اقىلى جولداعى احۋال قانداي؟

جانارماي ستانسالارى جەتىسپەيدى

پاۆلوداردان ەلورداعا دەيىنگى ەكى جولاقتى, 1ا ساناتىنا جاتاتىن اۆتوباننىڭ 191 شاقىرىمى پاۆلودار وبلىسىنىڭ, وزگەسى اقمولا ءوڭىرىنىڭ اۋماعىندا ورنالاسقان. بۇگىندە جەڭىل كولىكتەر بۇل جولدا ءار شاقىرىمى ءۇشىن 1 تەڭگە, جۇك كولىكتەرى سالماعىنا قاراي 5-25 تەڭگە, اۆتوبۋستار 5-15 تەڭگەدەن تولەيدى. ساعاتىنا 140 كيلومەترگە دەيىن ىزعىتۋعا بولاتىن جاڭا ستاندارتتاعى جول ارقىلى باس قالاعا دەيىنگى ۋاقىت قىس­قاردى, جەڭىل كولىكپەن نەبارى 3,5 ساعاتتا جەتىپ باراسىز. وسىلايشا, كۇرە جول قازىرگى ۋاقىتتا كولىك اعىنى بويىنشا ەلىمىزدەگى شەشۋشى ينفراقۇرىلىمنىڭ بىرىنە اينالىپ ۇلگەردى.

وكىنىشتىسى, وسى ەكى ارالىقتا جولاۋ­شىلاردىڭ كوڭىلىنە ۇنامايتىن كەمشىلىكتەر جەتەرلىك. اسىرەسە جول بويىنداعى سەرۆيس اقساپ تۇر. جانار-جاعارماي قۇيۋ ستان­سالارىنىڭ, ءدامحانالار مەن قوناقۇيلەردىڭ, جىلى دارەتحانالاردىڭ جەتكىلىكسىزدىگى ايقىن بايقالادى.

بۇل ماسەلە ەلوردادان بەرى قايتقاندا وزەكتى. اقمولا وبلىسىنان باستاپ قالقامان كەنتىنە دەيىن كولىك وتىنىن ساتاتىن ستانسالار جوق (شامامەن 130 شاقىرىمداي ارالىق). ەكى ارادا كولىگىڭىزدىڭ بەنزينى ءبىتىپ تۇرىپ قالساڭىز, پۇشايمان كۇيگە تۇسەسىز.

كولىك اعىنى قالىڭ, ورتاسى تەمىر قورشاۋمەن بولىنگەن اۆتوباندا رەتسىز توقتاۋعا رۇقسات جوق. مۇنى جاقسى بىلەتىن جۇرگىزۋشىلەر نۇر-سۇلتان قالاسىنان شىعاردا ماشيناسىنىڭ باگىنا اۋزى-مۇرنىنان شىعارىپ بەنزين قۇيىپ الادى. اۆ­توبانعا جاۋاپتى «قازاۆتوجول» ۇك» اق-نىڭ وبلىستىق فيليالىنان سۇراپ بىلگە­نىمىزدەي, اقىلى ۋچاسكەلەردىڭ بويىندا بۇگىندە اۆتوجانارماي قۇيۋ ستانسالارىنىڭ

9 پۋنكتى, 18 تاماقتانۋ پۋنكتى جانە اۆتوموبيلدەرگە تەحنيكالىق قىزمەت كورسەتۋدىڭ 1 پۋنكتى ورنالاسقان ەكەن. ولاردىڭ كوبى قالقامان جانە شىدەرتى كەنتتەرىندە ورنالاسقان.

