حالىق ۇنىنە قۇلاق اسادى

قوعام مەن مەملەكەت اراسىنداعى سەنىم

ەڭ الدىمەن, ءبولىمنىڭ قۇرىلۋى مەملەكەتتىك ورگاندار تاراپىنان ءوتىنىش بەرۋشىلەرمەن ءوزارا ءىس-قيمىل جاساۋ كەزىندەگى ورىنداۋشىلىق ءتارتىپتى كۇشەي­­تۋدىڭ ءتيىمدى قۇرالىنا اينالدى. وتكەن ءۇش جىلدا ءبولىم ارقىلى 120 مىڭنان استام ءوتىنىش نەمەسە اي سايىن ورتا ەسەپپەن 3-5 مىڭ ءوتىنىش قارالدى. ەلىمىزدىڭ بارلىق وڭىرىنەن 9 مىڭعا جۋىق ءوتىنىش بەرۋشى جەكە قابىلداۋدا بولدى.

بۇل مالىمەتتەر ازاماتتاردىڭ پرەزيدەنت اكىمشىلىگى مەن مەملەكەت باسشىسىنا دەگەن نىق سەنىمىنىڭ كورىنىسى.

ادامدار پرەزيدەنت اكىمشىلىگىنە رەسمي سۇراۋلار مەن ۇسىنىستارمەن عانا ەمەس, سونىمەن بىرگە ىشكى ماسەلەلەرمەن دە جۇگىنەدى, ءوز تاجىريبەلەرى مەن الاڭداۋشىلىقتارىمەن بولىسەدى. ازاماتتاردىڭ وسىنداي بەلسەندى جانە سەنىمدى ۇستانىمىن – ماسەلەلەردى سىندارلى جولمەن شەشۋدەگى مەملەكەتپەن ءوزارا ءىس-قيمىل جاساۋعا دەگەن وڭ كوزقاراسى رەتىندە قابىلداۋ ماڭىزدى.

ءۇش جىل بويى ءبولىمنىڭ تىكەلەي ۇيلەستىرۋىمەن جالپى ستاندارتتارعا سايكەس, وتىنىشتەردى قابىلداۋعا جانە قاراۋ­عا, قاتاڭ باقىلاۋعا جانە ازاماتتار­دى جەكە قابىلداۋعا مۇمكىندىك بەرەتىن مەملەكەتتىك ورگانداردىڭ بىرىڭعاي ينستيتۋتسيونالدىق ورتاسى قۇرىلدى.

جۇيەلى جۇمىس ارقىلى ازاماتتاردىڭ وتىنىشتەرىن قاراۋ پروتسەسىنىڭ بىرىڭعاي جۇيەسىنە 25 مىڭنان استام مەملەكەتتىك ورگاندار مەن ۇيىمداردىڭ 180 مىڭنان استام قىزمەتكەرى جۇمىلدىرىلدى.

وتىنىشتەردى قاراۋدىڭ قۇقىقتىق نەگىزى

بۇگىندە بارلىق مەملەكەتتىك ورگاندار مەن ءوتىنىش بەرۋشىلەر ءۇشىن وتىنىشتەردى قاراۋدىڭ قۇقىقتىق نەگىزىن تۋرا ءبىر جىل بۇرىن – 2021 جىلعى 1 شىلدەدە كۇشىنە ەنگەن اكىمشىلىك راسىمدىك-پروتسەستىك كودەكس (ارپك) ايقىندايدى.

كودەكس ۇزدىك الەمدىك تاجىريبەلەرگە سايكەس ازىرلەندى, سونداي-اق «جەكە جانە زاڭدى تۇلعالاردىڭ وتىنىشتەرىن قاراۋ ءتارتىبى تۋرالى» 2007 جىلعى زاڭعا نەگىزدەلگەن مەملەكەت پەن ءوتىنىش بەرۋشى­لەردىڭ قارىم-قاتىناستارىن جاڭعىرتتى.

بۇرىن قولدانىلعان زاڭنان ايىرما­شىلىعى, كودەكستە وتىنىشتەرمەن جۇمىس ىستەۋدىڭ ءار قادامى, ولاردى باعىتتاۋ مەرزىمىنەن باستاپ سوت ءىسىن جۇرگىزۋگە دەيىن رەتتەلەدى. مۇنداي ناقتىلاۋ وتىنىشتەردى قاراۋدىڭ ءاربىر كەزەڭىنىڭ اشىقتىعىن قامتا­ماسىز ەتۋگە جانە ءوتىنىش بەرۋشى­لەردىڭ مۇددەلەرىن مەملەكەتتىك ورگاندار تاراپىنان ىقتيمال تەرىس پايدالانۋلاردان قورعاۋعا مۇمكىندىك بەرەدى.

