وسى ۋاقىتقا دەيىن قادىرىنە, قاسيەتىنە جەتە الماي جۇرگەن كورىكتى جەرلەرىمىزدى سوڭعى جىلدارى شىنايى باعالاي باستادىق. الەمدى كوروناۆيرۋس دەي-تۇعىن دەرت جايلاعالى, شەكارالارعا شەكتەۋ قويىلىپ, ءوز ەلىمىزدى ارالاپ كەتتىك. ءسويتىپ, شەتەلگە بەرگىسىز اسەم ولكەمىزدى جاقىن تاني تۇستىك. ىشكى ءتۋريزمدى دامىتۋ ءۇشىن مەملەكەت تاراپىنان دا ءتۇرلى باعدارلامالار قابىلدانىپ, شىعىستاعى بىرنەشە تۋريستىك نىسانعا ەرەكشە باسىمدىق بەرىلدى.
شىعىس قازاقساندا ءتۋريزمنىڭ قاي سالاسى بولماسىن, دامىتۋعا قولايلى ءوڭىر. مەملەكەت تاراپىنان كوڭىل ءبولىنىپ وتىرعان ورىندارعا توقتالار بولساق, كاتونقاراعاي ۇلتتىق تابيعي پاركى جانە ريددەر قالاسى مەن گلۋبوكوە اۋدانىنداعى تاۋ شاڭعىسى كلاستەرى. بۇل تۋرالى وبلىستىق كاسىپكەرلىك جانە يندۋستريالدى-يننوۆاتسيالىق دامۋ باسقارماسى باسشىسىنىڭ ورىنباسارى مارات قاباقوۆ ايتقان ەدى. كاتونقاراعاي اۋدانىنداعى ۇلتتىق تابيعي پاركىنىڭ اۋماعىندا ەكولوگيالىق جانە اۋىلدىق ءتۋريزمدى دامىتۋدىڭ مۇمكىندىگى مول. ەلىمىزدەگى ەڭ ءىرى ۇلتتىق پارك بولعاندىقتان شىعار, مۇندا جالپى ۇزىندىعى 680 شاقىرىم بولاتىن 14 تۋريستىك مارشرۋت پەن سوقپاق بار.
– اۋداندا اۋىلدىق ءتۋريزمدى دوڭگەلەتۋ ءۇشىن جان-جاقتى جۇمىستار جۇرگىزىلۋدە. كاسىپكەرلەر پالاتاسىمەن بىرلەسىپ, بەرەل اۋىلىنىڭ 24 تۇرعىنىنا كاسىپكەرلىك نەگىزدەرىنە وقىتۋ جۇرگىزىلدى. تىركەلگەن 18 كاسىپكەردىڭ 15-ءى «ەڭبەك» باعدارلاماسى بويىنشا 583 مىڭ تەڭگەدەن گرانت الدى. ءبىر جوباعا «بجك – 2025» باعدارلاماسى شەڭبەرىندە 5 ملن تەڭگە ۇلەستىرىلدى, – دەپ اتاپ ءوتتى مارات قاباقوۆ.
سونىمەن قاتار «كاتونقاراعاي اۋدانىنىڭ تۇراقتى دامۋى» قوعامدىق قورى ءاربىر كاسىپكەرگە 500 مىڭ تەڭگەدەن گرانت بەرگەنى ۇلكەن كومەك بولدى. ول قاراجاتقا كاسىپكەرلەر اعىمدىق جوندەۋ جۇمىستارىن جۇرگىزدى, جيھازدارىن جاڭارتتى, سەرۋەن ءۇشىن ات ساتىپ الدى. ءسويتىپ, ماۋسىم ايىنان باستاپ العاشقى تۋريستەردى قابىلداۋدى باستاپ كەتكەن. سوڭعى جىلدارى تۋريستەر لەگى جىل سايىن ارتىپ كەلەدى.
وسى ورايدا ايتا كەتەرلىگى, ۇلكەن نارىن اۋىلىندا تۋريستىك-اقپاراتتىق ورتالىق قۇرۋ جوباسى جۇزەگە اسىرىلىپ جاتىر. بۇل تۋريستىك نىسان 10 تۇراقتى جۇمىس ورنىن قۇرا وتىرىپ, جەرگىلىكتى تۋريستىك ونىمدەر تۋرالى اقپارات بەرۋ جونىندەگى سەرۆيستىك قىزمەتتى اتقاراتىن بولادى. ياعني اۋدانعا كەلگەن تۋريست سول جەردەن كەرەكتى اقپاراتىن الىپ قانا قويمايدى, وزىنە قاجەت قوناق ۇيىنە دەيىن تاڭداپ الادى.
ايتقانداي, جىل باسىنان بەرى كاتونقاراعاي اۋدانىنىڭ ورەل اۋىلىندا 150 توسەكتىك ورىنعا ارنالعان «مۇزتاۋ» تۋريستىك كەشەنى اشىلدى. وسكەمەندە 200 توسەكتىك ورىنعا ارنالعان 3 قوناق ءۇي جۇمىسىن باستايدى. بۇقتىرما سۋ قويماسىنداعى دەمالىس بازاسىنىڭ قۇرىلىسى دا ءتامامدالىپ قالدى. ال گلۋبوكوە اۋدانى مەن ريددەر قالاسىنداعى تاۋ شاڭعى بازاسى قىستاي ۇزدىكسىز قىزمەت كورسەتىپ كەلەدى.
شىعىس قازاقستان وبلىسى