وڭىرلىك كاسىپكەرلەر پالاتاسىنىڭ ەكىباستۇزداعى فيليالىنىڭ ديرەكتورى مەديات مۇساناپ جول بويىمەن اۋىر جۇك كولىكتەرى ءجيى جۇرەتىنىن, سىرتتان كەلەتىن تاسىمالداۋشىلارعا بۇل اۋماقتا ساپالى قىزمەت كورسەتىلمەي وتىرعانىن قىنجىلا جەتكىزدى. جەرگىلىكتى كاسىپكەرلەر جول بويىندا كاسىپ اشۋعا ىنتالى. الايدا «قاز­اۆتوجول» ۇسىناتىن تالاپتار ولار­دىڭ كوڭىلىنەن شىقپايدى. جانارماي قۇيۋ بەكەتتەرىن, ءدامحانالار سالۋ تۋرالى ۇسىنىستار بولعانىمەن, ولارعا قاجەتتى جەردى رەسىمدەۋ, ينفراقۇرىلىم تارتۋ ۇلكەن ماسەلەگە اينالىپ تۇر. ۇلتتىق كوم­پانيا كاسىپ باستاعىسى كەلە­تىن­دەر­گە ۋادەنى ءۇيىپ-توككەنىمەن, ءىس جۇ­زىن­دە ايتقانىن ورىنداي الماي كەلەدى. وسىدان بىرەر جىل بۇرىن اكتسيونەرلىك قوعامنىڭ تاپسىرىسىمەن شىدەرتى كەنتى جانىندا كوپفۋنكتسيونالدى جول بويى كەشەنىن (كەمپينگ) تۇرعىزعان. قۇنى شامامەن 1,5 ملرد تەڭگە تۇراتىن جوبانىڭ قۇرىلىسى اياقتالعانىمەن, ول بۇگىندە قاڭىراپ بوس تۇر. سەبەبى نىساندى جالعا الۋعا دارمەنى جەتەتىن الەۋەتتى كاسىپكەر جوق. ونى قويىپ, جول بويىندا كولىكتەرگە تەح­نيكالىق قىزمەت كورسەتەتىن سەرۆيستىك ۇيىمدار مەن تەحنيكا دوڭگەلەگىن جون­دەيتىن شەبەرحانالار دا جوقتىڭ قاسى.

ۋادەڭ قايدا, «قازاۆتوجول»؟

پاۆلوداردان ەلورداعا قاراي ءجۇرىپ, شىدەرتى كەنتىنەن ءارى اسقاندا جول بويى­نان «دۆە دوروگي» دەپ اتالاتىن اسحانا كوزىڭىزگە تۇسەدى. بۇل اسحاناعا كەزىندە «قازاۆتوجول» وكىلدەرى ينفراقۇرىلىم تارتامىز دەپ قاتىرىپ كەتكەن. «ەمەليا­­نوۆ» جەكە كاسىپكەرلىگىنىڭ باسشىسى اناتولي ەمەليانوۆ ۇيىم وكىلدەرى باس­­تاپ­قىدا بەرگەن ۋادەلەرىنىڭ ءبىرىن دە ورىن­داماعانىن جەتكىزدى. اۆتوبان سالىنىپ جاتقاندا قۇنى 16 ملن تەڭگە تۇراتىن جوبانى كورسەتىپ: ء«سىزدىڭ دامحاناڭىزعا دەيىن وسىنشاما قاراجاتقا ءاسفالتتى جول سالىنادى. كەيىن ينفراقۇرىلىم تارتامىز. ارلى-بەرلى وتكەن جولاۋشىلاردى ۇيالماي قارسى الاسىز», دەپ كاسىپكەردىڭ كوڭىلىن تويدىرىپ قويا بەرىپتى.

