ەكىجىلدىق ۇزىلىستەن كەيىن «سالاماتتى قازاقستان» مەديتسينالىق پويىزى وڭىردەگى شالعاي جاتقان ستانسالاردى ارالاپ, تۇرعىنداردى دارىگەرلىك تەكسەرۋدەن وتكىزۋدە. بيىل اق جەلەڭدىلەر پاۆلودار وبلىسىندا توعىز ەلدى مەكەندە ايالداپ, اۋىل تۇرعىندارىنا كاسىبي مەديتسينالىق كومەك كورسەتپەك.
«سالاماتتى قازاقستان» مامانداندىرىلعان مەديتسينالىق پويىزى پاۆلودار وبلىسىنىڭ شالعايداعى ستانسالارى مەن ولارعا جاقىن ورنالاسقان ەلدى مەكەندەردىڭ حالقىن مەديتسينالىق تەكسەرۋدەن وتكىزۋدە. دارىگەرلىك قىزمەت اقىسىز, پۇلسىز كورسەتىلەدى. پويىز 31 شىلدە كۇنى ماي رازەزىندە ايالداسا, ودان ءارى جۇمىسكەر, كوكتوبە, قۇركولدى بەتكە الدى. ماي اۋدانىنىڭ حالقىن قاراپ بىتكەن سوڭ شارباقتى وڭىرىنە باعىتىن بۇرىپ, ودان ءارى اقسۋدىڭ بىرقاتار اۋىلىن ارالايدى دەپ جوسپارلانعان. سوڭعى ايالداما – شىدەرتى ستانساسى.
2010 جىلدان بەرى جالعاسىپ كەلە جاتقان مەديتسينالىق پويىزدار قايىرىمدىلىق جوبالارى اياسىندا ۇيىمداستىرىلادى. جالپى, ەلىمىز بويىنشا مۇنداي پويىزدىڭ ەكى بىردەي باعىتى بار. ونىڭ ءبىرى – «جاردەم» پويىزى مامىر ايىنىڭ سوڭىنان بەرى جۇمىس ىستەپ جاتسا, «سالاماتتى قازاقستان» پويىزى 20 ماۋسىم كۇنى الماتى وبلىسىنىڭ بايسەركە ستانساسىنان قوزعالىپ, بۇگىندە ءبىزدىڭ وڭىرگە جەتىپ وتىرعان جايى بار.
«سالاماتتى قازاقستان» پويىزىنىڭ جەتەكشىسى امان قاسەنوۆتىڭ ايتۋىنشا, جىلجىمالى مەديتسينالىق قۇرام العاشقى مەديتسينالىق-سانيتارلىق جانە كونسۋلتاتيۆتىك-دياگنوستيكالىق كومەك كورسەتۋگە باعىتتالعان.
– پويىزدا 24 بىلىكتى دارىگەر بار. بارلىعى الماتى قالاسىنداعى تانىمال كلينيكالاردا ىستەيتىن بىلىكتى ماماندار. اق جەلەڭدىلەر زەرتحانالىق ادىستەردى قولدانا وتىرىپ, اۋىل تۇرعىندارىن دارىگەرلىك تەكسەرىستەن وتكىزەدى. قاجەت بولعان جاعدايدا شاعىن وپەراتسيا جۇرگىزىپ, ەمحاناسى جوق شالعاي اۋىلداردىڭ تۇرعىندارىن جاقىن جەردەگى ەمدەۋ مەكەمەلەرىنە جولدامامەن باعىتتاي الامىز. مۇندا تەراپەۆت, پەدياتر, كارديولوگ, نەۆروپاتولوگ, كوز, لور دارىگەرى, گينەكولوگ, حيرۋرگ, ۋرولوگ, ماممولوگ جانە ءتىس دارىگەرى بارىن اتاپ وتكەن ءجون. بيىل بىلىكتى مامانداردىڭ قاتارى پسيحولوگ جانە دەرماتوۆەنەرولوگپەن تولىقتى. دەنساۋلىق پويىزى پاندەمياعا بايلانىستى سوڭعى ەكى جىلدا ۇيىمداستىرىلماي قالعانى ءمالىم. بيىل قايتا جاندانعانى اۋىل حالقىن قۋانتىپ وتىر. قابىلداۋىمىزعا كەلگەن جۇرتشىلىق ريزاشىلىعىن ايتۋدا, – دەيدى پويىز باسشىسى.
