تۇركىستان وبلىسىندا دەنساۋلىق ساقتاۋ سالاسىندا قىزمەت ەتىپ, پارا الىپ جۇرگەن لاۋازىمدى تۇلعالار جاۋاپكەرشىلىككە تارتىلدى, دەپ حابارلايدى Egemen.kz.
2022 جىلعى 14 شىلدەدە شىمكەنت قالاسىندا مەديتسينالىق جانە فارماتسەۆتيكالىق باقىلاۋ كوميتەتىنىڭ تۇركىستان وبلىسى بويىنشا دەپارتامەنتى باسشىسىنىڭ ورىنباسارى ەرلان كۋربانحودجاەۆقا قاتىستى سوت ۇكىمى شىقتى. ايىپتالۋشىعا 27 ميلليون تەڭگە كولەمىندە ايىپپۇل سالىندى.
وسى ۇكىممەن مەديتسينالىق جانە فارماتسەۆتيكالىق باقىلاۋ كوميتەتىنىڭ شىمكەنت قالاسى بويىنشا دەپارتامەنتى باسشىسىنىڭ ورىنباسارى تۇرمانوۆ, «KAUSAR KLINIKASY» جشس باسشىسى اداحاموۆ, «نيزام اتا» جشس وكىلى احماداليەۆ پەن نىشانباەۆقا 2 ميلليوننان 20 ميلليون تەڭگەگە دەيىنگى ءتۇرلى ايىپپۇلدار سالىندى.
قۇربانحودجاەۆ اداحاموۆ پەن نىشانباەۆتىڭ دەلدالدىعى ارقىلى «نيزام اتا» جانە «KAUSAR KLINIKASY» جشس باسشىلىعىنان مەديتسينالىق قىزمەتكە ليتسەنزيا بەرگەنى ءۇشىن 800 مىڭ تەڭگە كولەمىندە پارا العانى ءۇشىن كىنالى دەپ تانىلدى.
تۇرمانوۆ نىشانباەۆتىڭ دەلدالدىعى ارقىلى كلينيكالىق تاجىريبەگە جىبەرۋ ماقساتىندا مامان سەرتيفيكاتىن بەرگەنى ءۇشىن جالپى سوماسى 60 مىڭ تەڭگە الىپ وتىرعانى انىقتالدى.
«سوتتالعاندار ءومىر بويى مەملەكەتتىك لاۋازىمداردا قىزمەت ەتۋ قۇقىعىنان ايىرىلدى. ۇكىم زاڭدى كۇشىنە ەنگەن جوق», دەلىنگەن قازاقستان رەسپۋبليكاسى سىبايلاس جەمقورلىققا قارسى ءىس-قيمىل اگەنتتىگىنىڭ شىمكەنت قالاسى بويىنشا دەپارتامەنتى تاراتقان حابارلامادا.