نۇر-سۇلتاندا حالىقتىڭ الەۋمەتتىك وسال ساناتىنداعى تالاپكەرلەرگە وقۋ اقىسى تولەنەدى. بۇل تۋرالى ەلوردا اكىمى التاي كولگىنوۆ مالىمدەدى, دەپ حابارلايدى Egemen.kz.
ء«بىلىم الۋ جانە تۇلەكتەردىڭ ودان ءارى جۇمىسقا ورنالاسۋى ءۇشىن جاعداي جاساۋدىڭ ماڭىزى وتە زور. ماسەلەن, جاڭا وقۋ جىلىندا پەداگوگيكالىق جانە مەديتسينالىق ماماندىقتار بويىنشا جوعارى ءبىلىم الۋعا 1300-گە جۋىق گرانت ءبولۋدى جوسپارلاپ وتىرمىز. ودان بولەك الەۋمەتتىك كومەك بويىنشا جەكە باعدارلاما قاراستىرىلعان», دەپ جازدى اكىم Instagram پاراقشاسىندا.
ول الەۋمەتتىك كومەك جاعدايى تومەن وتباسىلاردان شىققان تالاپكەرلەردىڭ قالا ۋنيۆەرسيتەتتەرىندە ءبىلىم الۋى ءۇشىن وقۋ اقىسىن تولەۋ تۇرىندە الەۋمەتتىك كومەك كورسەتىلەتىنىن ايتتى.
«بۇل باعدارلاما بويىنشا قۇجاتتاردى قابىلداۋ 21 تامىزعا دەيىن (قوسا العاندا) جالعاسادى. وقۋ اقىسىن تولەۋ تۇرىندەگى الەۋمەتتىك كومەك جەتىم بالالار, بالالار ءۇيىنىڭ تۇلەكتەرى, بالا كۇنىنەن مۇگەدەك, كوپبالالى وتباسىلاردان شىققان بالالار جانە ت.ب. اراسىندا بولىنەدى.
ءبىلىم الۋ ەڭبەك نارىعىندا سۇرانىسقا يە ماماندىقتار بويىنشا جۇرگىزىلەدى: بيوتەحنولوگيا, ەسەپتەۋ تەحنيكاسى جانە باعدارلامالىق قامتاماسىز ەتۋ, گەودەزيا جانە كارتوگرافيا (web-كارتوگرافيا), ساۋلەت (BIM-مەنەدجەر جوبالاۋشى), مەكتەپكە دەيىنگى وقىتۋ, جەرگە ورنالاستىرۋ-اگروينجەنەريا, ينجەنەر, جالپى مەديتسينا, پەداگوگيكا, IT مامانى, الەۋمەتتىك جۇمىس, جىلۋ ەنەرگەتيكاسى, ازىق-ت ۇلىك ونىمدەرىنىڭ تەحنولوگياسى, ەلەكتر ەنەرگەتيكاسى جانە ت.ب», دەدى كولگىنوۆ.
ەلودا اكىمىنىڭ ايتۋىنشا, قالانىڭ جوعارى وقۋ ورىندارىندا وقۋ اقىسىن تولەۋ تۇرىندە الەۋمەتتىك كومەك الۋ ءۇشىن قالانىڭ جۇمىسپەن قامتۋ جانە الەۋمەتتىك قورعاۋ باسقارماسىنا (بەيبىتشىلىك كوشەسى, 9) حابارلاسۋ كەرەك نەمەسە قۇجاتتاردى ەلەكتروندى تۇردە ۆەب-پورتالداعى «ەلەكتروندىق ءوتىنىش» ءبولىمى ارقىلى تاپسىرۋ قاجەت.
«الەۋمەتتىك كومەك وتباسىنىڭ ءبىر مۇشەسى ءۇشىن 4 ەڭ تومەنگى كۇنكورىس دەڭگەيى مولشەرىنەن (190 088 تەڭگە) اسپايتىن, جان باسىنا شاققانداعى ورتاشا تابىسى بولعان كەزدە اقشالاي تولەم تۇرىندە تاعايىندالادى. تولىق اقپاراتتى اكىمدىكتىڭ رەسمي سايتىنان وقۋعا بولادى», دەپ جازدى ول.