مەردىگەرگە كۇمان كوپ

جاڭا وقۋ جىلى قارساڭىندا كەرە­كۋ­دە كۇردەلى جوندەۋ باستالعان 46 مەك­تەپتىڭ 11-ىندە بۇگىندە جۇمىستار تو­لىق اياقتالىپتى. قالعان نىساندار 1 قىر­كۇيەككە دەيىن دايىن بولادى دەپ كۇتىلۋدە. الايدا كەيبىر عيما­رات­تار­دا­عى جۇمىستاردىڭ سىلبىر جۇرۋى­نەن تاۋەكەلدەر دە از ەمەس.

– بيىل ءوڭىر مەكتەپتەرىندە 46 ءبىلىم بەرۋ نىسانىنا كۇردەلى جوندەۋ جۇر­گى­زىلۋدە. ونىڭ ىشىندە «مەكتەپتەردى جاڭ­عىر­تۋ» جوباسى اياسىندا – 33, وڭىرلىك «زاماناۋي مەكتەپ» جوباسى بويىنشا – 4, «اۋىل – ەل بەسىگى» باعدارلاماسى بو­يىنشا 9 نىسان قامتىلعان. بۇگىن­دە 11 مەكتەپتە جۇمىستار تولىق اياقتال­دى. وزگەلەرى بويىنشا كۇردەلى جون­دەۋ­دى وقۋ جىلىنىڭ باسىنا دەيىن اياق­­تاۋ جوسپارلانىپ وتىر. ءبىر عانا شار­­باقتى اۋدانىندا 5 بىردەي مەكتەپ جاڭارۋدا. سونىڭ ىشىندە №1 مەكتەپتە جوندەۋ شارالارىنىڭ سىلبىر جۇرگەنىن انىقتادىق. مەردىگەر سوڭ­عى كۇندەرى ەڭبەك ورىندارىنىڭ سانىن كوبەيتىپ, جۇمىستى ۇدەتتى. بۇعان قوسا اقسۋعا قاراستى سارىشىعاناق مەكتەبى دە 1 قىركۇيەكتە بالالاردى قابىلداي الماۋى مۇمكىن. دەگەنمەن بۇل جەردەگى مەردىگەرمەن جاسالعان كەلىسىم­شارت­تا تاپسىرۋ مەرزىمى ۇزاعىراق ەكەنى كورسەتىلگەن. جالپى, جوندەۋ جۇ­مىس­تارىن ۋاقتىلى اياقتاۋ بويىنشا تاۋەكەلدەر بار ەكەنىن جاسىرمايمىز. پاۆلودار قالاسىنداعى №5, 9, 22 مەكتەپتەردە جوندەۋ قارقىندى جالعاسۋدا. جاۋاپتى كومپانيالار ۇلگەرەمىز دەپ ۋادە بەردى. جوعارىدا اتالعان ءبىلىم وشاقتارىنىڭ قايسىسى وقۋ جىلىنىڭ العاشقى كۇنى وقۋشىلاردى قابىلداۋعا ۇلگەرە الماي قالۋى مۇمكىن ەكەنىن بولجاپ ايتۋ قيىن. بارلىق جاي-جاپسارى 25 تامىزدان كەيىن انىقتالادى, – دەدى وبلىستىق ءبىلىم بەرۋ باسقارماسىنىڭ باسشىسى سامال ايتقازينا.

پاۆلودار قالاسىنداعى №9, 29 جانە №39 مەكتەپتەردىڭ ارقايسىسى بيىل 1-سىنىپقا ون سىنىپتان جيناعان. بالا سانىنىڭ كوپتىگىنە بايلانىستى ءبىلىم ۇيالارى وقۋشىلاردى ءۇش اۋىسىمدا وقىتادى. ال م.اۋەزوۆ اتىنداعى جانە №16, 21 ورتا مەكتەپتەرىنىڭ ارقاي­سى­سىن­دا سەگىزدەن 1-سىنىپ بار.

