«قۇرمەتتى ازامات» اتاعىن بەرۋ – مورالدىق ىنتالاندىرۋدىڭ, ادامنىڭ ەل الدىنداعى ەرەكشە ەڭبەگىن قوعامدىق مويىنداۋدىڭ كورىنىسى. سونىمەن قاتار پاتريوتتىق سانا قالىپتاستىرۋعا, ءوڭىر تاريحىندا تۇلعالاردىڭ ەسىمدەرىن ەستە قالدىرۋ ماقساتىندا بەرىلەدى. ونداي تۇلعالار وزگەلەرگە ۇلگى, ونەگە رەتىندە قۇرمەتتەلەدى دەسەك تە ارتىق, اسىرا ايتقاندىق بولىپ شىقپايدى.
جالپى العاندا ماراپاتتار جايدان-جاي شىعارىلا سالعان دۇنيە بولماسا كەرەك. كىم-كىمدى دە ۇلكەن ىستەرگە ۇمتىلدىرۋدىڭ توتە جولى, ادەمى ءادىسى دەسەك ءجون بولار. بەلگىلى ءبىر ماراپاتقا قول جەتكىزگەن ادامنىڭ سوعان لايىق بولۋعا قۇلشىنا ۇمتىلاتىنى, جاڭا بيىكتەردى باعىندىرۋعا تىرىساتىنى ايتپاسا دا تۇسىنىكتى. ال ماراپات يەسىن كورگەن ەكىنشى ادامنىڭ دا سونداي قۇرمەتكە جەتۋ ءۇشىن ماعان نەگە تالپىنىپ كورمەسكە دەۋى – تابيعي زاڭدىلىق.
وسى تۇرعىدان كەلەتىن بولساق, قۇرمەتكە لايىقتى ازاماتتار ءبىزدىڭ تاسقالادا دا بارشىلىق. ماسەلەن, جاقىندا اۋدان اكىمدىگىنىڭ ۇلكەن ءماجىلىس زالىندا اۋدان اكتيۆىنىڭ وتىرىسى ءوتتى. وندا ءبىلىم سالاسىنىڭ ارداگەرى باقتىعۇل جۇماجان ۇلىنا, جۇرتشىلىققا جاناشىرلىعىمەن بەلگىلى ازامات, «باتىس قازاقستان قۇرىلىس ماتەريالدارى كورپوراتسياسى» اق-نىڭ ديرەكتورى مۇحامەدجان ايساباي ۇلىنا, 2001-2004 جىلدارى تاسقالا اۋدانىنىڭ اكىمى قىزمەتىن اتقارعان, اۋداننىڭ الەۋمەتتىك-ەكونوميكالىق دامۋىنا ايتارلىقتاي ۇلەس قوسقان قايراتكەر سالاۋات عابباس ۇلىنا «تاسقالا اۋدانىنىڭ قۇرمەتتى ازاماتى» اتاعى بەرىلىپ, توسبەلگىلەر تاپسىرىلدى.
اۋدان اكىمىنىڭ توراعالىعىمەن وتكەن جيىنعا وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى الديار سانسىزباي ۇلى, اۋداندىق ءماسليحات حاتشىسى جانار نۇربولاتقىزى, اۋدان اكىمىنىڭ ورىنباسارى تالعات اسقار ۇلى, اۋداندىق قوعامدىق كەڭەس توراعاسى گانميرلان عۇسمان ۇلى, اۋداندىق مەكەمەلەر مەن ۇيىمدار باسشىلارى, سونداي-اق اۋىلدىق وكرۋگ اكىمدەرى قاتىستى.
رافحات حالەلوۆ,
جۋرناليست
باتىس قازاقستان وبلىسى