مەملەكەت باسشىلارىنىڭ باسقوسۋى ەركىن فورماتتا ءوتىپ, ىنتىماقتاستىق پەن بىرلىكتىڭ نىشانى سەزىلىپ-اق تۇردى. ەل پرەزيدەنتى قاسىم-جومارت توقاەۆ اۋقىمدى ماسەلەلەردى كوتەرىپ, ورتالىق ازيا مەملەكەتتەرىنىڭ باسشىلارىن تۇيتكىلدەردىڭ ءتۇيىنىن بىرلەسە تارقاتۋعا شاقىردى.
اتاپ ايتساق, ءوزارا تاۋار اينالىمى جۇيەسى, ساۋدا-ساتتىقتى ارتتىرىپ, حالىقارالىق مارشرۋتتاردى ءتيىمدى پايدالانۋدى ۇسىندى. وسى ورايدا قازاقستان تاراپى اقتاۋ پورتىن پايدالانۋعا, سونىمەن قاتار تۇرىكمەنستان مەن يران ارقىلى تۇركيا نارىعىن بايلانىستىراتىن ەڭ قىسقا جول «قازاقستان – تۇرىكمەنستان – يران» تەمىر جولىن بەلسەندى پايدالانۋعا شاقىردى. ءوزارا تاۋار اينالىمىن ارتتىرۋ بارىسىندا شەكاراداعى وتكىزۋ بەكەتتەرىندەگى ۋاقىتتى قىسقارتۋ ءۇشىن جەڭىلدىكتەردىڭ قاراستىرىلۋى قاجەتتىگىن جەتكىزدى.
مەملەكەت باسشىسى ءوز سوزىندە ورتالىق ازياعا ينۆەستيتسيا تارتۋ بويىنشا جاقسى مىسالدار كەلتىرىپ ءوتتى. حالىقارالىق ساراپشىلار الداعى 10 جىلدا ءبىزدىڭ شەتەلدەن تىكەلەي ينۆەستيتسيا تارتۋ جونىندەگى الەۋەتىمىزدى شامامەن 170 ميلليارد دوللار, سونىڭ ىشىندە شيكىزاتتىق ەمەس سەكتورعا شامامەن 70 ميلليارد دوللار كولەمىندە بولادى دەپ بولجاپ وتىر. ينۆەستيتسيا تارتۋ بويىنشا بىرلەسە جۇمىس ىستەي وتىرىپ, ورتالىق ازيا مەملەكەتتەرىنىڭ دامۋىن ورتاق شەشۋ جولدارى كورسەتىلدى.
جيىندا كوتەرىلگەن ەڭ وزەكتى تۇيتكىلدىڭ ءبىرى – مۇزدىقتاردىڭ ەرۋى مەن سۋ ماسەلەسى. كليماتتىڭ وزگەرۋى جونىندەگى حالىقارالىق ساراپشىلار توبىنىڭ بايانداماسىنا سايكەس ءبىزدىڭ ايماقتىڭ تەمپەراتۋراسى پلانەتانىڭ باسقا بولىكتەرىنە قاراعاندا الدەقايدا جىلدام جىلىپ كەلەدى. مەملەكەت باسشىسى كۇش-جىگەرىمىزدى جۇمىلدىرماي, ورتالىق ازياداعى كليماتتىڭ وزگەرۋ سالدارىن ەڭسەرۋ مۇمكىن ەمەس ەكەنىن اتاپ ءوتتى. سوندىقتان بىرلەسكەن ءىس-قيمىلداردى ۇيلەستىرۋ ءۇشىن قورشاعان ورتانى قورعاۋ جانە ايماقتاعى كليماتتىڭ وزگەرۋىنە قاتىستى كەلىسىلگەن ساياسات جۇرگىزۋ جونىندەگى ورتالىق ازيا ەلدەرىنىڭ جوبالىق كەڭسەسىن قۇرۋدى ۇسىندى.
قورىتا ايتساق, بۇل سامميتتە ورتالىق ازيا مەملەكەتتەرىنىڭ دامۋ جوسپارى ايقىندالا ءتۇستى. ەندىگى جەردە ءار ماسەلەنى بىرلەسە شەشۋ ماڭىزدى.
باۋىرجان سەرىكباەۆ,
ساياساتتانۋشى