تۇركىستان وبلىسىندا جۇمىس ساپارىمەن بولعان دەنساۋلىق ساقتاۋ ءمينيسترى اجار عينيات زامان تالاپتارىنا ساي جابدىقتالىپ, 100 پايىز تسيفرلىق جۇيەگە قوسىلعان مەديتسينالىق جەدەل جاردەم ورتالىعىنىڭ جۇمىسىمەن تانىستى. «قازاقستاندىق-فرانتسۋزدىق «كاتكو» بىرلەسكەن كاسىپورنى» جشس دەمەۋشىلىگىمەن بوي كوتەرگەن مەديتسينالىق ستانتسيا 25 بريگاداعا ارنالعان. ينۆەستيتسيا كولەمى – 1,4 ملرد تەڭگە.
جەدەل جاردەم ستانتسياسى جىلىنا 70 مىڭعا جۋىق شاقىرۋعا شىعا الادى. مينيسترگە سالانىڭ ناتيجەلى جۇمىستارىن بايانداعان وبلىس اكىمى ومىرزاق شوكەەۆ وڭىردە دەنساۋلىق سالاسىندا جاڭا نىساندار سالىنىپ, دارىگەرلەردىڭ بىلىكتىلىگىن ارتتىرۋ, تسيفرلاندىرۋ, جەدەل جاردەم كولىكتەرىمەن قامتۋ جۇمىستارى ءوز رەتىمەن جۇرگىزىلىپ كەلە جاتقانىن ايتىپ ءوتتى.
جاڭا اشىلعان جەدەل جاردەم ستانساسى 4 كاتەگوريالىق سانات بويىنشا «التىن ساعات» قاعيداسىنا ساي جۇمىس ىستەيدى. ورتالىقتا سونداي-اق, اقش-تا بىلىكتىلىگىن ارتتىرعان وبلىس ماماندارى قىزمەت كورسەتەدى.
جالپى وبلىس بويىنشا 140 جەدەل مەديتسينالىق جاردەم بريگادالارى شاقىرتۋلارعا قىزمەت اتقارادى. ءوڭىر قاجەتتىلىگى 96 پايىزعا قامتىلعان. جەدەل جاردەم قىزمەتىنىڭ كلاستەرى قۇرىلىپ, اۋىلدىق جانە قالالىق جەدەل جاردەم قىزمەتتەرى ورتالىقتاندىرىلعان. ناتيجەسىندە ناۋقاستارعا جەتۋ ۋاقىتى بارىنشا ازايىپ, قىزمەت كورسەرۋ ساپاسى ايتارلىقتاي ارتقان.