– توبەم كوككە جەتكەندەي بولىپ قۋان­­­عا­نىم ەسىمدە. «بيزنەستىڭ جول كارتاسى-2020» باعدارلاماسى بويىنشا پا­يى­زى تومەن نەسيە الىپ, ءدامحانانىڭ جۇمىسىن جولعا قويدىم. اسۇيگە ارنالعان قان­شا­ما جيھاز, قۇرال-جابدىقتار ساتىپ الىپ, ەكىباستۇزدان مىقتى اسپازداردى شاقىردىم. باستاپقىدا جۇمىسىم جامان جۇرگەن جوق. تابىس كوپ بولماسا دا, كەلەشەكتە «قازاۆتوجول» وكىلدەرى ۋادە ەتكەن جوبالار جۇزەگە اسىپ, ەسەلەنە تۇسەدى دەپ ۇمىتتەنگەنمىن. سايىپ كەلگەندە جوبا دا, جول دا جوق بوپ شىقتى. امالسىزدان قا­­رىز­دانىپ-قاۋعالانىپ, اقشانى ءوز قال­­تامنان شىعارا باستادىم, – دەيدى اناتولي نيكولاەۆيچ قىنجىلىپ.

اسحاناسىنا ەلەكتر جارىعىن تارتۋ, وزگە دە ينفراقۇرىلىمدىق جۇمىستاردى جۇزەگە اسىرۋعا كاسىپكەر 120 مىڭ دوللار كولەمىندە ءوز قارجىسىن جۇمساۋعا ءماجبۇر بولدى. سەبەبى كومەكتى سىرتتان كۇتىپ وتىرا بەرسە, ءدامحاناسىنىڭ قىزمەتى توقىراپ, جۇمىسقا العان ادامدارىن تاراتۋعا تۋرا كەلەر ەدى. دامحاناعا دەيىنگى كىرمە جولدىڭ ۇزىندىعى نەبارى 80 مەتردەي عانا. جولعا قىزمەت كورسەتەتىن فيرمانىڭ وكىلدەرى بۇل اۋماققا ءاۋ باستا اسفالت توسەيمىز دەگەنىمەن, بۇگىندە ول دا ورىندالمادى. بەتكى قاباتىندا ءالى كۇنگە قيىرشىق تاس شاشىلىپ جاتىر. جازدا كۇن جاڭبىرلى بولعاندا بۇل جەرگە سۋ جينالىپ, قىستا مۇز قاتىپ, جولاۋشىلاردىڭ كولىكتەرىنە قيىندىق تۋدىراتىنى بار. اۋىر جۇك كولىكتەرى ءار وتكەن سايىن الگى جەردە كادىمگىدەي شۇڭقىرلار پايدا بولىپ, سالدارىنان كەيبىر جەڭىل كولىكتەر دامحاناعا جاقىنداپ كەلۋگە جۇرەكسىنەدى. قىسقاسى, كاسىپكەر ءۇشىن ۇزىندىعى 80 مەترلىك شاعىن عانا جول ۇلكەن ماسەلەگە اينالىپ تۇر.

– ماعان جول بويىنشا الگى جوبانى كورسەتىڭدەر دەپ بىرنەشە مارتە حابارلاس­تىم. ءتۇرلى سىلتاۋ ايتىپ, كورسەتكىلەرى جوق. جول ابدەن جۇرگىسىز بولىپ قالعاندا شىدەرتى كەنتىنىڭ اكىمى كومەكتەسىپ, جول كومپانياسىنىڭ وكىلدەرى گرەيدەرمەن ءبىر مارتە تەگىستەپ كەتتى. سودان بەرى «قازاۆتوجولدىڭ» وكىلدەرىن كورسەم, كوزىم شىقسىن. كيلومەترلەپ سانايتىن ەمەس, شاقىرىمنىڭ شيرەگىنە دە جەت­پەي­تىن جولدى جارتى-اق كۇندە رەتكە كەلتىرىپ, اسفالتتاپ تاستاۋعا بولاتىن ەدى عوي, – دەيدى كاسىپكەر.

