اقمولا وبلىسى اكىمدىگىنىڭ قولداۋىمەن ەلورداداعى ۇلتتىق مۋزەي جانىنان قۇرىلعان رۋحاني مۇرانى عىلىمي-زەرتتەۋ ينستيتۋتى «قازاقتىڭ ءداستۇرلى مادەنيەتى» ءبولىمىنىڭ قىزمەتكەرلەرى وبلىس اۋماعىنا عىلىمي-زەرتتەۋ ەكسپەديتسياسىن جۇرگىزىپ, ناتيجەسىندە ساق داۋىرىنە ءتان قۇرباندىق تاسىن تاپتى.
بۇل تاستى جارقايىڭ اۋدانىنىڭ تۇرعىنى لەونيد دولينين دەگەن ازامات 2000 جىلى شويىندىكول اۋىلى اۋماعىندا ورنالاسقان ەسكى قورىمنان تاۋىپ العان ەكەن. ماماندار دوڭگەلەك ءپىشىندى, ءبىر جاق شەتىندە قايىرىلعان قوشقار ءمۇيىزى قاشالىپ ورنەكتەلگەن بۇل جادىگەردى ب.ز.د. III-II عاسىرعا تيەسىلى دەيدى. ياعني سول كەزدەگى حالىقتىڭ تانىم-تۇسىنىگىندە قوشقار بەينەسى توتەمدىك سيمۆوليكا- لىق ماڭىزعا يە بولعانى انىق.
ەجەلگى داستۇرلەرگە ءتان قۇرباندىق شالۋ, تاڭىرگە جالبارىنۋ سياقتى ءتۇرلى ءمىناجاتتاردى ورىنداۋدى بەينەلەيتىن مۇنداي قۇرباندىق تاستارى سيرەك كەزدەسەتىن ءارى قۇندى جادىگەر ەكەنى بەلگىلى.
زەرتتەۋشى ك.ف.سميرنوۆتىڭ پايىمداۋىنشا, مۇنداي قۇرباندىق تاستارى مولالار ىشىنەن تابىلۋى ءدىني عۇرىپتىق جاعدايلارعا بايلانىستى دەيدى. بۇگىنگى تاڭدا ەلىمىز بويىنشا مۇنداي قۇرباندىق تاستارىنىڭ 40-قا جۋىق ءتۇرى بەلگىلى بولسا, ونىڭ 10-نان استامى اقمولا, سولتۇستىك قازاقستان, قوستاناي, جامبىل, ماڭعىستاۋ, تۇركىستان وبلىستارىنىڭ مۋزەيىندە ساقتاۋلى تۇر.
وسى ورايدا, جوعارىدا ايتقانىمىزداي, اقمولا وبلىسى اۋماعىنان مادەني-رۋحاني مۇرالاردى جيناپ, زەرتتەۋدى ماقسات ەتكەن ەكسپەديتسيا مۇشەلەرى جارقايىڭ, ساندىقتاۋ, اتباسار, ەرەيمەنتاۋ, جاقسى جانە ەسىل اۋداندارىن ارالاپ, ەل ىشىندەگى قۇندىلىقتارمەن تانىسۋمەن قاتار, ولكە تاريحىنان حابارى بار كونەكوز اقساقالدارىمەن دە جۇزدەسۋدە.