ءبىز دە ۇزاق ويلاندىق, مۇمكىن ول دا ۇزاق ويلانعان بولار. ءبىز دە قىزىقتىرار ەشتەنە تاپپادىق, مۇمكىن ول دا ەشتەنە كورمەگەن بولار. ءبىزدىڭ اينالىپ وتكىمىز كەلدى, بىراق ول اينالىپ وتە المادى. سۇلۋلىقتان قالايشا اينالىپ وتۋگە بولادى, سول ماڭدا ماڭگىلىك وكىنىشىڭىز قالىپ كەتسە قايتەر ەدىڭىز!؟ ءسىز دە كىدىرە تۇرىڭىز, پاۋەسكەگە وتىرعان پەريزات بۇرىلىپ قاراعانشا.
جان بەرو. ءپاريجدىڭ زايىرلى قوعامىنىڭ بەت-بەينەسىن, ەستەتيكاسىن, مىنەزىن, قالىپ-كەسكىنىن, ءتىپتى كيىم كيىسىنە دەيىن بىزگە سىيلاعان سۋرەتكەر. ول فرانتسۋز سۇلۋلىق سالونىنىڭ سۋرەتشىسى. «ۆيكتوريا» كارتيناسىنا قاراڭىزشى... كوشىرمە مە, جوق كوركەم كەسكىندەمە مە؟ قالاي ويلايسىز؟ ءيا, مۇندا جارقىن كومپوزيتسيا, كوركەمدىك شەبەرلىك, قورشاعان دۇنيەنىڭ يدەاليستىك كورىنىسى بار. تالعامپاز بيكەشتىڭ تازالىعى ءھام تاكاپپارلىعى انىق بايقالادى.
ولاي بولسا پاريجگە عاشىق بولماۋ قىلمىس قوي. بەرو اسەم شاھاردىڭ جاڭا كەلبەتىن سىزدى. قالا تۇرعىندارىنىڭ قاعيداسىن, جوعارى قوعامنىڭ تالعامپاز حانىمدارىن مەن ءمارت مىرزالارىن, ءتىپتى قاراپايىم ادامداردىڭ ءومىر كۇندەلىگىن باياندادى. مۇنداعى سيقىرلى سيۋجەتتەر الۋان ءتۇرلى جانە شەبەر دەتالدارمەن ادىپتەلگەن. ءتۇرلى-ءتۇستى رەاليزم دەرسىز.
الايدا ساراپشىلار وسىعان بايلانىستى شەبەردى اياۋسىز سىنعا الدى. نەگە ونىڭ باستى كەيىپكەرلەرى ماڭعاز, دوكەي كەلەدى؟ بۇل قارابايىرلىق نە جاساندىلىق ەمەس پە؟ جوق, كەشىرىپ قويىڭىز, ولاي ەمەس. ونىڭ بەينەلەۋ تەحنيكاسى فوتوگرافيالىق جازۋ ستيلىنە جاقىن. سونىسىمەن دە اسەرلى وزگەگە ۇقسامايدى. ونەرتانۋشىلار مۇنداي ستيل كوممەرتسيالىق تۇرعىدان ىڭعايلى, كوپشىلىكتىڭ تالعامىنا سايكەس كەلەدى دەۋى مۇمكىن. ايتا بەرسىن...
دەگەنمەن, «ۆيكتوريا» سياقتى كارتينالار ءوز جانكۇيەرىن تاپتى. وكىنىشكە قاراي, بۇل شىعارما جايلى ناقتى اقپارات ساقتالماعان. سوندىقتان بۇل اتاۋ تۋىندىداعى ايەلدىڭ اتىمەن بەرىلدى مە, الدە باسقا ماعىنادا قولداندى ما بەلگىسىز. پاۋەسكەدە كەلە جاتقان, ابايسىزدا نەمەسە ادەيى «كادرعا ءتۇسىپ قالعان» بيكەش بەينەسى جاڭا ۋاقىت پەن جاڭا يدەيالاردىڭ جەمىسى. اشىق تۇستەر, كەڭ شتريحتار, شەبەردىڭ جىلدام تەحنيكاسى قىزىقتىرادى.
سۋرەتتىڭ وڭ جاعى تولىق جازىلماعان. ايتسە دە بۇل بىتپەگەن جۇمىس ەمەس, قۇددى ەسكيز سياقتى. بەرو وسى تەحنيكا ارقىلى فرانتسۋزدار ماقتاعان «عاجايىپ ءداۋىردىڭ» الىستاپ بارا جاتقانىن مەڭزەپ تۇرعانداي. سوندىقتان ونىڭ شىعارمالارى ءبىر مەزگىلدە جاڭارعان پاريجگە جاڭا كوزقاراس رەتىندە قابىلدانىپ, وتكەندى ەسكە تۇسىرۋگە, وتكەننىڭ مۇڭدى جاڭعىرىعىمەن جۇرەكتى جىلىتۋعا ۇمتىلادى.