ا.ەمەليانوۆتىڭ بۇل اۋماقتاعى سەر­ۆيستى دامىتۋعا دەگەن ىنتاسىن باي­قا­دىق. ايتۋىنشا, جۋىق ارادا ءدامحانا جانىنان جىلى دارەتحانا, كولىك­تەرگە قىزمەت كورسەتەتىن تەحنيكالىق سەرۆيس ورتالىعىن اشۋدى جوسپارلاپ قويعان. دەي تۇرعانمەن, سوڭعى جوباعا قارجى سالۋعا جۇرەكسىنىپ وتىر. كىرمە جولدىڭ جاعدايى شەشىلمەسە, تەحنيكالىق ورتالىققا كولىكتەردىڭ كەلە قويۋى ەكىتالاي.

قىزىق قىلعاندا, «قازاۆتوجول» كوم­پانياسى جوعارىدا اتاپ وتكەن ءزاۋلىم كەم­پينگتى اناتولي نيكولاەۆيچكە قارا­ۋى­ڭىزعا الىڭىز دەپ ۇسىنىس تاستاپتى. ات-تونىمدى الا قاشتىم دەيدى كاسىپكەر. اينالاسى ات شاپتىرىم نىساندى قىستا ۇستاپ تۇرۋعا دۇنيەنىڭ كومىرى قاجەت, ءارى ءىشىن جابدىقتاۋعا دا قىرۋار قاراجات جۇم­ساۋعا تۋرا كەلەر ەدى. سوندىقتان مۇنداي بولاشاعى ب ۇلىڭعىر جوبانى الا قويۋعا ەكىنىڭ ءبىرىنىڭ جۇرەگى داۋالاماسى انىق.

ميلليارد تەڭگەنىڭ جوبالارى قاڭىراپ تۇر

الىسقا بارماي-اق جوعارىداعىداي كەمپينگتىڭ تاعى ءبىرى «پاۆلودار – قالباتاۋ» تاس جولىندا, دالىرەك ايتقاندا اققۋلىدا 3 جىلدان بەرى بوس تۇرعانىن ايتىپ وتسەك تە بولادى. جالپى سوماسى 1 ملرد تەڭگەگە جۋىق قاراجاتقا سالىنعان الىپ قۇرىلىستى ءالى كۇنگە جالعا الاتىن كاسىپكەر تابىلمادى. قۇرىلىس يەلەرى ونىڭ اي سايىنعى جالعا الۋ تولەمى 3 ملن تەڭگەنى قۇرايتىنىن ايتىپ ەدى, بيزنەس وكىلدەرى بىردەن باس تارتتى.

پاۆلودار وبلىسىنىڭ اكىمى ابىل­قايىر سقاقوۆ بۇل ماسەلەلەردى جاق­سى بىلەدى. اكىمنىڭ ويىنشا, اتالعان جوبا بيۋدجەتتى ءتيىمسىز يگەرۋدىڭ جارقىن مىسالى. كەشەندى جالعا الاتىن كاسىپكەر تابىلماسا, ونى وزگە ماقساتتا پايدالانۋعا بەرىپ, نىسان ءوڭىر ەكونوميكاسىنىڭ پايداسىنا جۇمىس ىستەۋى كەرەك دەپ تاپسىرعان ەدى ايماق باسشىسى. اققۋلى اۋدانى اكىمىنىڭ ورىنباسارى الما قاسىموۆا بۇل ولكەدە ازىرشە تاۋەكەلدى ىسكە بارۋ­عا جۇرەگى داۋالاعان بيزنەس يەلەرى جوقتىعىن ايتادى. «كوپفۋنكتسيونالدى نىسان تولىعىمەن «قازاۆتوجول» اق-نىڭ بالانسىندا تۇر. ءبىزدىڭ اۋدان ءۇشىن ايتارلىقتاي الىپ نىساندى الا قوياتىنداي ءىرى كاسىپكەرلەر وڭىردە جوق. سىرتتان ۇلكەن ءبىر بيزنەسمەندەر كەلىپ كاسىبىن جۇرگىزبەسە, جەرگىلىكتى جەردەن تابىلاتىنىنا سەنە قويمايمىز. ءارى اي سايىنعى جالعا الۋ قۇنىنىڭ ءوزى تىم قىمبات. نىساندى ۇستاپ تۇرۋعا دا قىرۋار قاراجات قاجەت», دەيدى ول.

