسۋرا» جانە «سپەكتاكلدىڭ ۇزدىك كوركەم بەزەندىرىلۋى» نوميناتسيالارىنىڭ جەڭىمپازى 2 ملن تەڭگە الادى. سونىمەن قاتار «ۇزدىك مۋزىكالىق-درامالىق سپەكتاكل» نوميناتسياسى بويىنشا جەڭىمپاز 10 ملن تەڭگە الادى.
«مۋزىكالىق-ورىنداۋشىلىق ونەر» - 2 ملن تەڭگەدەن 3 اقشالاي سىيلىق – «ۇزدىك ءداستۇرلى ورىنداۋشى» ء(ان ايتۋ), «ۇزدىك ءداستۇرلى ورىنداۋشى» (ينسترۋمەنتاليست), «ۇزدىك مۋزىكالىق انسامبل» (كلاسسيكالىق/حالىقتىق).
«حورەوگرافيالىق ونەر» - 5 اقشالاي سىيلىق. «ۇزدىك بي ۇجىمى» «بالەتتەگى ۇزدىك ورىنداۋشى» (2 سىيلىق) جانە «ۇزدىك حورەوگراف» 2 ملن تەڭگەدەن, ال «ۇزدىك بالەت سپەكتاكلى» 10 ملن تەڭگە الادى.
«بەينەلەۋ جانە ساندىك-قولدانبالى ونەر». جەڭىمپازدار «ساندىك-قولدانبالى ونەردىڭ ۇزدىك تۋىندىسى», «كەسكىندەمەشىنىڭ ۇزدىك جۇمىسى/گرافيكا», «زاماناۋي ونەردەگى ۇزدىك جوبا» نوميناتسيالارى بويىنشا ماراپاتتالادى.
ايتا كەتسەك, «ۇزدىك بالالار سپەكتاكلى ءۇشىن» ارنايى سىيلىق تاعايىندالادى. جۇلدە 2 ملن تەڭگەنى قۇرايدى.
كونكۋرستىق ىرىكتەۋدى جۇرگىزۋ جانە سىيلىق لاۋرەاتتارىن ايقىنداۋ ءۇشىن ءتورت نوميناتسيانىڭ ارقايسىسىندا 3 تاۋەلسىز ساراپشى جانە 12 ادامنان تۇراتىن ساراپتاما كوميسسياسى جۇمىس ىستەيدى. وتىنىمدەر 2022 جىلدىڭ 9 جەلتوقسانىنا دەيىن قابىلدانادى.