پاۆلودار قالاسىندا بەيبەرەكەت ءارى زاڭسىز سالىنعان قۇرىلىس نىساندارى كوبەيىپ بارادى. سىبايلاس جەمقورلىققا قارسى ءىس-قيمىل قىزمەتى جەرگىلىكتى اكىمدىك وكىلدەرىنە الداعى ۋاقىتتا ناقتى قۇرىلىس جوبالارىنا رۇقسات قۇجاتتارىن بەرۋدەن باس تارتۋدى ۇسىنىپ وتىر.
شىن مانىندە, سوڭعى ۋاقىتتا ەرتىستىڭ بويىن ەن جايلاعان شاھاردا اۋلالار ءۇستى-ۇستىنە تارىلىپ, بالالار وينايتىن بوس ورىن قالماي بارا جاتىر. قۇرىلىس كومپانيالارى تۇرعىن ۇيلەردىڭ اۋلالارى مەن كوشە قالتارىستارىندا تۇرعان سۇيەمدەي بوس جەر كورسە, س ۇلىكشە جابىسىپ, قۇرىلىس قۇجاتىن الۋعا اسىعادى. قۇرىلىس سالاسىنا جاۋاپتى مەملەكەتتىك مەكەمەلەر مۇنداي رەتسىز ۇيلەردىڭ قۇرىلىسىنا قالايشا رۇقسات بەرىپ قويعانىنا تۇرعىندار اڭ-تاڭ. سونىڭ سالدارىنان بۇگىندە اكادەميك ساتباەۆ, ەستاي, تولستوي, بۇقار جىراۋ, قامزين, كوشەلەرىنىڭ بويىندا قابىرعاسى جاياۋ جۇرگىنشىلەر جولىنا ءتونىپ تۇرعان, «قىزىل جولاقتان» اسىپ كەتكەن كوپقاباتتى باسپانالار كوبەيە تۇسۋدە.
جەرگىلىكتى جۇرتتىڭ ەكپىنىمەن جۋىقتا سىبايلاس جەمقورلىققا قارسى ءىس-قيمىل قىزمەتى پاۆلودار قالالىق ساۋلەت جانە قالا قۇرىلىسى ءبولىمىنىڭ قىزمەتىنە قاتىستى جەمقورلىق تاۋەكەلدەرى بويىنشا تالداۋ جۇرگىزىپ كورگەن ەكەن. انتيكوردىڭ قىزمەتكەرلەرى مەكەمەدەگى قاتتاۋلى قۇجاتتاردىڭ بەتىن اشقاندا, ءوز كوزدەرىنە وزدەرى سەنبەپتى. مەكەمەدە ورەسكەل زاڭ بۇزۋشىلىقتاردىڭ كوبەيىپ كەتكەنى سونشالىق, ولاردىڭ اۋقىمىن ساناپ بىتپەيتىنىن ايتادى وبلىستىق سىبايلاس جەمقورلىققا قارسى ءىس-قيمىل دەپارتامەنتىنىڭ پرەۆەنتسيا جانە پاراساتتىلىق باسقارماسىنىڭ باسشىسى نازىمبەك بەكجانوۆ.
– قالادا كوپپاتەرلى تۇرعىن ۇيلەردىڭ قۇرىلىسى ءۇشىن جەر تەلىمدەرىنىڭ نىسانالى ماقساتى زاڭسىز وزگەرتىلە بەرگەن. ماسەلەن, اكادەميك ساتباەۆ كوشەسى, 245/1 مەكەنجايىنداعى ءۇي قۇرىلىسى بويىنشا جەرگىلىكتى تۇرعىنداردىڭ مۇددەسىن ەسكەرۋ, كوپشىلىك تىڭداۋ وتكىزۋ, جۇرتشىلىققا اقپار بەرۋ تۋرالى نەگىزگى تالاپتار مۇلدە ەسكەرىلمەگەن. ناقتى قۇرىلىس سالۋ تۋرالى شەشىمدەر رەسمي جيىنداردان تىسقارى, ءوزارا كەلىسىمدەر ارقىلى شىعارىلا سالعانداي كورىنەدى. بۇعان قوسا «ەگجەي-تەگجەيلى جوبالاۋ جوسپارى بولماۋىنا بايلانىستى رۇقسات قاعازى بەرىلمەيدى» دەگەن تىيىم دا ورىندالماعان, قالانىڭ باس جوسپارىنا ءمان بەرىلمەگەن. سونىڭ ءبىر مىسالى – بايزاقوۆ كوشەسىندەگى 131 جانە 133 مەكەنجايلارى بويىنشا سالىنىپ جاتقان ۇيلەر. بۇل قۇرىلىستاردا ەسكيزدىك جوبالار بولىمىمەن بەكىتىلەتىن جوبالىق قۇجاتتامالار جوق دەسە دە بولادى. ولار ءتىپتى ازىرلەنبەگەن, – دەيدى ن.بەكجانوۆ.
