ليۆياداعى احۋال الەمدى الاڭداتىپ وتىر. اراب مەملەكەتتەرى ليگاسىنىڭ باس حاتشىسى احمەد ءابۋ گايت وڭداعى قاقتىعىستار ايماق ەلدەرى ءۇشىن الاڭداۋشىلىق تۋعىزاتىنىن اتاپ ءوتتى.
اراب مەملەكەتتەرى ليگاسىنىڭ رەسمي Facebook پاراقشاسىنان ءابۋ گايت ليۆياداعى سوڭعى كۇندەرى بولعان قاقتىعىستارعا قاتىستى جازباشا مالىمدەمە جاسادى. باس حاتشى ءابۋ گايت ليۆيانىڭ تريپولي جانە ميسراتا قالالارىندا قارۋلى قاقتىعىس كەزىندە ادام شىعىنى مەن جاراقات العانداردىڭ بار ەكەنىنە توقتالىپ, «ليۆيالىقتاردىڭ قايتادان قولعا قارۋ الۋى الاڭداتارلىق جاعداي» ەكەنىن ايتتى.
ەستەرىڭىزگە سالا كەتەيىك, وتكەن بەيسەنبىدە ليۆيانىڭ باتىس بولىگىندە ۇستەمدىككە يە ء«ار-رادا» جانە «تريپولي رەۆوليۋتسيونەرلەر توبى» دەپ اتالاتىن ەكى قارۋلى تاراپ اراسىنداعى قاقتىعىس باستالعان. سونىمەن قاتار ەكى توپ اراسىنا اراشا ءتۇسۋ ماقساتىمەن «444 بريگاداسى» دا اتىس ايماعىنا ءوز كۇشتەرىن ورنالاستىردى. سوڭعى دەرەكتەر بويىنشا قاقتىعىس سالدارىنان 16 ادام قازا تاۋىپ, 52 ادام جاراقات العان. قاقتىعىس كەزىندە ءتريپوليدىڭ اين زارا ايماعىنا 2020 جىلدان بەرى العاش رەت زىمىران قۇلادى. قارۋلى قاقتىعىس ۋاقىتىندا استانانىڭ جالعىز جۇمىس ىستەيتىن اۋەجايى ميتيگا بىرنەشە ساعاتقا جابىلىپ, سول كۇنى كەشقۇرىم قايتا اشىلدى.
جانجالدان كەيىن ۋاقىتشا ۇكىمەتتىڭ پرەمەر-ءمينيسترى ابدەل حاميد دبەيبانىڭ ۇكىمەتى ىشكى ىستەر ءمينيسترى حالەد مازەندى قىزمەتىنەن بوساتىپ, ونىڭ ورنىنا ۋاقىتشا ايماقتىق اكىمشىلىك ءمينيسترى بادەر ەددين ءال-ءتۋميدى تاعايىندادى.
اراب مەملەكەتتەرى ليگاسىنىڭ باس حاتشىسى ءابۋ گايت ليۆيا بيلىگىنە ەلدەگى قاۋىپسىزدىكتى قامتاماسىز ەتۋ ءۇشىن قاجەتتى شارالاردى جۇزەگە اسىرۋ كەرەگىن اتاپ ءوتتى. سونداي-اق اراب ليگاسىنىڭ ءباسپاسوز حاتشىسى دجامال رۋشدي ليۆيانىڭ ساياسي قايراتكەرلەرىن ەلدەگى تۇراقتىلىقتى قالپىنا كەلتىرۋدىڭ ماڭىزدى بولىگى رەتىندە مەملەكەتتىك مەكەمەلەردى, ەڭ الدىمەن, اسكەري جانە قاۋىپسىزدىك مەكەمەلەرىن ءبىر بيلىك اياسىنا جيناقتاۋ جاۋاپكەرشىلىگىن ءوز موينىنا الۋعا شاقىردى.
اقش-تىڭ تريپوليدەگى ەلشىسى جانە ليۆياداعى ارنايى وكىلى ريچارد ب. نورلاند ەلدەگى احۋالعا بايلانىستى جەرگىلىكتى ۇكىمەت مۇشەلەرىمەن تەلەفون ارقىلى سويلەسكەن. اتاپ ايتقاندا, ۇلتتىق بىرلىك ۇكىمەتىنىڭ پرەمەر-ءمينيسترى ابدەل حاميد ديبەيبە مەن توبرۋكتاعى وكىلدەر پالاتاسىنىڭ پرەمەر-ءمينيسترى بولىپ تاعايىندالعان فەتحي باشاگانى زورلىق-زومبىلىقتان اۋلاق بولۋعا شاقىرعان. ەلدە تىنىشتىق ورناتۋ ىسىنە ارالاسۋعا دايىن ەكەنىن ءبىلدىردى, دەپ جازادى اقش-تىڭ تريپوليدەگى ەلشىلىگىنىڭ Twitter اككاۋنتى.
«بۇگىن كەشكە ديبەيبە جانە باشاگامەن تەلەفون ارقىلى سويلەسىپ, ەكى تاراپتىڭ ەلدەگى سوڭعى قايعىلى وقيعادان كەيىن تىنىشتىقتى ساقتاۋعا جانە زورلىق-زومبىلىقتان اۋلاق بولۋعا بەل بۋعانىن ەستىگەندە قۋاندىم», دەپ جازدى ر.نورلاند تۋيتتەردەگى پاراقشاسىندا. سونىمەن قاتار نورلاند ءوز سوزىندە «تۋىنداعان ماسەلەنى تەك سايلاۋ ارقىلى شەشۋگە بولادى» دەپ قىسقامەرزىمدە سايلاۋ ۇيىمداستىرۋ ءۇشىن ناقتى شارا قابىلداۋدىڭ قاجەتىن اتاپ ءوتتى.
جالپى, ليۆيادا 2011 جىلعى رەۆوليۋتسيادان كەيىن, جەرگىلىكتى نارازى توپ ناتو-نىڭ قولداۋىمەن مۋاممار كاددافيدەن بيلىكتى تارتىپ العان ەدى. ونىڭ ولىمىنەن كەيىن ىشكى توپتار اراسىنداعى ءوزارا قارۋلى كۇرەس بۇگىنگە دەيىن جالعاسىپ كەلەدى. ەكى پرەمەر-ءمينيستردىڭ بيلىككە تالاسۋ ارەكەتى ليۆيادا بىرنەشە ايدان بەرى شيەلەنىسكە سەبەپ بولىپ تۇر. ماۋسىم ايىندا دا ەل استاناسىندا سۋك سۋلەسا ايماعىندا «ناۆاسي بريگاداسى» مەن «تۇراقتىلىقتى قولداۋ بولىمشەسى» اراسىندا قاقتىعىستار باستالىپ, دۇربەلەڭ جاعداي بولعان ەدى.
شىعىستاعى اسكەري قولباسشى حاليفا حافتاردىڭ ءتريپوليدى كۇشپەن باسىپ الۋ ارەكەتىنە ەكى جىل تولدى. ساراپشىلار ەندى ەلدە جاڭا ۇلكەن قاقتىعىس تۋىنداۋى مۇمكىن دەپ قاۋىپتەنىپ وتىر.
ءمادينا امانبەكقىزى,
«Egemen Qazaqstan»