ديرەكتورلىققا ادام تابىلماي وتىر

ءبىر قىزىعى, تەرىسكەيدەگى مەكتەپتەردە ديرەكتورلار جەتىسپەيدى. ەلىمىزدىڭ وڭتۇستىك وڭىرلەرىمەن سالىستىرعاندا ءبىزدىڭ جاقتىڭ پەداگوگتەرى مانساپقا ۇمتىلۋدا تىم سىپايىلىق تانىتۋىنان با ەكەن, ايتەۋىر ديرەكتورلاردىڭ ورنىنا جاريالاناتىن كەيبىر كونكۋرستارعا مۇلدە ۇمىتكەرلەر تىركەلمەي قالاتىن جاع­دايلار ءجيى كەزدەسۋدە. ماسەلەن, پاۆ­لودار اۋدانى بويىنشا ەكى بىردەي ورتا وقۋ ۇيىمى باسشىسىز وتىر. ولار­عا كونكۋرس جاريالانعانىمەن تىلەك تانىتقاندار بولماپتى. ديرەك­تور­لاردىڭ تاپشىلىعىنان اۋدانداعى كەمەڭگەر جانە ميچۋرين اۋىلدىق مەك­تەپ­تەرىن زەينەت جاسىنداعى ادامدار باسقارۋدا. ولار زاڭ بويىنشا ورنىن بوساتۋعا ءتيىس. الايدا لاۋازىمدىق ورىن بوساعانىمەن ديرەكتورلىققا كەلەتىن پەداگوگ تابىلماي قالۋى مۇمكىن. امالدىڭ جوقتىعىنان ءبىلىم بەرۋ باسقارماسى زەينەتكەرلەردىڭ مەكتەپ باسقارۋىنا تۇسىنىستىكپەن قاراۋعا ءماجبۇر بولۋدا.

بيىلعى وقۋ جىلىندا ءوڭىر بو­يىنشا 360 مەكتەپ جۇمىسىن جالعاس­تىرادى. ولاردىڭ 137-ءسى – مەملە­كەتتىك تىلدە, 170-ءى – ارالاس جانە 53-ءى ورىس تىلىندە وقىتادى. 1 قىركۇيەكتە وبلىس ورتالىعىنىڭ ىرگە­سىن­دەگى تەمىر­جو­لشىلار كەنتىندە 210 وقۋشىعا لايىق­تال­عان جاڭا مەكتەپتى اشۋ جوسپارلانۋدا. جاڭا وقۋ جىلىندا وبلىس بويىنشا وقۋشىلار سانى شامامەن 114,8 مىڭ بولادى دەپ كۇتىلۋدە. بۇل وتكەن جىلمەن سالىستىرعاندا 2 مىڭ بالاعا كوپ ەكەن. ال 11 049 جەتكىنشەك العاش رەت مەكتەپ پارتاسىنا وتىرادى. وكىنىشتىسى, 1-سىنىپقا قابىلدانعان وقۋشىلاردىڭ اتا-انالارىنىڭ باسىم بولىگى ورىس ءتىلىن تاڭداپتى (57 پايىزى).                  

سامال وسپانقىزى ورتا مەكتەپتەردە الەۋمەتتىك قورعالماعان وتباسى­لار­دان شىققان 13 117 وقۋشى بار ەكە­نىن, جاڭا جۇيە بويىنشا ولاردىڭ ارقايسىسىنىڭ ەسەپشوتىنا 19 تامىزدان باستاپ پاۆلودار وبلىسىندا بەكىتىلگەن ەڭ تومەنگى كۇنكورىس دەڭ­گەيى­نەن تومەن ەمەس مولشەردە, ياعني 43 616 تەڭگەدەن اقشالاي قاراجات اۋدارىلىپ جاتقانىن دا ەسكە سالدى. «مەك­تەپ­كە جول» اكتسياسى اياسىندا قازىر­گە دەيىن 4 مىڭداي بالاعا جالپى سوماسى 20 ملن-نان استام تەڭگەنىڭ كومەگى كورسەتىلىپتى. ايماعىمىزداعى قا­لالار مەن اۋدانداردا 27 تامىز كۇنى مەكتەپ تاۋارلارىنىڭ اۋقىمدى جار­مەڭكەسى ۇيىمداستىرىلادى دەپ جوس­پار­لانعان.

پاۆلودار وبلىسى