ارپك نورمالارىن ءىس جۇزىندە قولدانۋدىڭ العاشقى جىلى ازاماتتاردىڭ يننوۆاتسيالاردى تەز يگەرگەنىن جانە ولاردىڭ زاڭدى مۇددەلەرىن قورعاۋ ءۇشىن قاراستىرىلعان بارلىق پروتسەدۋرانى ءساتتى قولداناتىندىعىن كورسەتتى.

ورىنداۋشى مەملەكەتتىك ورگانعا جىبەرىلگەن قاتەنى ءوز دەڭگەيىندە تۇزەتۋگە مۇمكىندىك بەرەتىن جانە ءوتىنىش بەرۋشى قاي­تادان كەلىسپەگەن جاعدايدا عانا شاعىم جوعارى تۇرعان مەملەكەتتىك ورگان­عا جول­داناتىن, الىنعان جاۋاپتارعا شاعىم­د­انۋ ءراسىمى نەعۇرلىم سۇرانىسقا يە بولدى.

ەرەكشە جاعدايلاردا ازاماتتار سوت ورگاندارىنا شاعىم بەرۋ مۇمكىندىگىن پايدالانادى, ولار ءوتىنىش بەرۋشى تالاپ­تارىنىڭ ادىلدىگى راستالعان جاعدايدا, مەملەكەتتىك ورگانعا ناقتى ايىپپۇلدار سالعانعا دەيىن ءتيىستى شەشىم قابىلدايدى.

وسى جىلدىڭ ءىى توقسانىندا رەسپۋب­ليكا سوتتارىنا 7 598 اكىمشىلىك ارىز ءتۇستى. مەملەكەتتىك ورگاندارعا قاتىستى بەرىلگەن قاناعاتتاندىرىلعان ارىزدار 63%-دى قۇرايدى. بۇل سانداردىڭ ارتىندا اقشالاي ايىپپۇلدار تۇر. ياعني ءوتىنىش بەرۋشىلەردىڭ كوپشىلىگى وزدەرىنىڭ دۇرىستىعىن دالەلدەي الدى.

كودەكستە كوزدەلگەن مەملەكەتتىك ورگان­داردىڭ ءىس-ارەكەتتەرى مەن ارەكەت­سىزدىگى ءۇشىن جاۋاپكەرشىلىكتى كۇشەيتۋ­دىڭ اسەرى ۇزاق كۇتتىرمەدى. اۋرە-سارساڭ­نىڭ, ءفورماليزمنىڭ, وتىنىشتەردى قاراۋ مەر­زىمدەرىن بۇزۋدىڭ كورىنىستەرى مەملە­كەتتىك ورگانداردىڭ جۇمىسىندا سيرەك كەزدەسەتىن جاعدايعا اينالىپ كەلەدى.

جاڭا جاعدايدا باقىلاۋ قۇرىلىمى رەتىندە ءبولىمنىڭ مىندەتى ەكونوميكانىڭ, الەۋمەتتىك ساياساتتىڭ, قوعامدىق ءومىردىڭ جانە باسقا دا جەكەلەگەن سالالارداعى پروبلەمالىق ايماقتاردى انىقتاۋ ماق­ساتىندا شاعىمداردى جەكە قاراۋ­دان اينالىم اعىندارىن جۇيەلى تالداۋ جاعىنا اۋىسادى. بۇل تالداۋ جۇيە­لىك پروبلەمالاردى انىقتاۋعا جانە قا­بىل­دانعان شارالاردى تۇزەتۋگە مۇمكىندىك بەرەدى.

كەمشىلىكتى ۋاقتىلى انىقتاۋعا كومەكتەسەدى

جۇمىس ىستەگەن ءۇش جىل ىشىندە ءبولىم پرەزيدەنت اكىمشىلىگىنە, ەل اۋقىمىندا جانە جەكە وڭىرلەر مەن مەملەكەتتىك ورگاندارعا كەلىپ تۇسەتىن وتىنىشتەرگە تۇراقتى نەگىزدە تالداۋ جۇرگىزىپ كەلەدى.