«قىزىقتىڭ كوكەسىن تۇيە سويعاندا كورەسىڭ» دەمەكشى, شاھارداعى الىپ قۇرىلىستىڭ ءبىرى – اكۆاپارك جوباسى ءاۋ باستا-اق قۇجات جاعىنان دۇرىس رەتتەلمەگەن بولىپ شىقتى. ادەتتە قۇرىلىستىڭ قۇرىلىمى الدىمەن كۇردەلىلىك تۇرعىسىنان قاراستىرىلىپ, ساناتى بەلگىلەنەدى. الايدا تاپسىرىس بەرۋشىلەر كەيدە وسى تاۋەكەلدى باعالاۋ ساناتىن قاساقانا تومەندەتىپ, ونى جەڭىل قۇرىلىس تۇرىنە ەنگىزىپ جىبەرەتىن كورىنەدى. نەگىزى قۇرىلىسى كۇردەلى عيماراتتاردىڭ جوباسى مەملەكەتتىك ساراپتامادان وتۋگە ءتيىس. ال اكۆاپارك جوباسى قۇرىلىس سالاسىنداعى الدەبىر جەكەمەنشىك كومپانياعا ساراپتاماعا جولدانىپ, جەڭىل ساناتقا جاتقىزىلعان. كەيبىر جوبالارداعى ينجەنەرلىك جەلىلەر مەن ورتكە قارسى تالاپتاردىڭ دۇرىس ورىندالماۋىنا قاتىستى كەزدەسەتىن كەمشىلىكتەر بۇل زاڭ بۇزۋشىلىقتىڭ جانىندا ءجىپ ەسە الماي قالىپتى.
– قالالىق اكىمدىك بولشەكتەپ جوبالاۋدى ازىرلەۋ تۋرالى زاڭ تالاپتارىن اينالىپ ءوتۋ ءۇشىن جەكە ۇيلەردىڭ قۇرىلىسىنا قاتىستى جوبالاردىڭ ءمانىن بىلدىرەتىن, ەشبىر شەڭبەرگە سىيمايتىن وعاش تالاپتاردى تاجىريبەگە ەنگىزىپ جىبەرگەن. ءسويتىپ, الىپ قۇرىلىستىڭ رۇقسات قاعازىن وپ-وڭاي جەكە تاپسىرىس بەرۋشىنىڭ قولىنا ۇستاتا سالعان, – دەپ مالىمدەدى باسقارما باسشىسى.
شاھاردا اۆتوكولىك تۇراقتارى مەن جەكە تۇرعىن ۇيلەر سالۋ ءۇشىن بولىنگەن جەرلەردە ءزاۋلىم تۇرعىن ءۇي كەشەندەرى بوي كوتەرۋدە. قۇرىلىستىڭ ورنالاسۋ تىعىزدىعى ەشبىر ءجون-جوسىقسىز بۇزىلىپ, كەيبىر شاعىن اۋدانداردا ونىڭ ءنورماتيۆى ءۇش ەسەدەن دە اسىپ كەتكەن. تاعى ءبىر اۋماقتاردا سالىنعان ءتورت, بەس قاباتتى كوپپاتەرلى ۇيلەردىڭ الدىندا كولىك الاڭى تۇرماق, بالالار وينايتىن الاڭدار جوق. مۇنداي ۇيلەرگە رۇقسات قاعازدارى كەيدە تەحنيكالىق شارتتار بويىنشا ءتيىستى مەكەمەلەرمەن كەلىسىلمەستەن بەرىلە سالىپ, اياعى داۋلى سوت ىستەرىنە ۇلاسادى ەكەن. سونىڭ ناقتى دالەلى – جوعارىدا اتالعان اكادەميك ساتباەۆ كوشەسى, 245/1 مەكەنجايىنداعى ءۇي قۇرىلىسى. ونى قويىپ, كوپقاباتتى ۇيلەردى قۇرىلىسشىلار سۋ قورعاۋ ايماقتارىندا, «قىزىل جولاقتاردا» سالا باستاعان. بۇل ارەكەتتەرگە جول بەرىپ قويعانى ءۇشىن بىرقاتار شەنەۋنىك پەن لاۋازىمدى تۇلعاعا قاتىستى ايىپپۇلدار سالىنىپ, ۇيعارىمدار جىبەرىلىپتى. الايدا سوراقى جايتتار ءالى دە تولاستار ەمەس.
ايتپاقشى, جەرگىلىكتى اكىمدىك ۇلەسكەرلىك تۇرعىن ءۇي قۇرىلىسىن دا باقىلاۋعا جاۋاپتى. بۇگىندە وبلىس ورتالىعىندا كوپقاباتتى 8 تۇرعىن ءۇي ۇلەسكەرلەر ەسەبىنەن تۇرعىزىلىپ جاتقانىن ايتىپ وتەيىك. ولاردىڭ قۇرىلىسىنان دا انتيكور قىزمەتى كوپتەگەن كەمشىلىكتى انىقتادى. ناقتى ايتقاندا, جوبالار بويىنشا كوپشىلىك تىڭداۋلارى وتكىزىلمەگەن ءارى بۇل قۇرىلىستاردىڭ كەلەشەكتە شاعىن اۋداندى دامىتۋعا دەگەن ۇلەسى دالەلدەنبەگەن.
مۇرات قاپان ۇلى,
جۋرناليست,
پاۆلودار وبلىسى