اقتاۋدا حالىقارالىق تۋرنير اياسىندا Naiza Sport Week قازاقستاندىق كۇرەس ليگاسىنىڭ اپتالىعى ءوتىپ, ليگا اياسىندا اشىق جاتتىعۋلار, چەمپيوندار مەن ولاردىڭ جاتتىقتىرۋشىلارىنىڭ قاتىسۋىمەن كەزدەسۋلەر, شەبەرلىك ساعاتتارى ءوتتى. ءتۋرنيردىڭ قىزىقتى ءساتى تەڭىز جاعالاۋىندا ۇيىمداستىرىلعان Eagle Fس جانە Naiza FC-نىڭ بىرلەسكەن ءتۋرنيرى بولدى. سول كۇنى اقتاۋ قالاسى عانا ەمەس, بۇكىل ماڭعىستاۋداعى اۋدان-قالالاردىڭ ەرەجەسىز جەكپە-جەككە قۇمار جاستارى جان-جاقتان اعىلدى. سايىسقا بۇرىنعى UFC چەمپيونى, رەسەيلىك فايتەر, ەرەجەسىز جەكپە-جەكتىڭ جەڭىلىپ كورمەگەن شەبەرى حابيب نۋرماگومەدوۆتىڭ ارنايى كەلۋى جاستاردىڭ قىزىعۋشىلىعىن ارتتىرسا كەرەك, 15 مىڭداي ادام جينالىپتى.
ايتپاعىمىز – ءتۋرنيردىڭ ناتيجەسى ەمەس, تۋرنير بارىسىندا ورىن العان كەلەڭسىز وقيعا حاقىندا. «حابيب, حابيب!» دەپ قۇرمەت-قوشەمەتپەن ۇرانداتىپ, چەمپيوننىڭ سوڭىنان دۋىلداي ەرگەن جاستاردان ءحابيبتى ارنايى توپ – دوستارى مەن سپورتشىلار جانە پوليتسەيلەر وقشاۋلاپ كەلە جاتتى. وسى كەزدە توپ الدىنان جۇگىرە شىققان ازامات قىزمەتىن اتقارىپ جۇرگەن پوليتسەيدى كەۋدەسىنەن قوس قولىمەن يتەرىپ جىبەرىپ, ءحابيبتى جەتەلەي جونەلدى. الگى ازاماتتىڭ قىلىعى جەلى قولدانۋشىلارىنىڭ, ياعني حالىقتىڭ سىنىنا ىلىكتى.
اقتاۋدا ورىن العان كەلەڭسىز وقيعاعا وراي زاڭ ورىندارى شارا قولداندى. اقتاۋ قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان سوتىنىڭ ءباسپاسوز قىزمەتىنىڭ حابارلاۋىنشا, ازامات ت-عا قاتىستى اقبتك-ءنىڭ 434-بابىنىڭ 1-بولىگىندە كوزدەلگەن اكىمشىلىك قۇقىق بۇزۋشىلىق تۋرالى ءىس قارالعان. سوتتا انىقتالعانداي, «ت. 2022 جىلى 17 شىلدە ساعات 01:30 شاماسىندا اقتاۋ قالاسى, 15 «ا» شاعىن اۋدانىندا ءوتىپ جاتقان سپورتتىق ءىس-شارالار كەزىندە, ياعني قوعامدىق ورىندا اينالاسىنداعىلاردى قاساقانا سىيلاماعان.
ءسويتىپ, قوعامدىق ءتارتىپتى بۇزىپ, ءتارتىپتى ساقتاۋعا شاقىرىلعان پوليتسيا قىزمەتكەرلەرىنە قىزمەتتىك مىندەتتەرىن اتقارۋ كەزىندە كۇش قولدانىپ, قوعامدىق ورىندا تىيىم سالۋ ارەكەتتەرىنە باعىنباي, كۇشتەپ كىرىپ, ۇساق بۇزاقىلىق جاساعان» دەپ تانىلدى.