مامانداردىڭ سوزىنە قاراعاندا, ۇلت­تىق كومپانيانىڭ مۇنداي كوپ­فۋنك­تسيونالدى كەشەندەردى ءاۋ باستا سالعا­نى­نىڭ ءوزى قاتەلىك بولعان. جولاۋ­شى­لارعا ارنالعان بارلىق قولايلى جاعدايدىڭ تۇتاس كەشەنىن, اتاپ ايتقاندا, جانارماي قۇيۋ ستانساسى, قوناقۇي, ءدامحانا, اۆتوكولىك جۋ ورنى, تەحنيكالىق قىزمەت كورسەتۋ ستانساسى جانە دەمالۋعا ارنالعان الاڭى بار جول بويى سەرۆيسىن ۇستاپ تۇرۋ اسا قىمبات. بارلىعى ءبىر جەردە شوعىرلانۋىنا بايلانىستى ولاردى ءبىر ورتالىقتان جىلىتۋ, كۇتۋ, قىزمەت كورسەتۋ, قىزمەتكەرلەرگە ەڭبەكاقى تولەۋ قىر­ۋار قاراجاتتى تالاپ ەتەدى. 2019 جىلى ەلىمىز بويىنشا مۇنداي 41 نىسان سالىناتىنى ايتىلعان. الايدا العاشقى 4 كەشەندى سالىپ, ولاردىڭ جارتىسى پايدالانۋسىز تۇرىپ قالعاندا, جوبانىڭ ءساتسىز ەكەنى ايقىن بولدى. ءسوي­تىپ, اكتسيونەرلىك قوعام ودان ءبىرجولا باس تارتتى. «قازىرگى ۋاقىتتا بيزنەس قالا سىرتىندا جۇمىس ىستەۋگە دايىن ەمەس. ءساتتى مەنەدجمەنت جەتىسپەيدى. «باتىس ەۋروپا – باتىس قىتاي» تاس جولىنىڭ قىزىلوردا وبلىسىنداعى بولىگىندە بۇل بويىنشا جاعىمدى مىسالدار بارشىلىق. ول جەردە كولىك اعىنى ۇلكەن, بيزنەس جاقسى ءجۇرىپ جاتىر. ال پاۆلودار وبلىسىنداعى باعىتتا ماسەلە قالىپتاسىپ وتىر, بيزنەس وكىلدەرى بەلسەندى ەمەس», دەگەن ءۋاج دە ەستىدىك كومپانيانىڭ جول بويى سەرۆيسىن دامىتۋعا جاۋاپتى ماماندارىنان. قازىر وبلىستاعى يەسىز تۇرعان 2 كەشەندى ۇس­تاۋ­دىڭ ءوزى كومپانيانىڭ بيۋدجەتىنە وڭاي ءتيىپ تۇرماعانعا ۇقسايدى. مەزگىل سايىن كونكۋرس ويناتىلىپ, جالعا الۋشىلاردى ىزدەگەنىمەن بولاشاعى كۇماندى بيزنەسكە كاسىپكەرلەردىڭ باس تىككىسى جوق.