وتىنىشتەردە كوتەرىلەتىن وزەكتى ماسە­لە­لەردىڭ سيپاتى جىل سايىن وز­گەرىپ وتىرادى. ۇزدىك ۇشتىكتە ارقاشان الەۋ­مەتتىك قول­داۋ, تۇرعىن ۇيمەن قامتاماسىز ەتۋ, جەر ماسەلەسى قالادى. الايدا ءوتىنىش بەرۋ­شى­لەردىڭ جەكەلەگەن ماسەلەگە نازار اۋدا­رۋى­نىڭ ارتۋى ءىس جۇزىندە بەلگىلى ءبىر سالالاردا ولقىلىقتاردىڭ بولۋىن بولجايدى.

ونى سوڭعى ءۇش جىلدا بايقالعان الەۋمەتتىك سالاسىنداعى ترەندتەرى ايقىن كورسەتەدى. ازاماتتاردىڭ وتىنىشتەرى قوعام­نىڭ كوڭىل-كۇيىنىڭ وزىندىك «بارو­مەترى», بۇل ولاردىڭ بەلگىلى ءبىر ۋاقىتتا نە مازالايتىنىن كورسەتەدى. وسىلايشا, 2019 جىلى ءوتىنىش بەرۋشىلەر نەسيەلەردى وتەۋ ماسەلەلەرى بويىنشا بارىنشا بەلسەندىلىك تانىتتى. اتالعان ماسەلەلەر توبىنىڭ ۇلەسى الەۋمەتتىك بلوكقا قاتىستى جانە پرەزيدەنت اكىمشىلىگىنە كەلىپ تۇسكەن وتىنىشتەردىڭ 37%-ىن قۇرادى.

2020 جىلى ااك, 42500 تولەم, سونداي-اق دەنساۋلىق ساقتاۋ ماسەلەلەرى ۇلەسى ايتارلىقتاي ءوستى, ولار الەۋمەتتىك بلوكتىڭ بارلىق ءوتىنىشىنىڭ جالپى سانىنىڭ ۇشتەن ءبىرىن قۇرادى. بۇل جەردە, ارينە, پاندەميا جانە ونىمەن بايلانىستى الەۋمەتتىك شارالار ماڭىزدى ءرول اتقاردى.

2021 جىلى ەڭبەك قاتىناستارى جانە مۇگەدەكتەر مەن حالىقتىڭ الەۋمەتتىك وسال توپتارىن قورعاۋ ماسەلەلەرى وزەك­تەندىرىلىپ, ءاربىر بەسىنشى ءوتىنىشتى قۇرادى. بۇل پاندەميا جاعدايىندا ەكونوميكانىڭ ءوسۋ قارقىنىنىڭ تومەندەۋىنىڭ قيسىندى سالدارى بولدى.

بيىل الەۋمەتتىك بلوك ماسەلەلەرىنە جەر قاتىناستارى قوسىلدى. بۇل وسى سالا­نى ساپالى رەفورمالاۋ قاجەتتىلىگىنىڭ ارتۋىنا بايلانىستى تۋىنداپ وتىر.

وسىنداي ەكسپرەسس-تالداۋ اياسىندا جەكەلەگەن كەزەڭدەردە مەملەكەتتىك ورگانداردىڭ, اسىرەسە حالىقتى قابىل­دانعان شارالار تۋرالى ءتيىمدى اقپارات­تاندىرۋ بولىگىندە تۋىنداعان كەمشى­لىكتەر تۋرالى ناقتى ايتۋعا بولادى. مىسالى, ادامدار قارىزداردى ەسەپتەن شىعارۋ ەرەجەلەرى مەن شارتتارىن ناقتى تۇسىنىكتىڭ بولماۋىنا بايلانىس­تى پرەزيدەنت اكىمشىلىگىنە نەسيەلەردى ەسەپتەن شىعارۋ تۋرالى وتىنىشتەر جازدى. بۇل ۋاكىلەتتى ورگان جۇمىسىنىڭ ناقتى جەتىسپەۋشىلىگى بولدى جانە حالىق تاراپىنان ءادىل سىنعا ۇشىرادى.

