وسى سەنبىدە ءوڭىردىڭ اۋدان-قالالارىندا مەكتەپ تاۋارلارىنىڭ جارمەڭكەسى ءوتتى. ءىس-شارا «مەكتەپكە جول» رەسپۋبليكالىق اكتسياسىنىڭ اياسىندا ۇيىمداستىرىلىپ, جەرگىلىكتى تۇرعىندار مەن سىرتتان كەلگەن قوناقتار وقۋ قۇرالدارىن, كيىم-كەشەكتەردى ارزان باعاعا ساتىپ الدى.
پاۆلودار قالاسىنىڭ كاتاەۆ اتىنداعى وقۋشىلار سارايىنىڭ الاڭىندا ۇيىمداستىرىلعان مەكتەپ جارمەڭكەسىنە 15 كاسىپكەر اتسالىسىپ, كەلۋشىلەرگە مەكتەپكە قاجەت قۇرال-جابدىقتار مەن كيىم-كەشەكتەردىڭ مول ءتۇرىن ۇسىندى.
«جارمەڭكەدە تاۋارلارىن ساتۋعا اكەلگەن كاسىپ يەلەرىنىڭ باسىم بولىگى ءوز نيەتتەرىمەن كەلىپ وتىر. ءبىز مۇندا ساتىلاتىن ءار تاۋار بازارداعىدان ارزان ءارى ءار ساتىپ الۋشىعا بەلگىلى كولەمدە جەڭىلدىك بولۋعا ءتيىس ەكەنىن الدىن الا حابارلاعانبىز. كەلىسكەندەي, جارمەڭكەدەگى باعا ساتىپ الۋشىلار كوڭىلىنەن شىعۋدا», دەپ اتاپ ءوتتى وڭىرلىك ءبىلىم بەرۋ باسقارماسىنىڭ باس مامانى جانارا سماتاەۆا.
ۆيكتوريا ەسىمدى ساتۋشى كەلۋشىلەردىڭ دەنى داپتەر, كۇندەلىكتەر مەن قالامساپتى كوپ ساتىپ الىپ جاتقانىن جەتكىزدى. ءبىلىم كۇنى جاقىنداعاندا اتا-انالار ارنايى قۇرالداردى, اتاپ ايتقاندا, ترانسپورتەر, تسيركۋل, سىزعىش سياقتى زاتتارعا سۇرانىستى جيىلەتە تۇسەدى ەكەن. «بايقاعانىمىزداي, داپتەردى كوپ ساتىپ الىپ جاتىر. ءبىر العاندا سىرتى جۇمساق 20-30 داپتەر جانە كەمى 10-15 دانا قاتتى مۇقابالى قالىڭ داپتەر الادى. بيىل كەڭسە تاۋارلارىنىڭ باعاسى بىلتىرعىمەن سالىستىرعاندا ەكى ەسەگە جۋىق ءوستى. بىزگە كوتەرمە باعادا جەتكىزۋشى فيرمالار الداعى ۋاقىتتا مەكتەپ قۇرالدارىنىڭ قۇنى تاعى دا ءوسۋى مۇمكىن ەكەنىن ايتتى», دەيدى كاسىپكەر.
جۇقا 12 بەتتىك داپتەر بۇگىندە جەرگىلىكتى ساۋدا ۇيلەرى مەن بازارلاردا شامامەن 45 تەڭگە, قالام 100-200 تەڭگە تۇرسا, جارمەڭكەدە ءسال ارزانىراق باعادا ساتىلدى. ال سورەلەردە تۇرعان وقۋشى كيىمى مەن سپورتتىق كيىمدەردىڭ كوبى ساپا تۇرعىسىنان كوزگە تۇسە قويمادى. كاسىپكەرلەر باعاسى ارزان بولعانى ءۇشىن ارزانقول ماتەريالدان تىگىلگەن كيىم-كەشەكتەردى اكەلگەنگە ۇقسايدى. سوعان وراي, مەكتەپكە قاجەت كيىم-كەشەك ساتىپ العاندار قاراسى كوپ بولمادى.
انار بەيسەن ەسىمدى انا بيىل 3 بالاسىن مەكتەپكە دايىنداپ جاتىر. ايتۋىنشا, بازارداعى باعا شارىقتاپ تۇر. امالسىزدان, قالاداعى كەڭسە زاتتارىن ساتاتىن دۇكەندەردى جاعالاپ, ەڭ ارزان دەگەن قۇرال-جابدىقتاردى تاڭداپ ءجۇر. جارمەڭكەدە كەلۋشىلەرگە ۇسىنىلعان كەيبىر تاۋارلار بازاردىڭ نارقىمەن بىردەي. الداعى ۋاقىتتا مۇنداي جارمەڭكەلەر ۇيىمداستىرىلعاندا ءبىلىم باسقارماسى باعانى ءالى دە تومەندەتۋگە ىقپال ەتسە دەگەن تىلەگىن جەتكىزدى كوپبالالى انا.