بۇل نىسانداردىڭ نە سەبەپتى بىر­نە­شە جىلدان بەرى بوس تۇرعانىن «قازاۆتوجول» ۇك» اق پاۆلودار وبلىسى بويىنشا فيليالىنىڭ ديرەكتورى ەرمۇرات نۇرحانوۆتان دا سۇرادىق. فيليال باسشىسى كونكۋرس جۋىقتا تاعى ويناتىلعانىن, الايدا ۇمىتكەرلەر تابىلماي تۇرعانىن ايتادى. كونكۋرستىق شارالاردا جىل سايىن جالعا الۋ قۇنى تومەندەتىلىپ, قازىرگى كۇنى ول سوما 2 ملن تەڭگەنىڭ (اي سايىنعى تولەمى) شاماسىندا بەلگىلەنىپ وتىرعان كورىنەدى. «نۇر-سۇلتان – پاۆلودار» اۆتوبانىنىڭ بويىنداعى جىلى دارەتحانالاردىڭ سانى كوبەيتىلە مە دەگەن سۇراعىمىزعا ول ستاندارت بويىنشا جەتكىلىكتى دەپ جاۋاپ بەردى. بۇگىندە جىلى دارەتحانالار ەلوردادان كەلە جاتقاندا ەكىباستۇز قالاسىنا 30 شاقىرىم قالعان جەردە (بايەت اۋىلى تۇسىندا) جانە تورتقۇدىق ەلدى مەكەنى ماڭىندا ورنالاسقانىن جاقسى بىلەمىز. ودان باسقا شىدەرتى كەنتى مەن قالقامان اۋىلىنداعى ءدامحانالار ىشىندە ىلەۋدە ءبىر مۇنداي دارەتحانالار كەزدەسەدى. بۇل ءدامحانانىڭ بارلىعى تاۋلىك بويى جۇمىس ىستەمەيتىنىن ەسكەرۋ كەرەك. ال بايەت پەن تورتقۇدىقتىڭ اراسى شامامەن 100 كيلومەتردەي. ەندەشە, بۇل ەكى ارالىقتا جولاۋشىلاردىڭ قاجەتتىلىكتەرى ءۇشىن تاعى دا قوسىمشا زامانعا ساي دارەتحانالار سالىنۋى كەرەك دەپ ەسەپتەيمىز. ءبىر قىزىعى «قازاۆتوجول» كومپانياسىندا قۇرىلعان «شۇعىل جەلى» – 1403 بايلانىس ورتالىعىنىڭ ماماندارى جىلى دارەتحانالاردىڭ قايدا ورنالاسقانىنان دا بەيحابار بولىپ شىقتى. تەلەفون شالعانىمىزدا تۇتقانىڭ ار جاعىنداعى وپەراتور جىگىت بايەت ماڭىنداعى نىساندى ەسىنە ارەڭ تۇسىرگەنىمەن, تورتقۇدىقتاعى ورىندى مۇلدە بىلمەيتىن بولىپ شىقتى. وسى­عان قاراعاندا, كومپانيا اقپارات ورتا­لىعىنا بىلىكسىز قىزمەتكەرلەرىن وتىر­عىزىپ قويعان-اۋ دەپ شامالادىق. ءبىزدىڭ وبلىستىڭ تۇرعىندارىن بىلاي قويعاندا, مىڭداعان شاقىرىمنان ات سابىلتىپ كەلەتىن جولاۋشىلارعا قاتە اقپارات بەرىپ جاتسا, بۇل دا اكتسيونەرلىك قوعامنىڭ بەدەلىنە نۇقسان. ال دۇرىس مالىمەت الماعان جولاۋشى ۇزاق جولدا مەحنات كەشەرى ايدان انىق. سوندىقتان جول بويىنداعى جالعىز وپەراتور بۇل باعىتتا تىڭعىلىقتى جۇمىس ىستەسە دەگەن تىلەگىمىز بار.

مەديات مۇساناپتىڭ پىكىرىنە دەن قويساق, الگىندەي ۇلكەن كەشەندەردى سال­عانشا, ورنىنا شاعىن ءدامحانالار مەن جانارماي قۇيۋ ستانسالارىن تۇرعىزعان ىڭعايلى. «كاسىپكەر ولاردى قىستا جىلى­تۋ­عا دا كوپ شىعىندالماس ەدى. ءارى ولار نىسانداردى ساتىپ الىپ, ءارى قاراي ءوزى دامىتار ەدى. ۇلتتىق كومپانيا بۇل بويىنشا الداعى ۋاقىتتا جەكە باع­دارلاما ازىرلەپ, ىسكە اسىرادى دەگەن ءۇمىتىمىز زور. جول بويىنداعى بيزنەس­كە قىزىعۋشىلىعى بار كاسىپكەرلەردىڭ قازىرگى تىلەگى وسىنداي», دەپ ەسكەرتتى كاسىپكەرلەر پالاتاسىنىڭ وكىلى.

