توعىز كەلىن توپ جاردى

– جاۋىنوۆتار وتباسىنىڭ وتاناسى قىمبات دالاباەۆا ءدۇبىرلى دوداعا 9 كەلىنىمەن قاتىستى. الدىمەن ولار,  «16 قىز» انىمەن وزدەرىن تانىستىرس­ا, كەلەسى كەزەڭدە وزدەرى جاساعان تەكەمەتتى كورسەتتى. سودان سوڭ بالىق اسىپ, بيدايدىڭ ۇنىنا دايىندالعان قامىردى قوناقتارعا ۇسىندى. ال كەلەسى ونەر كورسەتۋ كەزەڭىندە 9 كەلىن  ەنەسىنىڭ بايانمەن سۇيەمەلدەۋىمەن حالىق ءانى «اقتاماقتى» جاندى داۋىستا ورىندادى. ءسان كورسەتۋ اينالىمىندا كەلىندەر قىز ۇزاتۋ سالتىن ساحنالادى. ناتيجەسىندە, جاۋىنوۆتار وتباسى ەڭ جوعارى ۇپايمەن جەڭىسكە جەتتى, دەيدى ەنە مەن توعىز كەلىندى اتالعان سايىسقا دايىنداۋشىلاردىڭ ءبىرى مانەت شىراقباي. 

جاۋىنوۆتار وتباسى ءتالىم-تاربيەسىمەن, ونەرىمەن, شەبەرلىكتەرىمەن ۇلگىلى. توعىز ۇل مۇناي سالاسىندا ەڭبەك ەتەدى, قازاقتىڭ سالت-ءداستۇرىن ساقتاعان, ەنە جولىن قۋعان كەلىندەرىنىڭ ءبىرى شەبەر بولسا, ءبىرى – اسپاز, ءبىرى  – ءانشى.

وتاعاسى جولەكەش جاۋىنوۆ پەن قىمبات دالا­باەۆا 1964 جىلى شاڭىراق قۇرعان. قىمبات اجە 11 قۇرساق كوتەرگەن, ەكى بالاسى جاستاي شەتىنەگەن. قىمبات دالابايقىزى ومىردەن ەرتە كەتكەن قايىناعاسى مەن ابىسىنىنان قالعان 6 ۇل-قىزدى ءوزىنىڭ 9 بالاسىنا قوسىپ باعىپ, 15 بالانىڭ ارقايسىسىن جەكە-جەكە شاڭىراق قىلعان ەكەن. اۋىل شارۋاشىلىعىندا شوپان, جۇرگىزۋشى بولىپ قىزمەت ەتىپ زەينەتكە شىققان وتاعاسى 2008 جىلى دۇنيەدەن ءوتتى.

بۇگىندە ۇلدارىن ۇياعا قوندىرعان قىمبات اجە – سالت-ءداستۇردى ناسيحاتتاۋشى, قازاقتىڭ اعاش ءۇيىن دارىپتەۋشى, ون ساۋساعىنان ونەرى تامعان شەبەر, بايانمەن جيىن-تويدىڭ ءسانىن كەلتىرگەن ءانشى, «التىن القا» يەگەرى. حالىقتىق اتاعى بار «اينا» ەتنوگرافيالىق-كونتسەرتتىك ۇجىمىنىڭ جانە حالىق­تىق اتاعى بار «اسىل اجەلەر» ءانسامبلىنىڭ مۇشەسى. قىمبات اجە 9 ۇلىنان 37 نەمەرە, 37 شوبەرە ءسۇيىپ وتىر.  ءوز ورتالارىنا بەدەلدى, ۇلكەنگە ىزەتتى, كىشىگە قۇرمەتتى ەل سىيلاعان اۋلەت رەسپۋبليكالىق بايقاۋدا توپ جارىپ, 350 مىڭ تەڭگە سىياقىنى يەلەنىپ قايتتى.

ماڭعىستاۋ وبلىسى