ەلوردادا VIII حالىقارالىق ارميا ويىندارىنىڭ اشىلۋ ءراسىمى ءوتتى. ۇلتتىق قورعانىس ۋنيۆەرسيتەتىندە وتكەن حالىقارالىق ارميا ويىندارىنىڭ سالتاناتتى اشىلۋ جيىنىنا ازەربايجان, ارمەنيا, بەلارۋس, ۆەنەسۋەلا, ۆەتنام, زيمبابۆە, قازاقستان, قىتاي, قىرعىزستان, مالي, رەسەي, تاجىكستان جانە وزبەكستان قارۋلى كۇشتەرىنىڭ وكىلدەرى قاتىستى.
قورعانىس ءمينيسترى, گەنەرال-پولكوۆنيك رۋسلان جاقسىلىقوۆ قازاقستان اۋماعىنداعى VIII ارميا حالىقارالىق ويىندارىن سالتاناتتى تۇردە اشىق دەپ جاريالادى.
قازاقستان قورعانىس ۆەدومستۆوسىنىڭ باسشىسى حالىقارالىق ويىندارعا قاتىسۋشىلارعا ارناعان سوزىندە سايىستىڭ اسكەري قىزمەتشىلەردىڭ جاۋىنگەرلىك دايارلىعى مەن كاسىبي شەبەرلىگىن جەتىلدىرۋدەگى ماڭىزدىلىعىن اتاپ ءوتتى.
– اسكەري ويىندار بەيبىتشىلىك پەن ىنتىماقتاستىقتىڭ كەپىلى رەتىندە شىن مانىندە ءتۇرلى مەملەكەتتەر اسكەرلەرىنىڭ ءوزارا ءىس-قيمىلىنىڭ جاڭا جانە جەتىلدىرىلگەن ۇلگىسىنە اينالىپ, قاتىسۋشى ەلدەر قارۋلى كۇشتەرىنىڭ جاۋىنگەرلىك قابىلەتى مەن كاسىبي دەڭگەيىن ارتتىرۋعا ىقپال ەتىپ وتىر, – دەپ اتاپ ءوتتى گەنەرال-پولكوۆنيك رۋسلان جاقسىلىقوۆ.
بيىل ەلىمىزدىڭ اۋماعىندا ءۇش بايقاۋ وتكىزىلەدى. ولار – «ارتيللەريادان وق اتۋ شەبەرلەرى», «مەريديان» جانە «تاكتيكالىق مەرگەن» بايقاۋلارى. سوڭعى ەكەۋى قازاقستاندا العاش رەت ۇيىمداستىرىلىپ وتىر.
ەلىمىزدە وتەتىن سايىستاردا بارلىعى 26 كوماندا باق سىنايدى. جامبىل وبلىسىنىڭ گۆاردەيسك گارنيزونىنداعى وقۋ-جاتتىعۋ پوليگونىندا مينااتقىش ەسەپتوپتارىنىڭ ۇزدىكتەرى انىقتالادى. اقمولا وبلىسىنىڭ ششۋچينسك قالاسىنداعى «اماندىق» پوليگونىندا اسكەري توپوگرافتاردىڭ سايىسى وتسە, قاراعاندى وبلىسىنىڭ «سپاسسك» وقۋ-جاتتىعۋ ورتالىعىندا ارميا مەرگەندەرى جارىسپاق.