سوت قاۋلىسىمەن ت. ەسىمدى ازامات اقبتك-ڭ 434-بابىنىڭ 1-بولىگىمەن كىنالى دەپ تانىلىپ, وعان اكىمشىلىك جازا رەتىندە 10 تاۋلىككە اكىمشىلىك قاماققا الۋ جازاسى تاعايىندالعان. سەبەبى ت. بۇرىن بىرنەشە رەت اكىمشىلىك جاۋاپكەرشىلىككە تارتىلعان ەكەن.
سوت قاۋلىسى زاڭدى كۇشىنە ەنگەن جوق, بىراق زاڭسىزدىق تاسادا قالماي زاڭعا ساي شارا قولدانۋدىڭ قاپەرگە الىنعانى دۇرىس.
راسىندا, ەرىك-جىگەرىن باعىندىرا الماعان, ىسىنە ەسەپ بەرە الماعان جىگىتتىڭ ارەكەتى سىرت كوزگە سوراقى كورىنىپ-اق تۇردى. پوليتسەيدى جەككورۋشىلىك, قىزمەتىنە كەدەرگى كەلتىرۋ دۇرىس پا؟ ارينە, ءتارتىپ ساقشىسى قۇقىن اسىرا پايدالانسا, زاڭدى, ءتارتىپتى بۇزسا, ءوز جازاسىن الۋعا ءتيىس. بىراق كوپە-كورنەۋ ولارعا قول جۇمساۋدى, باسىنۋدى قۇپتاي المايمىز. ءتارتىپ ساقشىسى – مەملەكەتتىك قىزمەتكەر, ولاردى نەگىزسىز قورلاۋ – مەملەكەتتى سىيلاماۋ بولىپ شىقپاي ما؟
ءتارتىپ ساقشىلارى ىشىندە ەلدى قورعاۋ, تۇرعىنداردىڭ قاۋىپسىزدىگىن قامتاماسىز ەتۋ بارىسىندا كەۋدەسىن الدىمەن وققا توسىپ, ەرلىكتىڭ ۇلگىسىن كورسەتىپ جۇرگەندەرى دە از ەمەس. لاڭكەستەرمەن كۇرەستە, ەل باسىنا كۇن تۋعان اۋىر شاقتاردا وققا ۇشقان پوليتسەي ەرلەرىمىزدى قالاي ۇمىتامىز؟! ولار «پوليتسەي» دەگەن ماماندىقتى مەڭگەرىپ, ويناپ ءجۇرىپ وپات بولعان جوق. ولار – وتان الدىنداعى ازاماتتىق پارىزىن اتقارىپ, ەل مەن جەردىڭ تىنىشتىعىن قورعاۋ جولىندا جانىن قيعاندار. سوندىقتان ءتارتىپ ساقشىلارىن ورىنسىز تومەنشىكتەتىپ, ابىرويى مەن بەدەلىن الاسارتا بەرۋگە, جىگەرىن جاسىتا بەرۋگە بولمايدى.
جاسىراتىنى جوق, كاسىبىن اسىرا پايدالاناتىندار قاي سالادا دا كەزدەسەدى. پارا الاتىن مۇعالىم مەن دارىگەرگە, سوت پەن مەملەكەتتىك قىزمەتشىگە, بوپسالايتىن جۋرناليستكە بولا بۇكىل سالانى جوققا شىعارۋعا, كەزدەسە قالعان مۇعالىم مەن دارىگەردى, ءجۋرناليستى يتەرىپ-ءتۇيىپ قورلاۋعا بولا ما؟! ءوز ومىرلەرىن قاتەرگە تىگىپ ءورت اراسىنان تۇرعىنداردى قۇتقارعان, قىلمىسكەردى قۋىپ جەتىپ تۇتقىنداعان, كوپىردەن نەمەسە بيىكتەن سەكىرىپ, ءومىرىن قيۋعا بەل بايلاعانداردى قۇتقارعان كەزدە عانا پوليتسەيلەر مىقتى ما؟
ساقشى ءتارتىپتى قورعايدى, ونى كىم قورعايدى؟
ماڭعىستاۋ وبلىسى