كەشەندە قاجەت بولعان جاعدايدا كەڭەيتىلگەن جالپى جانە بيوحيميالىق تالداۋلار, رەنتگەنوگرافيا مەن فليۋروگرافيا, ىشكى اعزالار مەن تامىرلاردىڭ ۋدز-زەرتتەۋلەرىن, ەلەكتروكارديوگرامما, گاستروفيبروسكوپيا جانە دياگنوستيكالىق زەرتتەۋلەردىڭ باسقا دا تۇرلەرىن جۇرگىزۋگە مۇمكىندىك بار. بيىل ستاموتولوگيالىق قۇرىلعىلار جاڭارتىلىپ, اۋىل تۇرعىندارىنىڭ تىستەرىن بۇتىندەۋدە بۇرىنعىدان دا ساپالى قىزمەت كورسەتۋ مۇمكىن بولىپ وتىر.
بۇعان دەيىن اباي وبلىسىن ارالاپ كەلگەن دارىگەرلەردىڭ اقپاراتىنا سۇيەنسەك, اۋىل ادامدارى گينەكولوگ, جۇرەك جانە ءتىس دارىگەرلەرىنىڭ كومەگىنە ءجيى جۇگىنەدى. ۋدز-زەرتتەۋگە دە كەزەك قالىپتاسىپ قالادى ەكەن. ماي اۋىلىنىڭ تۇرعىنى, زەينەتكەر ماقپۋزا بەيسەكەنوۆا اياق-قولى ءجيى قاقساپ, بەل-ومىرتقا جۇيەسى اۋىراتىنىن ايتادى. مۇندا ول جالپى تاجىريبە دارىگەرىنىڭ كومەگىنە جۇگىنىپ, حيرۋرگتىڭ اقىل-كەڭەسىن الدى.
العاشقى كۇنى ماي ستانساسىنا توقتاعان پويىزعا اقجار, قاراتەرەك جانە ماي اۋىلدىق وكرۋگتەرىنىڭ تۇرعىندارى قارالىپ, دارىگەرلىك تەكسەرۋدەن وتكەن. ماي اۋدانىنىڭ ىشكى ساياسات جانە تىلدەردى دامىتۋ ءبولىمىنىڭ باسشىسى جايرانگۇل راحمانبەرگەنوۆانىڭ سوزىنشە, بۇل ءۇش اۋماقتا 2 مىڭعا جۋىق ادام تۇرادى. جەرگىلىكتى حالىق اراعا ەكى جىل سالىپ جالعاسىن تاپقان مەديتسينالىق پويىزدىڭ جۇمىسىنا كوڭىلدەرى تولاتىنىن ايتتى.
«سالاماتتى قازاقستان» كەشەنىنىڭ دارىگەرلەرى 2 قاراشاعا دەيىن ەلىمىز بويىنشا 67 ستانسانى ارالاپ, جالپى سانى 60 مىڭ ادامدى قامتىماق ويلارى بار. پاۆلودار وبلىسىنان سوڭ پويىز نۇر-سۇلتان قالاسىنا, ودان ءارى كوكشەتاۋ, قوستاناي, قاراعاندى, ۇلىتاۋ وڭىرلەرىنە اتتانباق.
جوبانى «Samruk-Kazyna Trust» الەۋمەتتىك جوبالاردى دامىتۋ قورى دەنساۋلىق ساقتاۋ مينيسترلىگىنىڭ قاتىسۋىمەن, «قازاقستان تەمىر جولى» ۇك» اق جانىنداعى «الەۋمەتتىك جوبالار قورى» كورپوراتيۆتىك قورىمەن بىرلەسىپ ىسكە اسىرىپ جاتقانىن ايتىپ وتەيىك.
مۇرات قاپان ۇلى,
جۋرناليست
پاۆلودار وبلىسى,
ماي اۋدانى