ءوتىنىش بەرۋشىلەر كورسەتكەن ماسە­لەلەردىڭ بىرتىندەپ شەشىلىپ, وتكىر ماسەلەلەر ساناتىنان شىعۋى حالىقپەن باي­لانىستىڭ وڭ ناتيجەسى دەۋگە بولادى. دەمەك مەملەكەتتىك ورگاندار ازامات­تاردىڭ سۇرانىستارىن «ەستىپ» جانە ساپالى «جاۋاپ بەرە» الدى. ايتا كەتۋ كەرەك, بۇل جۇمىستى ناقتى ءوتىنىش بەرۋشىلەردىڭ بىرلىكتەرى ەمەس, ازاماتتاردىڭ بۇكىل الەۋمەتتىك توپتارى سەزىندى.

ءبىر ءوتىنىش بەرۋشىنىڭ تاعدىرىندا مىڭداعان قازاقستاندىقتاردىڭ ۇقساس پروبلەمالارى تۇرۋى مۇمكىن. ءبىزدىڭ ازاماتتارىمىزدىڭ پاسسيونارلىق كوڭىل كۇيى پرەزيدەنت اكىمشىلىگىنە كەلىپ تۇسەتىن يدەيالار مەن باستامالاردىڭ تۇراقتى اعىمىندا كورىنىس تابادى.

مىسالى, ءبىلىم جانە عىلىم مينيستر­لىگى قايتا قۇرىلعانعا دەيىن بولىمگە اۋىل شارۋاشىلىعىنىڭ سالالىق پروبلەمالارىن شەشۋ جونىندەگى شارالاردىڭ ءبىرى رەتىندە عىلىمعا جەتەكشىلىك ەتەتىن جەكە مينيسترلىك قۇرۋدى ۇسىنعان ءبىر عالىمنىڭ ءوتىنىشى كەلىپ ءتۇستى.

وسىلايشا, ەل اۋقىمىنداعى ءوتىنىش بەرۋ­شىلەردىڭ جانە جەكەلەگەن مەم­لەكەتتىك ورگانداردىڭ بەلسەندىلىگى جو­نىن­دەگى دەرەكتەر ءماسسيۆىن تالداۋ حالىق­تىڭ الەۋ­مەتتىك كوڭىل كۇيىن وبەكتيۆتى موني­تو­رينگتەۋدىڭ بىرەگەي قۇرالى بولىپ تابىلادى.

بۇل جۇمىستاعى جاڭا پەرسپەكتيۆالار «ە-ءوتىنىش» اقپاراتتىق جۇيەسىنىڭ مۇمكىندىكتەرىن اشادى.

ءبولىمنىڭ ۇشجىلدىعى قارساڭىندا, قاناتقاقتى پايدالانۋدان اقپاراتتىق جۇيەنىڭ ونەركاسىپتىك پايدالانۋعا قوسى­لۋىنىڭ سيمۆولدىق ءمانى بار.

كليەنتكە باعدارلانعان ءتاسىل

بۇگىنگى تاڭدا «ە-ءوتىنىش» جۇيەسىندە 650 مىڭ ءوتىنىش بەرۋشىدەن 1,5 ملن-نان استام ءوتىنىش تىركەلدى.

اقپاراتتىق جۇيە ارقىلى مەملە­كەتتىك ورگاندار نە تۋرالى جازىلعانىن تالداپ قانا قويماي, سونىمەن قاتار ءوتىنىش بەرۋشىلەردىڭ الەۋمەتتىك پورترەتى قانداي ەكەنىن تۇسىنۋگە مۇمكىندىك الدى.

ماسەلەن, سوڭعى دەرەكتەر بويىنشا 2022 جىلدىڭ ءبىرىنشى جارتىجىلدىعىندا ەل بويىنشا ماسەلەلەردىڭ العاشقى ۇش­تىگىنە قۇرىلىس, كولىك جانە تكش سالاسىندا – 20%, اۋىل شارۋاشىلىعى جا­نە جەر قاتىناستارى سالاسىندا – 17%, سون­­داي-اق قارجى جانە ەكونوميكالىق قىز­­مەت سالاسىندا – 14% وتىنىشتەر كىرەدى.

كوتەرىلگەن سۇراقتاردىڭ العاشقى ۇشتىگىن 31-40 جاس ارالىعىنداعى ءوتىنىش بەرۋشىلەر قويادى – 23,6%, 41-50 جاس – 19%, 51-60 جاس –14,8%.

وتىنىشتەردىڭ 92%-ىن جۇمىسقا ورنا­لاسقان حالىق ۇسىنادى. جۇمىس­سىز­داردىڭ ۇلەسى 8%-دى قۇرايدى. 32%-ى جشس نەمەسە جك بار, 11,4% – كوپبالالى وتبا­سىلاردىڭ وكىلدەرى, 5,7% – مۇگەدەكتەر, 1,9% – ااك الۋشىلار.