جارمەڭكە بارىسىندا الاڭدا لوگوپەد, پسيحولوگ جانە پەدياتر ماماندار جۇمىس ىستەپ, اتا-انالارعا تەگىن اقىل-كەڭەستەر بەردى.
بيىل ءداستۇرلى اكتسيا «مەكتەپكە جول – شەكاراسىز جاقسىلىق» ۇرانىمەن وتۋدە. ماقسات – از قامتىلعان, كوپبالالى وتباسىلاردان شىققان جانە جەتىم بالالارعا, سونىمەن قاتار اتا-اناسىنىڭ قامقورلىعىنسىز قالعان وقۋشىلارعا وقۋ جىلىنىڭ باستالۋىنا وراي ماتەريالدىق قولداۋ كورسەتۋ. وڭىرلىك ءبىلىم بەرۋ باسقارماسىنىڭ مالىمەتىنشە, وقۋشىلارعا اتالعان اكتسيا شەڭبەرىندە مەكتەپكە دايىندالۋعا كومەك رەتىندە جاپپاي وقىتۋ قورىنان 1,4 ملرد تەڭگە قاراجات ءبولۋ قاراستىرىلعان. ال جىلدىڭ العاشقى جارتىسىندا 13 مىڭنان استام بالاعا 458,2 ملن تەڭگە كولەمىندە كومەك كورسەتىلدى. بۇل قاراجات ءبىلىم وردالارىندا بالالاردى ىستىق تاماق, كيىم-كەشەك, مەكتەپ قۇرالدارىمەن قامتۋعا, كۋرورتتىق ۇيىمدارعا جانە دەمالىس لاگەرلەرىنە جولداما الۋعا جۇمسالعان.
قازىر قايىرىمدىلىق ءىس-شاراسىنا جەرگىلىكتى دەمەۋشىلەردى, الەۋمەتتىك سەرىكتەستەردى, مەملەكەتتىك ۇيىمداردى تارتۋ بويىنشا جۇمىستار جۇرگىزىلۋدە. بيىل اۋىلدار ءۇشىن كاسىپكەرلەرمەن بىرلەسىپ شالعايداعى ەلدى مەكەندەرگە كوشپەلى مەكتەپ اۆتودۇكەندەرىن ۇيىمداستىرۋ قولعا الىندى. ماسەلەن, «ساعىمباي» شارۋا قوجالىعى ەرتىس اۋدانىنداعى بىرلىك نەگىزگى مەكتەبىنىڭ 6 وقۋشىسىنا كەڭسە تاۋارلارى سالىنعان سومكەلەر ساتىپ العان. ەرتىس اۋىلىنىڭ تۇرعىنى ج.ماعاۋوۆا 100 مىڭ تەڭگە سوماسىنا بالالارعا ارنالعان مەكتەپ فورماسىنىڭ 8 جيىنتىعىن تابىس ەتتى. «Incom company» جشس ديرەكتورى س.پوچينوك از قامتىلعان وتباسىلاردان شىققان 50 بالاعا 115 مىڭ تەڭگە سوماسىندا مەكتەپ جانە سپورت سومكەلەرىن الىپ بەرگەن.
وبلىس ورتالىعىنداعى №7 ورتا مەكتەپ ديرەكتورىنىڭ تاربيە ءىسى جونىندەگى ورىنباسارى مەڭتاي مۇحتاروۆانىڭ ايتۋىنشا, ءبىلىم ورداسىنا «مەكتەپكە جول» اكتسياسى ءۇشىن 1,5 ملن تەڭگە قاراجات بولىنگەن.
– 58 وقۋشىنى مەكتەپكە دايىنداۋ جوسپارلانىپ وتىر. ولارعا كەڭسە قۇرالدارى تولىعىمەن تاراتىلدى. الداعى ۋاقىتتا جىلى كۇرتەلەر, اياقكيىمدەر ساتىپ الىنباق. قازىرگى تاڭدا دەمەۋشىلەرگە دە حات جولداندى. جاۋاپ كۇتۋدەمىز, – دەيدى ۇستاز.
وسى ۋاقىتقا دەيىن جاڭا وقۋ جىلىنا ازىرلىك بويىنشا وڭىردەگى 300 بالاعا كومەك كورسەتىلگەن.
مۇرات قاپان ۇلى,«Egemen Qazaqstan»
پاۆلودار وبلىسى