ال اكتسيونەرلىك قوعامنىڭ وڭىردەگى فيليالى ديرەكتورىنىڭ ورىنباسارى ەرجان كيسيكوۆ كەلەشەكتە اۆتوجولدىڭ شىدەرتى ماڭىندا ءبىر جانارماي قۇيۋ ستانساسىن جانە ەكىباستۇز بەن شىدەرتى اۋماعىندا اۆتوگاز قۇيۋ ستانسالارىن تۇرعىزۋ كوزدەلىپ وتىرعانىن ايتادى. جوبادا شاعىن ماركەت, ءدامحانا, قوناقۇي جانە اۆتوتۇراق قاراستىرىلعان.

جارىعى جوق كوپىر قاۋىپتى

اۆتوباننىڭ بويىن جارىقتاندىرۋعا قاتىس­تى دا جۇرگىزۋشىلەر شاعىمى كوپ. اسىرەسە پوگرانيچنيك جانە شىدەرتى اۋماقتارىنداعى كوپىرلەردىڭ ماڭىندا جارىق شامدارى ءجيى ءسونىپ قالادى. سونىڭ كەسىرىنەن تۇنگى ۋاقىتتا جۇرگىزۋشىلەر بۇرىلاتىن جەردەن ءوتىپ كەتىپ, سارساڭعا ءتۇسىپ جۇرگەنى. ە.كيسيكوۆتىڭ سوزىنە سۇيەنسەك, اۆتوجولدىڭ اقىلى ۋچاسكەسىنىڭ كولىك ايرىقتارىنداعى جارىقتاندىرۋدى ءىشىنارا اجىراتۋدىڭ سەبەبى جارىق شامدارى مەن ونىڭ جيناقتاۋىشتارىنىڭ جۇمىس ىستەۋ مەرزىمىنىڭ از بولۋىنان ەكەن. سالدارىنان جۇيە مەزگىل سايىن ىستەن شىعىپ, جارىقتاندىرۋ جۇيەسى توقتاپ قالادى. «ياسسى قۇرىلىس» ۇيىمى اۆتوجولدى كۇتىپ ۇستاۋ شەڭبەرىندە جارىقتاندىرۋ ەلەمەنتتەرىن قالپىنا كەلتىرۋ جانە اۋىس­تىرۋ بويىنشا جۇ­مىس­تاردى تۇراقتى نەگىزدە جۇرگىزەدى. پوگرانيچنيك, شىدەرتى كەنتتەرىنىڭ كولىك ايرىقتارى تولىق جا­رىق­تاندىرىلدى», دەيدى ول.