بۇل مەملەكەت الدىندا ءوز پروبلەمالارىن كوتەرەتىن ناقتى الەۋمەتتىك توپتارعا نازار اۋدارا وتىرىپ, كوتەرىلىپ وتىرعان ماسەلەنىڭ اۋقىمىن ساندىق قانا ەمەس, ساپالىق كورسەتكىشتەرمەن دە سالىستىرۋعا مۇمكىندىك بەرەدى. بۇل مەم­لەكەتتىك ورگاندارعا ء«ورت ءسوندىرۋ» مودە­لىنەن تاۋەكەلدەردى باسقارۋ بويىنشا الدىن الۋ جۇمىسىنا كوشۋگە مۇمكىندىك بەرەدى.

وسىلايشا, وتىنىشتەر ءماسسيۆىن تالداۋ مەملەكەتتىك ساياساتتى ىسكە اسىرۋدىڭ ادامورتالىق تاسىلدەرىنە باعدارلاي وتىرىپ, ءبىزدىڭ ازاماتتارىمىزدىڭ قاجەت­تىلىكتەرىنىڭ باسىمدىعىن ايقىندايدى.

«E-ءوتىنىش» – حالىقتىق برەند

«ە-ءوتىنىش» اقپاراتتىق جۇيەسىنىڭ بىرەگەي مۇمكىندىكتەرىن اتاپ وتە وتىرىپ, ونى ەنگىزۋدىڭ باستى ناتيجەسى قوعام مەن مەملەكەتتىڭ ءوزارا ءىس-قيمىلىندا كەدەرگىسىز ورتا قۇرۋ بولدى دەپ سەنىمدى تۇردە ايتا الامىز.

كۇن سايىن جۇيەنى مىڭداعان ءوتىنىش بەرۋشىلەر پايدالانادى, وسىلايشا ءوز جۇمىسىنىڭ ءبىر جىلى ىشىندە «ە-ءوتىنىش» ناعىز «حالىق ۇنىنە قۇلاق اساتىن مەملەكەت» برەندىنە اينالدى.

بۇگىن كەز كەلگەن مەملەكەتتىك ورگانعا ينتەرنەت جەلىسىنە شىعۋعا مۇمكىندىگى بار سمارتفوننان ءوتىنىش بەرۋگە بولادى.

بۇعان جۇيەگە قوسىلعان 2 مىڭنان استام اۋىل اكىمدىگىن قوسۋعا بولادى, ولار ارقىلى ءوتىنىش بەرۋشىلەرگە ءوز وتىنىش­تەرىن اۋىلدا ءموبيلدى ينتەرنەت بولماسا دا ەلەكتروندى تۇردە جىبەرۋگە مۇمكىندىك بەرەدى. ادامدار بۇل مۇمكىندىكتى وڭ باعالادى.

سونىمەن قاتار جۇيەنى بيزنەس وكىل­دەرى, مەملەكەتتىك قىزمەتتەردى الۋشىلار مەملەكەتتىك ورگاندارعا جۇگىنۋ ءۇشىن نەعۇرلىم قولايلى رەسۋرس رەتىندە پاي­دالاناتىن فاكتىلەر اتاپ وتىلۋدە, ويت­كەنى ولارعا ۋاقتىلى جانە ساپالى جاۋاپ بەرۋگە كەپىلدىك بەرىلگەن. جەكە انىق­تا­مالاردى الۋ ءۇشىن ازاماتتاردىڭ مەملە­كەتتىك ورگاندارعا سۇرانىستارىنىڭ كەيبىر تۇرلەرىن «حالىقتىق تسيفرلاندىرۋ» قۇبىلىسى تۋرالى ايتۋعا بولادى. ياعني ادامدار ءىس جۇزىندە قانداي قىز­مەت­تەردى ەلەكتروندى تۇردە العىسى كەلەتى­نىن وزدەرى انىقتايدى. بۇل رەتتە مەملە­كەتتىك ورگانداردىڭ مىندەتى ازا­مات­تاردىڭ قا­جەتتىلىكتەرىن ىسكە اسىرۋدىڭ پراكتي­كالىق نۇسقالارىن ىزدەستىرۋ بولىپ تابىلادى.

