بالالاردى قولداۋعا 2,5 ملرد تەڭگەدەن استام قارجى ءبولىندى. بۇل سوماعا وسى جىلدىڭ ءبىرىنشى جارتىسىندا Samruk-Kazyna Trust الەۋمەتتىك جوبالاردى دامىتۋ قورى 18 مىڭعا جۋىق بالاعا ارنالعان قايىرىمدىلىق جوبالارىن جۇزەگە اسىردى. جوبالار دەنساۋلىق ساقتاۋ, ءبىلىم بەرۋ, بۇقارالىق سپورت سالالارىنا, سونداي-اق حالىقتىڭ الەۋمەتتىك وسال توپتارىنا باعىتتالدى.
كورپوراتيۆتىك قوردىڭ باسشىسى الفيا اديەۆانىڭ ايتۋىنشا, قور وسكەلەڭ ۇرپاققا جاعداي جاساۋ باعىتىنا ايرىقشا نازار اۋدارىپ كەلەدى. ماقسات – ەلدەگى بالالارعا دەنساۋلىق جاعدايىنا نەمەسە الەۋمەتتىك دەڭگەيىنە قاراماستان, ساپالى ءبىلىم الۋ ءۇشىن الاڭسىز, باقىتتى, سالاماتتى ءومىر ورتاسىن قالىپتاستىرۋ.
بەلگىلى بولعانداي, قوردىڭ 2022 جىلعا ارنالعان قايىرىمدىلىق باعدارلاماسى 10 ملرد تەڭگەنى قۇرايدى. الەۋمەتتىك جوبالاردى قارجىلاندىرۋعا وتىنىمدەر Samruk-Kazyna Trust سايتىندا ورنالاستىرىلعان قايىرىمدىلىق كومەك كورسەتۋ ەرەجەسىنە سايكەس, ۇكىمەتتىك ەمەس ۇيىمداردان قابىلدانادى. ماقۇلدانعان جوبالار اراسىندا اۋتيستىك سپەكتردىڭ اۋرۋلارى مەن مەنتالدى بۇزىلىستارى بار بالالارعا ارنالعان 8 ورتالىق قۇرۋ, دامۋى بۇزىلعان جانە ولاردىڭ تۋىنداۋ قاۋپى بار بالالارعا ەرتە دياگنوستيكالىق جانە ابيليتاتسيالىق كومەك كورسەتۋ بويىنشا 13 ەرتە ارالاسۋ ورتالىعىن قۇرۋ, جاڭاوزەن قالاسىنىڭ مەكتەپتەرىن جيھازبەن جانە ينتەراكتيۆتى پانەلدەرمەن جابدىقتاۋ, وتباسىلىق اۋلا كلۋبتارىن دەمەۋ ارقىلى حالىقتىڭ الەۋمەتتىك وسال توپتارىنان شىققان بالالار ءۇشىن ءتۇرلى سەكتسيالار ۇيىمداستىرۋ, سونداي-اق اتىراۋدا ەرەكشە بالالارعا تەگىن كومەك كورسەتۋ باستاماسى بار.
– Samruk-Kazyna Trust قورى بۇگىندە قازاقستاننىڭ شالعاي ەلدى مەكەندەرىنە ساپالى مەديتسينالىق كومەك كورسەتۋ ماقساتىندا «جاردەم» جانە «سالاماتتى قازاقستان» پويىزدارىن تابىستى ىسكە قوستى. قاراعاندىدا «باسقارىلاتىن گيپوتەرميا» يننوۆاتسيالىق جوباسى نارەستەلەردىڭ شەتىنەۋى مەن مۇگەدەكتىگىن ازايتۋدا. شىمكەنت قالاسىندا نەيرو-ورتوپەديالىق بۇزۋشىلىقتارى بار بالالاردى وڭالتۋ قولعا الىنسا, «بالالارعا ءومىر سىيلا», ء«اۋتيزمدى جەڭەمىز!», «جەتىم بالالارسىز قازاقستان» جوبالارى دا جالعاسىن تاپپاق. اعا بۋىن وكىلدەرىنە قامقورلىق تانىتۋدا «تاعىلىم» جانە «جەڭىس» جوبالارى جۇرگىزىلەدى. بۇدان باسقا, Samruk-Kazyna Trust مەملەكەتتىك ءتىلدىڭ كوكجيەگىن كەڭەيتۋدە Soyle جوباسىن قولداۋدى ءجون دەپ تاپتى, – دەيدى ا.اديەۆا.
ونىڭ ايتۋىنشا, وزگەرىستەر تۇرعىسىندا قور قىزمەت باعىتتارىن وڭتايلاندىرىپ, جوبالاردى قارجىلاندىرۋ جايىن بەكىتەتىن قامقورشىلىق كەڭەس قۇرامىن كەڭەيتۋدە. سونىمەن بىرگە قور سايتى جاڭارىپ, «سامۇرىق-قازىنا» اق قوعامدىق كەڭەسىنە ەسەپ بەرۋ جولعا قويىلدى.
2023 جىلدان باستاپ قايىرىمدىلىق جوبالارىن ىسكە اسىرۋ كەزىندە ولاردىڭ 30 پايىزىندا ەلدىك جوبالارعا كوڭىل بولىنسە, ال 70 پايىزىندا «سامۇرىق-قازىنا» اق كومپانيالارى بار وڭىرلەردەگى جەرگىلىكتى جوبالار مەن الەۋمەتتىك ينۆەستيتسيالار باعدارلامالارىنا باسىمدىق بەرىلەدى. جوبالارعا بايلانىستى قوردىڭ ءوزى باستاما كوتەرە العاننان تىس, جەرگىلىكتى ۇكىمەتتىك ەمەس ۇيىمدار دا وعان ءوتىنىم بەرە الادى.
– ۇكىمەتتىك ەمەس ۇيىمدارمەن جۇمىس ءۇشىن ىسكە قوسىلعان +7 (7172) 57-68-98 جەدەل جەلى نومىرىندە قور قىزمەتكەرلەرى وتىنىمدەردى قابىلداۋ قاعيدالارىن ءتۇسىندىرىپ, كەرى بايلانىس ورناتقان. قوردىڭ قىزمەتىن ءتۇسىندىرۋ ءۇشىن تۇراقتى نەگىزدە تىكەلەي ءىس-شارالار وتكىزىلەدى. جىل باسىنان بەرى 7 وبلىستا جانە ەلوردادا 600-دەن استام ۇكىمەتتىك ەمەس ۇيىمنىڭ قاتىسۋىمەن كەزدەسۋلەر ۇيىمداستىرىلدى. ايماقتىق ۇكىمەتتىك ەمەس ۇيىمداردان ەلىمىزدىڭ ەڭ شالعاي جەرلەرىندەگى ادامداردىڭ ءومىرىن قالاي جاقسارتۋعا بولاتىنى تۋرالى قىزىقتى يدەيالار كۇتەمىز. بۇل تۇستا قور ازاماتتىق سەكتوردى شاعىن باستامالارىنىڭ اۋقىمىن كەڭەيتۋگە شابىتتاندىرۋعا كۇش سالماق. مىسالى, شاعىن قالانىڭ باستامالارى بۇكىل وبلىس, ءتىپتى بارشا ەل ءۇشىن يگىلىكتى بولۋى مۇمكىن. سوندىقتان بەلسەندى ۇكىمەتتىك ەمەس ۇيىمداردى ىنتىماقتاستىققا شاقىرامىز, – دەيدى قوردىڭ باس ديرەكتورى.