كوپىر دەمەكشى, «نۇر-سۇلتان – پاۆ­لودار – قالباتاۋ – وسكەمەن» ورتا­لىق-شىعىس ءدالىزىن قايتا جاڭار­تۋ» جوباسىن ىسكە اسىرۋ بويىنشا سالىنىپ جاتقان ۇلكەن كوپىردىڭ دە قۇرىلىسى كەشەۋىل­دە­گەنىنە بىرنەشە جىل­دىڭ ءجۇزى بولدى. پاۆلوداردان سەمەي قالاسىنا بەتتەگەندە كەنجەكول اۋىلى ماڭىندا ورنالاسقان كوپىردىڭ ءالى كۇنگە اياقتالماۋى ءارى ونىڭ اينالاسى جارىقتاندىرىلمايتىنى وبلىس ورتالىعىن وڭتۇستىكتەن اينالىپ وتەتىن جۇك كولىكتەرى ءۇشىن قيىندىق تۋدى­رادى. ولار پاۆلودار قالاسىنا كىرۋ ءۇشىن قارسى جولعا شىعىپ, ۇلكەن بۇرىلىس جاساۋى كەرەك. جۇك كولىكتەرىنىڭ جۇر­گىزۋ­شى­لەرى بۇل جەردە اسىعامىز دەپ ءجۇرىپ, جول-كولىك وقيعالارى دا ورىن العان. سوندىقتان كومپانيا اتاۋلى كولىك ايى­رىمىن, ياعني كوپىردى از ۋاقىتتا سالىپ بىتىرۋگە ىنتالى. ە.كيسيكوۆ جۇمىستاردى بيىل قىركۇيەك ايىندا تولىق اياقتاۋ جوس­پارلانىپ وتىر­عانىن جەتكىزدى.

ەڭ سوڭى اۆتوباننىڭ شىدەرتى مەن تورتقۇدىق اراسىنداعى 24 شاقىرىمدىق ۋچاسكەسى دە بۇگىندە جوندەۋگە سۇرانىپ تۇر. كەزىندە مەردىگەر ۇيىم بۇل ارالىقتاعى جۇمىستاردى كەستەدەن كەشەۋىلدەتىپ ءارى ساپاسىز ورىنداپ, «قازاۆتوجول» فيليالى ونى سوتقا بەرگەن. بيىل قايتا جاڭارتۋ بويىنشا جوبا جاريالانىپ, «Construction Team رVL» جشس مەردىگەرلىك ۇيىمىمەن جۇمىستاردى اياق­تاۋ تۋرالى شارت جاسالعان ەكەن. الاي­دا ونىڭ دا قاشان تولىق جۇزەگە اسىرىلاتىنى تاعى بەلگىسىز.

مەملەكەت باسشىسى قاسىم-جومارت توقاەۆ: «جولدىڭ ساپاسىنا ايرىقشا نازار اۋدارۋ كەرەك. ەلىمىزدىڭ جولدارى ناشار ەكەنى جانە جول قۇرىلىسى سالاسىن جەمقورلىق جايلاعانى ەشكىمگە جاسىرىن ەمەس», دەگەن ەدى ۇكىمەتتىڭ كەڭەيتىلگەن وتىرىسىندا. پرەزيدەنتتىڭ ايتۋىنشا, بۇل سالادا قوردالانعان ماسەلە كوپ. تەندەردى جىل سايىن ءبىر-ەكى كومپانيا عانا ۇتىپ الاتىنى, جولداردى جوندەۋ جۇمىستارىنىڭ وتە باياۋ جۇرەتىنى, جول جوندەۋگە بولىنەتىن قاراجاتتىڭ 44 پايىزىنا مەملەكەتتىك ساتىپ الۋ قورىتىندىسى جاسالماعانى ۇلكەن پروبلەما ەكەنىن اتاپ كورسەتكەن. ءارى جۇمىس ناشار ءجۇرىپ جاتقان وڭىرلەردىڭ قاتارىندا پاۆلودار وبلىسى دا بار ەكەنىن ايتقان.

بۇل ماسەلەنى تارقاتۋ ءۇشىن «قاز­اۆتوجول» كومپانياسىنىڭ باسشى­لى­عى اسا بايىپتى ءارى شەشىمدى ىستەر اتقارادى دەپ سەنەمىز. جولداردى اقىلى ەتپەس بۇرىن ونىڭ بويىندا جولاۋشىلار ايالداپ, دەمالاتىن زامانعا ساي سەرۆيستىك ورىندار تۇرعىزعانى ابزال. سەرۆيس جاقسارسا, اقىلى جولداعى قاۋىپ-قاتەر ازايىپ, كولىك اعىنى مولايا تۇسەتىنى انىق.

پاۆلودار وبلىسى