الداعى جۇمىس پەرسپەكتيۆالارى

ەگەر باستاپقىدا «ە-ءوتىنىش» فۋنكتسيو­نالى قاتاڭ تۇردە ارپك نورمالارىنا سايكەس باعدارلانسا, بۇگىندە مەم­لەكەت باسشىسىنىڭ بيۋروكراتياسىز­داندىرۋ تۋرالى جارلىعى شەڭبەرىندە, ازىر­لەۋشىلەرگە قۇقىق قورعاۋ ورگاندارىنىڭ, بانك سالاسىنىڭ جانە ت.ب. ماسەلەلەرىن قوسا العاندا, وتىنىشتەردىڭ بارلىق ءتۇرىن قابىلداۋدىڭ بىرىڭعاي تەرەزەسى رەتىندە ە-Otinish جۇيەسىن ينستيتۋتتاندىرۋ مىندەتى قويىلدى.

مەملەكەت باسشىسىنىڭ جەكە تاپسىرماسى اياسىندا وسى جىلى ءوتىنىش بەرۋشىلەرمەن بىرلەسىپ جۇمىس ىستەۋ ءۇشىن, حقكو مەن «اشىق» اكىمدىكتەردىڭ فرونت-وفيستەرىن بىرىڭعاي ستاندارتتار بويىنشا قايتا فورماتتاۋ باستالدى.

حالىقپەن جەدەل ءوزارا ءىس-قيمىلدىڭ وسىنداي امبەباپ ورتالىقتارىن قانات­قاقتى اپروباتسيالاۋ پاۆلودار, قوستاناي جا­نە تۇركىستان وبلىستارىندا ىسكە قو­سىلدى.

حالىق بارلىق قىزىقتىراتىن مەم­لەكەتتىك قىزمەتتەردى, كونسۋلتاتسيا­لار­دى الىپ, شاعىمداردى ءبىر جەرگە جىبەرە الادى دەپ كۇتىلۋدە.

وسى جىلدىڭ سوڭىنا دەيىن جوبانى ەل اۋقىمىندا ماسشتابتاۋدىڭ تۇجى­رىم­دا­مالىق تاسىلدەرى ازىرلەنەتىن بولادى.

جالپى, قازىردىڭ وزىندە جۇرگىزىلگەن جۇمىس پەن دامۋدىڭ پەرسپەكتيۆالىق جوس­پارلاردىڭ باستى ماقساتى – ازامات­تاردىڭ مەملەكەتتىك ورگاندارعا دەگەن سەنىمىن نىعايتۋدى كوزدەيدى.

سوڭعى ءۇش جىلدا قول جەتكىزىلگەن ناتيجەلەردى باعالاي وتىرىپ, ءبىز ءاربىر ءوتىنىش بەرۋشىنىڭ مەملەكەتتىك بيلىكتىڭ كەز كەلگەن دەڭگەيىندە تىڭدالۋعا قۇقىعى بار ەكەنىن ءاردايىم اتاپ كورسەتەمىز.

وتىنىشتەردى قاراۋدى باقىلاۋ ءبولىمى مەملەكەتتىك ورگانداردىڭ قول­جە­تىمدىلىگىن جانە ولاردىڭ جۇمىسىنىڭ تيىمدىلىگىن ارتتىرۋ ءۇشىن جاعداي جاساي وتىرىپ, وسى قاعيدانىڭ كەپىلى بولىپ سانالادى.

ەگەر ءوتىنىش بەرۋشى ءوزىنىڭ وتىنىشىنە تەرىس جاۋاپ السا دا, مەملەكەتتىك ورگاننىڭ مىندەتى – وعان باس تارتۋدىڭ سەبەبىن جانە مۇنداي شەشىمنىڭ قيسىنىن ءتۇسىندىرۋ, بولاشاقتا قاتەلىكتەردى قايتالاماۋ ءۇشىن ازاماتتاردى زاڭناما تالاپتارىنا سايكەس ارەكەت ەتۋگە ۇيرەتۋ.

ءبىز ادال جۇمىس ارقاشان سەنىم قالىپ­تاساتىن قۇرمەتكە اكەلەتىنىن باسا ايتامىز.

بۇل مەملەكەت پەن ازاماتتىڭ سەرىك­تەستىك قاتىناستارىنىڭ شىنايى كورىنىسى.

 

ەرنار باسپاەۆ,

پرەزيدەنتتىڭ كومەكشىسى – پرەزيدەنت اكىمشىلىگىنىڭ وتىنىشتەردى قاراۋدى باقىلاۋ ءبولىمىنىڭ مەڭگەرۋشىسى