ەلىمىزدىڭ كۇش قۇرىلىمدارى اراسىندا سپورتتىڭ بەس تۇرىنەن پرەزيدەنتتىك كوپسايىس ءوتتى. بۇل تۋرالى قر ءىىم ءباسپاسوز قىزمەتىنىڭ وكىلى اقتوتى بورانوۆا حابارلادى, دەپ جازادى Egemen.kz.
«قوستانايدا «دينامو» دەنە شىنىقتىرۋ-سپورت قوعامىنىڭ ۆەدومستۆوارالىق سپارتاكياداسى اياسىندا رەسپۋبليكانىڭ بارلىق كۇشتىك قۇرىلىمدارى قىزمەتكەرلەرى اراسىندا سپورتتىڭ بەس تۇرىنەن پرەزيدەنتتىك كوپسايىس ءوتتى. جارىستا 100 جانە 3000 مەترگە جۇگىرۋ, 100 مەترگە ءجۇزۋ, ماكاروۆ تاپانشاسىنان اتۋ جانە گراناتا لاقتىرۋ بويىنشا كۇش سىناستى», دەدى اقتوتى بورانوۆا ۆەدومستۆونىڭ ءباسپاسوز قىزمەتى الاڭىندا.
ونىڭ ايتۋىنشا, جارىسقا بارلىق پوليتسيا دەپارتامەنتتەرى, ءىىم, تجم, ۇقك شەكارا قىزمەتىنىڭ, ۇلتتىق ۇلاننىڭ, قارجى مونيتورينگى اگەنتتىگىنىڭ جانە ءىىم مامانداندىرىلعان كۇزەت قىزمەتىنىڭ 24 كومانداسى قاتىسقان.
«جارىس قورىتىندىسى بويىنشا قۇقىق قورعاۋ ورگاندارى اراسىندا 1-ورىندى ءىىم كومانداسى, 2-ورىندى ۇلتتىق ۇلان, 3-ورىندى ۇقك-ءنىڭ شەكارا قىزمەتى يەلەندى. پوليتسيا دەپارتامەنتتەرى اراسىندا جەكە ەسەپتە 1-ورىنعا ەلوردالىق پوليتسيا كومانداسى, 2-ورىنعا قاراعاندى وبلىسىنىڭ, 3-ورىنعا ماڭعىستاۋ وبلىسىنىڭ كومانداسى شىقتى», دەدى ول.